သံတွဲမြို့ကို စစ်တပ်က လေကြောင်းမှ ဗုံးကြဲတိုက်ခိုက်၍ အမျိုးသမီး ၁ ဦးသေဆုံး၊ ရေးမြို့နယ်တွင်လည်း တိုက်ပွဲမရှိဘဲ စစ်တပ်က ဗုံးကြဲ
စက်တင်ဘာ ၇ ရက်
ရခိုင်ပြည်နယ်၊ သံတွဲမြို့ကို အကြမ်းဖက်စစ်တပ်က ယနေ့ စက်တင်ဘာလ ၇ ရက် နံနက်ပိုင်းတွင် ဂျက်ဖိုက်တာဖြင့် လေကြောင်းမှ ဗုံးကြဲတိုက်ခိုက်ခဲ့ရာ အရပ်သားအမျိုးသမီး ၁ ဦး သေဆုံးပြီး ၃ ဦး ထိခိုက်ဒဏ်ရာရရှိကာ နေအိမ် ၆ လုံးလည်း ပျက်စီးခဲ့ကြောင်း ရခိုင်ဒေသသတင်းရင်းမြစ်များထံမှ သိရှိရသည်။
ယနေ့ နံနက် ၁၀ နာရီ ၃၀ မိနစ်ခန့်အချိန် သံတွဲမြို့တွင် အကြမ်းဖက်စစ်ကော်မရှင်တပ်၏ ဂျက်ဖိုက်တာတစ်စီးက မြို့အမှတ် ၈ ရပ်ကွက်အတွင်းသို့ ပေါင် ၃၀၀ ဗုံး ၂ လုံး ကြဲချတိုက်ခိုက်ခဲ့သည့်အပြင် စက်သေနတ်ဖြင့်ပါ ပစ်ခတ်တိုက်ခိုက်ခဲ့ကြောင်း သိရှိရသည်။
ယင်းဗုံးကြဲတိုက်ခိုက်မှုအတွင်း သံတွဲမြို့ အမှတ် ၈ ရပ်ကွက်တွင် နေထိုင်သည့် ဒေါ်သန်းသန်းကြွယ် အသက် ၈၀ နှစ်သည် ဖြစ်စဉ်နေရာ၌ပင် သေဆုံးခဲ့ကြောင်း သိရသည်။
ထို့ပြင် အမှတ် ၈ ရပ်ကွက်မှ မမိုမိုမြင့်အောင် အသက် ၂၈ နှစ်၊ ဒေါ်အေးအေးကြွယ် အသက် ၆၆ နှစ်နှင့် ကိုရန်နောင်ထက် အသက် ၂၈ နှစ်တို့မှာ ဗုံးစထိမှန်ကာ ထိခိုက်ဒဏ်ရာရရှိခဲ့ပြီး လက်ရှိတွင် အရေးပေါ်ဆေးကုသမှု ခံယူနေရကြောင်း သိရသည်။
စစ်တပ်၏ လေကြောင်းဗုံးကြဲတိုက်ခိုက်မှုကြောင့် အမှတ် ၈ ရပ်ကွက်အတွင်းရှိ ပြည်သူပိုင်နေအိမ် ၆ လုံးမှာလည်း ဗုံးစထိမှန်၍ ပျက်စီးခဲ့ကြောင်း သိရှိရသည်။
လက်ရှိရက်ပိုင်းအတွင်း အကြမ်းဖက်စစ်တပ်က အာရက္ခဒေသအတွင်း လေကြောင်း၊ ရေကြောင်းနှင့် လက်နက်ကြီးများအသုံးပြု၍ တိုက်ခိုက်မှုများ ဆက်တိုက်ပြုလုပ်နေသဖြင့် ဒေသခံပြည်သူများအနေဖြင့် လေကြောင်းအန္တရာယ်နှင့် လက်နက်ကြီးအန္တရာယ်များကို အထူးသတိထားကြရန် ရက္ခိုင်အမျိုးသားအဖွဲ့ချုပ်/အာရက္ခတပ်တော် ULA/AA က သတိပေးတိုက်တွန်းထားသည်။
