Major Crypto Airdrops

#የሰራተኞችድምጽ

የላብ አደሩ ቀንና በበዓል ድምቀት የማይሸፈነው የኑሮ ፈተና !

(የሰራተኞች ድምጽ - በቲክቫህ ኢትዮጵያ)

ዛሬ ሚያዝያ 23 የዓለም የላብ አደሮች ቀን ነው።

ይህ ቀን ለብዙዎች የእረፍት እና የደስታ ሊሆን ቢችልም ለብዙሃኑ ሰራተኞች ግን የድካማቸው ውጤት ከኑሮ ጋር ግብግብ የሚገጥሙበትን እውነት የሚያስታውስ ነው።

በየኢንዱስትሪ ፓርኮቹ ፣ በፋብሪካዎች ፣ በግንባታ ቦታዎች እና በተለያዩ ተቋማት ውስጥ ቀን ከሌሊት የሚደክመው ሰራተኛ ዛሬም ድረስ በበርካታ ማነቆዎች ውስጥ ይገኛል።

ዛሬ ሰራተኛው እየተጋፈጠ ያለው ትልቁ ፈተና የኑሮ ውድነት ነው።

ከቤት ኪራይ ጭማሪ እስከ ትራንስፖርት ጣጣ፣ ከምግብ ዋጋ መናር እስከ መሰረታዊ ፍላጎቶች አለመሟላት ሰራተኛውን ለከፍተኛ የስነ-ልቦና እና የኢኮኖሚ ጫና ዳርገውታል።

የሚያገኘው ደመወዝ በወሩ መጀመሪያ ላይ " እጁ ገብቶ ሳይታይ " የሚያልቅበት ደረጃ ላይ ደርሷል።

በሀገራችን እስካሁን የዝቅተኛ ደመወዝ ወለል አለመወሰኑ ለብዙዎች ብዝበዛ ምክንያት እንደሆነ ሰራተኛው ይገልጻል።

በተለይም በኢንዱስትሪ ፓርኮች እና በተለያዩ የግል ድርጅቶች ውስጥ የሚሰሩ ወገኖቻችን በወር የሚያገኙት ገቢ ከእለታዊ ፍጆታቸው ጋር በፍጹም የማይመጣጠን ነው። የላባቸውን ዋጋ፤ የድካማቸውን በረከት ማግኘት አልቻሉም።

የሚገርመው ደግሞ ሰራተኛው መብቱን ሲጠይቅ ወይም የተሻለ ክፍያ ሲፈልግ " ምንም አታመጡም፤ ካልፈለጋችሁ መልቀቅ ትችላላችሁ " የሚል የማስፈራሪያ ቃል መጋፈጡ ነው። ስራ አጥነትን እንደ ማስፈራሪያ በመጠቀም የሰራተኛውን ክብር እና መብት የሚጥሱ አካላት ዛሬም አልጠፉም። የሰራተኛ ማህበራት ጥንካሬ ማጣትም ለዚህ ክፍተት ትልቅ አስተዋጽኦ አድርጓል።

በርካታ ድርጅቶች በየዓመቱ በሚሊዮን እና በቢሊዮን የሚቆጠር ትርፍ ሲያሳውቁ ይሰማሉ። ነገር ግን ይህ ትርፍ እንዲመጣ ዋናው ሞተር የሆነው ሰራተኛ ህይወቱ ላይ ምንም ለውጥ አይታይም።

" ድርጅታችን አደገ " ሲባል የሰራተኛው ኑሮ ግን አብሮ ካላደገ እድገቱ ትርጉም አልባ ነው። ሰራተኛው የድርጅቱ አካል ፣ ምሰሶ የጀርባ አጥንት መሆኑን መዋጥ የግድ ነው።

የላብ አደሮች ቀን በባዶ ቃላትና በንግግር ብቻ የሚታለፍ መሆን የለበትም። የሰራተኛውን ኑሮ ለማሻሻል የሚያስችሉ ተጨባጭ የፖሊሲ ማሻሻያዎች፣ የደመወዝ ወለል መወሰን እና የመብት ጥበቃዎች ሊተገበሩ ይገባል።

ላቡን አፍስሶ ሀገር ለሚገነባው፣ ደሙን አፍስሶ ለሚያመርተው ሰራተኛ ሁሉ ክብር ይገባዋል!

