စစ်ဘက်ဆိုင်ရာ သူရဲကောင်းဘွဲ့၊ ဆုနှင့် တံဆိပ်များ ၁,၇၉၂ ဦးကို အမျိုးသားညီညွတ်ရေးအစိုးရက ချီးမြှင့်ပေးအပ်
စက်တင်ဘာလ ၇ ရက်
အမျိုးသားညီညွတ်ရေးအစိုးရ (NUG) က တော်လှန်ရေး ၅ နှစ်တာကာလအတွင်း အသက်၊ ခန္ဓာနှင့် ကိုယ်ကျိုးစီးပွားများကို မငဲ့ကွက်ဘဲ စစ်ရေးတာဝန်များကို ရဲဝံ့စွာ ထမ်းဆောင်ခဲ့ကြသည့် တော်လှန် ရေးရဲဘော်များအား ဂုဏ်ပြုချီးမြှင့်သည့်အနေဖြင့် စစ်ဘက်ဆိုင်ရာ သူရဲကောင်းဘွဲ့၊ ဆုနှင့် တံဆိပ်များကို စုစုပေါင်း ၁,၇၉၂ ဦးအား ချီးမြှင့်အပ်နှင်းခဲ့ကြောင်း သိရသည်။
ပြည်သူ့ကာကွယ်ရေးတပ်မတော် (PDF) တည်ထောင်ခြင်း ၅ နှစ်ပြည့် အထိမ်းအမှတ်အဖြစ် ကျင်းပသည့် စစ်ဘက်ဆိုင်ရာ သူရဲကောင်းဘွဲ့၊ ဆုနှင့် တံဆိပ်ချီးမြှင့်ပွဲကို ပြည်သူ့ခုခံတွန်းလှန်စစ် ၅ နှစ်မြောက်နေ့ဖြစ်သည့် ယနေ့ စက်တင်ဘာလ ၇ ရက်နေ့တွင် အွန်လိုင်းနှင့် မြေပြင်အခမ်းအနားများ ပေါင်း စပ်၍ ကျင်းပခဲ့ခြင်းဖြစ်ကြောင်း NUG က သတင်းထုတ်ပြန်သည်။
ပြည်သူ့တော်လှန်ရေးဂုဏ်ဆောင်ဘွဲ့ကို နိုင်ငံတော်ယာယီသမ္မတ ဒူဝါလရှီးလက ပေးအပ်ချီးမြှင့်ခဲ့ပြီး၊ ပြည်သူ့သားကောင်းဆုကို ပြည်ထောင်စုဝန်ကြီးချုပ် မန်းဝင်းခိုင်သန်းက ပေးအပ်ချီးမြှင့်ခဲ့ကြောင်း သိရသည်။
ပြည်သူ့တော်လှန်ရေးသူရဲကောင်းဘွဲ့ကို ပြည်ထောင်စုဝန်ကြီးချုပ်ရုံးဝန်ကြီး ဒေါက်တာ ဇော်ဝေစိုးက ပေးအပ်ချီးမြှင့်ခဲ့ပြီး၊ ပြည်သူ့ဇာနည်ဆုကို ကာကွယ်ရေးဝန်ကြီး ဦးရည်မွန်က ပေးအပ်ခဲ့သည်။ ထို့အတူ ပြည်သူ့သားကောင်းဆုကို ပြည်ထဲရေးဝန်ကြီး ဦးလွင်ကိုလတ်ကလည်းကောင်း၊ တော်လှန်ရေးအမှုထမ်းကောင်းတံဆိပ်ကို ကာကွယ်ရေးဝန်ကြီးဌာန ဒုတိယဝန်ကြီး နိုင်ကောင်းရွက်ကလည်းကောင်း ပေးအပ်ချီးမြှင့်ခဲ့ကြောင်း NUG က ဆိုသည်။
NUG က ပြည်သူ့တော်လှန်ရေးဂုဏ်ဆောင်ဘွဲ့ (Honor of People's Revolution - HPR)၊ ပြည်သူ့တော်လှန်ရေးသူရဲကောင်းဘွဲ့ (Legend of People's Revolution - LPR)၊ ပြည်သူ့ဇာနည်ဆု (People's Medal for Noble Service - PMNS)၊ ပြည်သူ့သားကောင်းဆု (People's Medal for Loyal Service - PMLS) နှင့် တော်လှန်ရေးအမှုထမ်းကောင်းတံဆိပ် (Badge of Revolutionary Service - BRS) တို့ကို ချီးမြှင့်ခဲ့သည်။
ဆုနှင့် ဘွဲ့ရရှိသူများတွင် HPR ဘွဲ့ရရှိသူ ၁ ဦး၊ LPR ဘွဲ့ရရှိသူ ၂၁ ဦး၊ PMNS ဆုရရှိသူ ၁,၆၄၇ ဦး၊ PMLS ဆုရရှိသူ ၈၁ ဦးနှင့် BRS တံဆိပ်ရရှိသူ ၄၂ ဦး ပါဝင်ကြောင်း သိရသည်။