အလားတူ မွန်ပြည်နယ်၊ ရေးမြို့နယ်တွင်လည်း စက်တင်ဘာလ ၆ ရက်နေ့၌ မှော်ဘီလေတပ်စခန်းမှ တက်လာသည့် စစ်တပ်၏ ဂျက်ဖိုက်တာတစ်စီးက ရေး-ဘုရားသုံးဆူကားလမ်းပိုင်းရှိ ချဲတိုက်နှင့် တောင်အိုအထက်၊ ချောင်းနှစ်ခွကျေးရွာအနီးဝန်းကျင်ရှိ ဥယျာဉ်ခြံမြေများအတွင်းသို့ လေကြောင်းမှ ဗုံးကျဲတိုက်ခိုက်ခဲ့ကြောင်း ရေဘီလူးတပ်ရင်းမှ တာဝန်ရှိသူတစ်ဦးက ပြောကြားသည်။
ယင်းနေရာတွင် တိုက်ပွဲဖြစ်ပွားခြင်းမရှိဘဲ စစ်တပ်က ပေါင် ၅၀၀ ဗုံးသီးအသုံးပြု၍ လာရောက်တိုက်ခိုက်ခဲ့ခြင်းဖြစ်ကြောင်း၊ ဗုံးမှာ ဥယျာဉ်ခြံမြေအတွင်း ကျရောက်ပေါက်ကွဲခဲ့သဖြင့် အရပ်သားပြည်သူများ ထိခိုက်ဒဏ်ရာရရှိခြင်းနှင့် နေအိမ်ပျက်စီးမှု မရှိခဲ့ကြောင်း သိရသည်။
“တိုက်ပွဲဖြစ်ပွားခြင်းမရှိဘဲ ဗုံးကျဲတိုက်ခိုက်ခဲ့တာပါ။ ပြည်သူတွေ ထိခိုက်ဒဏ်ရာရတာနဲ့ နေအိမ်ပျက်စီးတာမျိုး မရှိဘူးလို့ သိရတယ်။ ဒေသခံတွေရဲ့ ပြောကြားချက်အရ ဥယျာဉ်ခြံမြေထဲကို ပေါင် ၅၀၀ ဗုံးသီးနဲ့ ကျဲသွားတာပါ” ဟု ရေဘီလူးတပ်ရင်းမှ တာဝန်ရှိသူက ပြောဆိုသည်။
ရေးမြို့နယ်အတွင်း စစ်တပ်၏ လေကြောင်းတိုက်ခိုက်မှုများ မကြာခဏ ဖြစ်ပွားနေပြီး ပြီးခဲ့သည့် ဩဂုတ်လ ၁၁ ရက်နေ့ကလည်း စစ်ကောင်စီတပ်က ဂျက်ဖိုက်တာဖြင့် ရေးမြို့နယ်၊ ကျောင်းရွာအုပ်စု၊ ရေးချောင်းဖျားဒေသရှိ ချော့ထာရွာအနီး ဥယျာဉ်ခြံများကို လေကြောင်းမှ ဗုံးကျဲတိုက်ခိုက်ခဲ့သေးကြောင်း သိရသည်။
ယင်းတိုက်ခိုက်မှုတွင် လူထိခိုက်သေဆုံးမှု မရှိခဲ့သော်လည်း ဥယျာဉ်တဲများနှင့် စိုက်ပျိုးထားသည့် သီးနှံပင်များ ထိခိုက်ပျက်စီးခဲ့ကြောင်း သိရှိရသည်။
လက်ရှိတွင် စစ်တပ်က နိုင်ငံတစ်ဝန်းရှိ ဒေသအများအပြားတွင် လေကြောင်းတိုက်ခိုက်မှုများ ဆက် တိုက်ပြုလုပ်နေသဖြင့် တိုက်ပွဲဖြစ်ပွားခြင်းမရှိသည့် ဒေသများရှိ အရပ်သားပြည်သူများပါ လေကြောင်းအန္တရာယ်ကို ရင်ဆိုင်နေရကြောင်း ဒေသခံများက ပြောဆိုကြသည်။
#KTM
#HlaingInfo
45
3
2
1
1
1September 7, 2026 2.3K 1
