စစ်အာဏာသိမ်းမှုကြောင့် ထိုင်းနိုင်ငံသို့ ထွက်ပြေးလာသည့် မြန်မာလူလတ်တန်းစားနှင့် ကျောင်းသား အရေအတွက် ၅ ဆခန့် မြင့်တက်လာနေ
စက်တင်ဘာလ ၅ ရက်
၂၀၂၁ ခုနှစ် စစ်တပ်အာဏာသိမ်းမှုနှင့် စစ်ကောင်စီက စစ်မှုထမ်းဥပဒေကို စတင်အကောင်အထည် ဖော်ခဲ့ခြင်းတို့၏ နောက်ဆက်တွဲအဖြစ် ထိုင်းနိုင်ငံသို့ ထွက်ခွာရွှေ့ပြောင်းလာသည့် မြန်မာနိုင်ငံသား လူလတ်တန်းစား၊ ပညာရှင်နှင့် တက္ကသိုလ်ကျောင်းသားအရေအတွက်မှာ ၅ ဆခန့်အထိ သိသိသာသာ မြင့်တက်လာကြောင်း ၂၀၂၆ ခုနှစ်တွင် ပြုလုပ်ထားသည့် သုတေသနလေ့လာမှုများအရ သိရှိရသည်။
မြန်မာသုတေသီ ဒေါ်နီနီကျော်နှင့် Sirada Khemanitthathai တို့၏ စစ်တမ်းလေ့လာတွေ့ရှိချက်များအရ စစ်အာဏာမသိမ်းမီက ထိုင်းနိုင်ငံရှိ တက္ကသိုလ်များတွင် ပညာသင်ကြားနေသည့် မြန်မာကျောင်းသားအရေ အတွက်မှာ ၂,၅၀၀ ခန့်သာရှိခဲ့သော်လည်း ၂၀၂၄ ခုနှစ်တွင် ၁၂,၀၀၀ ခန့်အထိ မြင့်တက်လာခဲ့ကြောင်း သိရသည်။
အထူးသဖြင့် ထိုင်းနိုင်ငံမြောက်ပိုင်း ချင်းမိုင်မြို့သည် စစ်အာဏာသိမ်းမှုနောက်ပိုင်း မြန်မာနိုင်ငံမှ ထွက် ခွာလာသည့် တက္ကသိုလ်ကျောင်းသားများ၊ ဆရာဝန်များ၊ အင်ဂျင်နီယာများနှင့် အခြားပညာရှင် လူ လတ်တန်းစားများ စုဝေးအခြေချနေထိုင်ရာ အဓိကဗဟိုချက်တစ်ခု ဖြစ်လာခဲ့ပြီး မြန်မာပညာရှင်နှင့် လူလတ်တန်းစား ၆,၀၀၀ ကျော်အထိ ပြောင်းရွှေ့ရောက်ရှိလာခဲ့ကြောင်း သုတေသန လေ့လာမှုစစ်တမ်းတွင် ဖော်ပြထားသည်။
ယခင်က မြန်မာနိုင်ငံသားများ ထိုင်းနိုင်ငံသို့ ရွှေ့ပြောင်းဝင်ရောက်ခြင်းသည် အဓိကအားဖြင့် အလုပ် အကိုင်ရှာဖွေရန် ရွှေ့ပြောင်းလုပ်သားအဖြစ် သွားရောက်ခြင်းဖြစ်ခဲ့သော်လည်း စစ်အာဏာသိမ်းမှုနှင့် စစ်မှုထမ်းဥပဒေ အကောင်အထည်ဖော်မှုနောက်ပိုင်းတွင်မူ အသက်အန္တရာယ်နှင့် အနာဂတ်လုံခြုံရေးအတွက် နိုင်ငံမှထွက်ခွာရသည့် “အသက်ရှင်သန်ကျန်ရစ်ရေးအတွက် ရွှေ့ပြောင်းခြင်း (Survival Migration)” ပုံစံသို့ ပြောင်းလဲသွားကြောင်း သုတေသီများက ထောက်ပြသည်။
