Күплек сан гынамы? Юк!
«Гаҗәеп татар теле» шәлкемендә аффикслар полисемиясе темасын дәвам итеп, -ЛАр кушымчасының төрле мәгънә функцияләрен карап үтик.
Искәрмә. -ЛАр аффиксы дигәндә аның барлык алломорфлары күздә тотыла: -ЛАр = {-лар, -ләр, -нар, -нәр}
Мәгънәләрне шартлы рәвештә берничә төркемгә бүлдек:
1. Күплек сан
китаплар – күплек сан, иң еш кулланылган функция
Ә хәзер бу җөмләне карыйк:
Абыйларга йөгерепләр бардым, тик өлгермәдем, ишекләрен бикләп киткәннәр иде инде
Бу җөмләдә -ЛАр кушымчасы дүрт төрле функция үти:
2. Гаилә, йорт, мохит
абыйлар – сүз берничә абый түгел, ә абый яшәгән йорт, аның гаиләсе турында бара
3. Күмәк иялек
ишекләре – ияләрнең күп булуына ишарә, ишек берәү генә дә була ала
4. Көчәйтү
йөгерепләр – бик тиз, ашыгып
5. Гамәл итүчеләрнең күплеге
киткәннәр – гамәл башкаручыларның күплеген аңлата
Һәм тагын дүрт функция:
6. Гомумиләштерү
яшьләр – берничә яшь кеше генә түгел, ә гомумән яшьләр (youth, молодежь)
7. Вәкиллек
казаннар, мәскәүләр – шул шәһәрдә яшәүчеләрне яки аның вәкилләрен белдерә
8. Төркем
камаллар – Камал театры кешеләре, коллектив мәгънәсендә
9. Киңәйтү
ватсаплар [эшләми] – берничә челтәрне күздә тотып әйтү, ватсап кына түгел, телеграм да, башкалары да эшләми
Ә сез -ЛАр аффиксының тагын нинди мәгънәләрен беләсез? Мисалларыгызны комментта языгыз!#ГаҗәепТатарТеле #ЛАрАффиксы
Хәбәрләрне безнең Max каналында да күзәтеп бара аласыз.
TatSoft | @ipsanrt