መልካም የላብ አደሮች ቀን!

ቲክቫህ ኢትዮጵያ
ሚያዚያ 23 ቀን 2018 ዓ/ም

@tikvahethiopia

በአሜሪካ ከሚኖሩ የኢትዮጵያ ተወላጅ ስደተኛ ቤተሰቦች መካከል 47.6 በመቶ የመንግስት ድጋፍ ተጠቃሚ ናቸው።

ፕሬዝዳንት ዶናልድ ትራምፕ በአሜሪካ የሚኖሩ ስደተኞች ከመንግስት የሚያገኙትን የዕርዳታ ድጋፍ (Welfare) የሚያሳይ ዝርዝር መረጃ በሰንጠረዥ መልክ በትሩዝ ሶሻል አካውንታቸው ላይ አጋርተዋል።

ፕሬዝዳንቱ በማህበራዊ ገፃቸው ባጋሩት መረጃ መሰረት፣ በአሜሪካ የሚኖሩ የኢትዮጵያ ተወላጅ ቤተሰቦች ከሌሎች ሀገራት አንጻር ከፍተኛ የሚባል የመንግስት ድጋፍ ተጠቃሚ መሆናቸውን ያሳያል።

መረጃው በአሜሪካ የሚኖሩ የኢትዮጵያ ተወላጅ ስደተኛ ቤተሰቦች (Immigrant Households) 47.6 በመቶ ያህሉ ቢያንስ ከቤተሰቡ አንዱ የመንግስት ማህበራዊ ድጋፍ ተጠቃሚ መሆናቸውን የሚገልጽ ነው።

ምንም እንኳን ቤተሰቦቻቸው ሰራተኛ ቢሆኑም አሜሪካ ውስጥ የተወለዱ ልጆቻቸው በመንግስት በሚደገፍ የነጻ የትምህርት ቤት ምሳ ወይም የጤና መድን ተጠቃሚ ከሆኑ፣ ያ ሙሉ ቤተሰብ እንደ "ዕርዳታ ተቀባይ" ተቆጥሮ በዝርዝሩ ውስጥ መካተቱ ቁጥሩን ከፍ አድርጎታል።

ይህ የፕሬዝዳንት ዶናልድ ትራምፕ መረጃ በኢትዮጵያውያን ላይ ከስነ-ልቦና ጫና ባለፈ፣ ወደፊት የሚደረጉ የቤተሰብ ጥሪዎችንና የቪዛ ሂደቶችን አደጋ ላይ የሚጥል እንደሆነ ይታመናል።

ጉዳዩን በቅርበት የሚከታተሉትና በአሜሪካ የህግ ባለሞያ የሆኑት አቶ ሙሉአለም ጌታቸው በማኅበራዊ ትስስር ገጻቸው ባሰፈሩት ጹሑፍ "በዚህ መጠን የኢትዮጵያ ስደተኛ በዌልፌር ሥር መሆኑ አስደሳች ዜና አይደለም" ሲሉ ገልጸውታል።

አክለውም፥ " ይሄ ከኢትዮጵያ ለሚመጣ ስደተኞች መጥፎ የፖሊሲ አቅጣጫ ሊያስቀምጥ ያችላል። አሁን ትኩረቱ እኛ ላይ ላይሆን ይችላል። ነገር ግን የምትችሉ ሰዎች ከዌልፌር መውጣት ብትችሉ የተመረጠ ነው።" የሚል መልዕክታቸውን አስተላልፈዋል።

   |   @tikvahethmagazine