စစ်ဘက်ဆိုင်ရာ သူရဲကောင်းဘွဲ့၊ ဆုနှင့် တံဆိပ်ချီးမြှင့်ခံရသူ စုစုပေါင်း ၁,၇၉၂ ဦးအနက် PDF မှ ၁,၄၄၂ ဦး၊ PDO မှ ၃၂၄ ဦးနှင့် မဟာမိတ်တော်လှန်ရေးအဖွဲ့အစည်းများမှ ၂၆ ဦး ပါဝင်ကြောင်း သိရသည်။ ထို့ပြင် စစ်ဒေသ၊ တပ်မ၊ တပ်ရင်းနှင့် တပ်ဖွဲ့အလိုက် ချီးမြှင့်ခံရသည့် အဖွဲ့အစည်း ၄၅ ဖွဲ့လည်း ပါဝင်သည်ဟု NUG က ထုတ်ပြန်ထားသည်။
"အခုလိုမျိုး ဒီ စစ်ဘက်ဆိုင်ရာ သူရဲကောင်းဘွဲ့၊ ဆူတံဆိပ် ဒီ ဒီ ချီးမြှင့်အပ်နှင်းရတဲ့ ကိစ္စက ရည် ရွယ်ချက် ကျွန်တော်တို့ ၅ ခု ရှိပါတယ်။ ရည်ရွယ်ချက် ၁ ကတော့ ဒီဘွဲ့တံဆိပ် ရရှိသူတွေရဲ့ စွန့်လွှတ်မှု၊ သစ္စာရှိမှုတွေကို တပ်မှူး၊ ရဲဘော်တွေက အားကျအတုယူဖွယ် စံပြပုံရိပ်အဖြစ် ဖော်ဆောင်ဖို့ ဖြစ်တယ်။ ရည်ရွယ်ချက် ၂ ကတော့ ဒီတော်လှန်ရေးကာလအတွင်းမှာ တာဝန်ကျေပွန်ခဲ့သူတွေကို နိုင်ငံတော်ရဲ့ ဒါ အမြင့်ဆုံး ဂုဏ်ပြုမှုနဲ့ အသိအမှတ်ပြုပြီး ၎င်းတို့၏ စွမ်းဆောင်ချက်များ မပျောက်ပျက်အောင် မှတ်တမ်းတင်ဖို့ ဖြစ်တယ်။ ရည် ရွယ်ချက် ၃ ကတော့ ကျဆုံး၊ စွန့်လွှတ်သူရဲကောင်းတွေရဲ့ မိသားစုတွေကို နိုင်ငံတော်က ကျေးဇူးဆပ်တဲ့အနေနဲ့ စိတ်ဓာတ်ရေးရာ မြှင့်တင်ပေးဖို့နဲ့ အနာဂတ် လူမှုဘဝ လုံခြုံမှုကို ဖြည့်ဆည်းပေးဖို့ ဖြစ်တယ်။ ရည်ရွယ်ချက် ၄ ဖက်ဒရယ်ဒီမိုကရေစီ ပြည်ထောင်စုအတွက် အသက်ပေးဆပ်ခဲ့ကြသူများကို စဉ်ဆက်မပြတ် အမှတ်ရနေစေဖို့ ဖြစ်တယ်။ ရည်ရွယ်ချက် ၅ နိုင်ငံတော်အတွက် ပေးဆပ် တိုက်ပွဲဝင်မှုနဲ့ ရရှိလာတဲ့ အောင်ပွဲတွေရဲ့ တန်ဖိုးကို ပြည်သူ လူထု တစ်ရပ်လုံးက လေးစားတန်ဖိုးထားတတ်စေရာပေါ့နော်။ ဒီရည်ရွယ်ချက် ၅ ခုနဲ့ ကျွန်တော်တို့ ဒီ အခုလိုမျိုး သူရဲကောင်းဘွဲ့၊ ဆူတံဆိပ်တွေကို ချီးမြှင့်အပ်နှင်းခြင်း ကိစ္စကို ဆောင်ရွက်တာ ဖြစ်ပါတယ်" ဟု NUG ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
အမျိုးသားညီညွတ်ရေးအစိုးရအနေဖြင့် တော်လှန်ရေးကာလအတွင်း ထူးချွန်ပြောင်မြောက်စွာ တာဝန်ထမ်းဆောင်ခဲ့သည့် ရဲဘော်များနှင့် ကျဆုံးသူရဲကောင်းများကို ဂုဏ်ပြုသည့် စစ်ဘက်ဆိုင်ရာ သူရဲကောင်းဆု၊ ဘွဲ့နှင့် တံဆိပ်ချီးမြှင့်ခြင်းအစီအစဉ်ကို နှစ်စဉ် ဆက်လက်ကျင်းပပြုလုပ်သွားမည်ဖြစ်ကြောင်း သတင်းထုတ်ပြန်ထားသည်။
ဆက်လက်ဖတ်ရှုပါရန် - ⤵️⤵️
40
11
5
1September 7, 2026 259