“စစ်အာဏာသိမ်းမှုနဲ့ စစ်မှုထမ်းဥပဒေကြောင့် မြန်မာနိုင်ငံသားတွေရဲ့ ရွှေ့ပြောင်းမှု ပုံစံဟာ လုပ်သားရွှေ့ပြောင်းမှုကနေ အသက်ရှင်သန်ကျန်ရစ်ရေးအတွက် ရွှေ့ပြောင်းမှု ပုံစံကို လုံးဝပြောင်းလဲသွားခဲ့တာပါ” ဟု သုတေသီ Dr. Sirada Khemanitthathai က ပြောဆိုသည်။
ဩဂုတ်လ ၂၇ ရက်နေ့က ချင်းမိုင်မြို့တွင် ကျင်းပပြုလုပ်ခဲ့သည့် “ထိုင်း နိုင်ငံအတွင်း ရွှေ့ပြောင်းဝင်ရောက်မှု အခြေအနေများနှင့် ၎င်း၏ လူမှုစီးပွားအကျိုးသက်ရောက်မှုများ” ဆွေးနွေးပွဲတွင် သုတေ သီများနှင့် ပညာရှင်များက ထိုသို့ ဆွေးနွေးခဲ့ကြခြင်းဖြစ်သည်။
သုတေသီများ၏ ထောက်ပြချက်အရ စစ်အာဏာသိမ်းမှုနောက်ပိုင်း ထိုင်းနိုင်ငံသို့ ရောက်ရှိလာသည့် မြန်မာနိုင်ငံသားများအပေါ် ဒေသခံထိုင်းပြည်သူများ၏ နားလည်မှုနှင့် လက်တွေ့အခြေအနေအကြား ကွာဟချက်များရှိနေဆဲဖြစ်ကြောင်း သိရသည်။
ထိုင်းနိုင်ငံသားအများစုသည် မြန်မာနိုင်ငံမှ ဝင်ရောက်လာသူများကို ရွှေ့ပြောင်းလုပ်သားများအဖြစ်သာ မြင်တွေ့နေကြပြီး စစ်အာဏာသိမ်းမှု၊ နိုင်ငံရေးဖိနှိပ်မှုများနှင့် စစ်မှုထမ်းဥပဒေတို့ကြောင့် အသက် ရှင်သန်ရေးအတွက် ထွက်ပြေးလာရသည့် ကျောင်းသားများ၊ လူငယ်များနှင့် ပညာရှင်လူလတ်တန်းစားများ အများအပြားရှိနေသည်ဆိုသည့် အခြေအနေမှန်ကို လုံလောက်စွာ မသိရှိကြကြောင်း ဆိုသည်။
“စစ်တမ်းကောက်ယူခဲ့တဲ့ ထိုင်းလူမျိုး ၄၀၀ အနက် ၃၅၈ ဦးက မြန်မာစစ်တပ်ရဲ့ စစ်အာဏာသိမ်းမှုနောက် ပိုင်း ဝင်ရောက်လာတဲ့ မြန်မာလူငယ်တွေ၊ လူလတ်တန်းစားတွေနဲ့ တက္ကသိုလ်ကျောင်းသားတွေဟာ အသက်ရှင်သန်ရေးအတွက် ပြေးထွက်လာသူတွေဆိုတဲ့ ပကတိအခြေအနေမှန်နဲ့ ကိန်း ဂဏန်းတွေကို တိတိကျကျ မသိကြဘူး။ သူတို့ကို အလုပ်သမားအဖြစ်သာ သီးသန့်မြင်တွေ့နေကြတယ်” ဟု ချင်းမိုင်တက္ကသိုလ်မှ ပါမောက္ခ ဒေါက်တာ Pisit Nasi က ပြောဆိုသည်။
ထို့ကြောင့် စစ်အာဏာသိမ်းမှုနောက်ပိုင်း ထိုင်းနိုင်ငံသို့ ရောက်ရှိလာသည့် မြန်မာနိုင်ငံသားများ၏ အခြေ အနေမှန်ကို ဒေသခံထိုင်းလူထု နားလည်သဘောပေါက်လာစေရန် ကြိုးပမ်းမှုများ လိုအပ်ကြောင်း ၎င်းက အကြံပြုသည်။
ဆက်လက်ဖတ်ရှုပါရန် - ⤵️⤵️
38
9
6
3
1September 5, 2026 2.1K 1 5
