လှိုင်သာယာမြို့နယ် ဒဂုံဧရာအဝေးပြေးဝင်းတွင် စပယ်ယာလုပ်ကိုင်နေသော အသက် ၁၅ နှစ်အရွယ် မောင်ဖြိုးသီဟ ပျောက်ဆုံးနေ၊ သာကေတတွင် နယ်ထိန်းရဲဦးဆောင်၍ လူငယ်များကို ပေါ်တာဆွဲဖမ်းဆီးနေ
စက်တင်ဘာ ၆ ရက်
ရန်ကုန်တိုင်း၊ လှိုင်သာယာမြို့နယ်ရှိ ဒဂုံဧရာအဝေးပြေးဝင်းအတွင်း ကားစပယ်ယာအဖြစ် လုပ်ကိုင်နေသော အသက် ၁၅ နှစ်အရွယ် မောင်ဖြိုးသီဟ ပျောက်ဆုံးနေကြောင်း မိခင်ဖြစ်သူက ရန်ကုန်ခေတ်သစ်သတင်းဌာနသို့ ပြောဆိုသည်။
မောင်ဖြိုးသီဟမှာ လှိုင်သာယာမြို့နယ်အတွင်း မိခင်ဖြစ်သူနှင့် နေထိုင်သူဖြစ်ပြီး အဝေးပြေးကားဂိတ်တွင် စပယ်ယာလုပ်ကိုင်ကာ ရရှိသည့် ဝင်ငွေများမှ မိခင်ဖြစ်သူကို လစဉ်လာရောက်ထောက်ပံ့ပေးနေသူဖြစ်ကြောင်း သိရသည်။
သို့သော် ဩဂုတ်လမှစတင်၍ မောင်ဖြိုးသီဟက နေအိမ်သို့ ငွေကြေးလာရောက်ပေးပို့ခြင်း မရှိတော့သဖြင့် မိခင်ဖြစ်သူက သားဖြစ်သူ အလုပ်လုပ်ကိုင်နေသည့် ဒဂုံဧရာအဝေးပြေးကားဂိတ်သို့ သွားရောက်စုံစမ်းခဲ့ရာမှ ပျောက်ဆုံးနေကြောင်း သိရှိခဲ့ရခြင်းဖြစ်သည်။
လက်ရှိအချိန်တွင် မိခင်ဖြစ်သူက မောင်ဖြိုးသီဟ သွားလာတတ်သည့် နေရာများနှင့် သိကျွမ်းသူများထံ လိုက်လံစုံစမ်းနေသော်လည်း ယနေ့အချိန်အထိ ပြန်လည်တွေ့ရှိခြင်းမရှိသေးကြောင်း သိရသည်။
“သားလေးက လတိုင်း သူစပယ်ယာလုပ်လို့ရတဲ့ ပိုက်ဆံကို လာပေးနေကြပါ။ ဩဂုတ်လပိုင်းကစပြီး လစာလာမပေးတော့လို့ သူအလုပ်လုပ်နေတဲ့ ဂိတ်ကို သွားမေးကြည့်တော့မှ ပျောက်နေမှန်းသိတာပါ။ အခုထိလည်း မတွေ့သေးပါဘူး။ ရဲစခန်းမှာတော့ လူပျောက်မှုဖွင့်ဖို့ လုပ်နေပါတယ်” ဟု မိခင်ဖြစ်သူက ပြောဆိုသည်။
အခြားတစ်ဖက်တွင်လည်း ရန်ကုန်တိုင်း၊ သာကေတမြို့နယ်အတွင်း နယ်ထိန်းရဲတစ်ဦး ဦးဆောင်ကာ လူငယ်များကို ပေါ်တာဆွဲဖမ်းဆီးခြင်းများ လုပ်ဆောင်နေပြီး ဖမ်းဆီးခံရသူများထံမှ ငွေကြေးညှစ်ယူမှုများရှိနေကြောင်း ဒေသခံများ၏ ပြောဆိုချက်များအရ သိရသည်။
သာကေတမြို့နယ်တွင် နယ်ထိန်းရဲ ခင်မောင်ဦး ဦးဆောင်သည့် အဖွဲ့က လူငယ်အများအပြားကို အသုံးပြုကာ နေ့ခင်းပိုင်းအချိန်များတွင် ကားများဖြင့် လှည့်လည်သွားလာပြီး လူငယ်များကို ပစ်မှတ်ထား ရှာဖွေဖမ်းဆီးနေကြောင်း သိရသည်။
မျက်မြင်တွေ့ရှိသူတစ်ဦးက ကားပေါ်တွင် လိုက်ပါလာသည့် လူငယ် ၄ ဦးမှ ၅ ဦးခန့်က ကားပေါ်မှဆင်းကာ လမ်းပေါ်ရှိ လူငယ်များကို လိုက်လံရှာဖွေခဲ့ပြီး ပစ်မှတ်ကို မတွေ့ရှိပါက ကားပေါ်သို့ ပြန်တက်ကာ အခြားမြို့နယ်များသို့ ဆက်လက်သွားလာ ပေါ်တာဆွဲ ဖမ်းဆီးနေကြောင်း ပြောဆိုသည်။
"နယ်ထိန်းရဲ ခင်မောင်ဦးနဲ့ အဖွဲ့က ဟွန်ဒါဖစ်ကား ကြည်ပြာရောင်နဲ့ စတေကာ အမည်းတွေကပ်ပြီး လူငယ်တွေကို နေ့ရော ညပါ သာကေတရော ရန်ကုန်မြို့ထဲပါ ပေါ်တာလိုက်ဆွဲနေတာ။ ကားမှတ်တိုင်တွေပါ ဝင်ဆွဲတာ" ဟု သာကေတမှ တော်လှန်ရေးကင်းထောက်သတင်းရင်းမြစ်က ရှင်းပြသည်။
ရန်ကုန်မြို့အတွင်း စစ်မှုထမ်းဥပဒေကို အကြောင်းပြု၍ လူငယ်များကို ဖမ်းဆီးခေါ်ဆောင်ခြင်း၊ ပေါ်တာဆွဲခြင်းနှင့် ဖမ်းဆီးပြီးနောက် ငွေကြေးတောင်းယူခြင်းဆိုင်ရာ ဖြစ်စဉ်များ မကြာခဏ ဖြစ်ပွားနေသဖြင့် လူငယ်များနှင့် မိသားစုဝင်များအကြား စိုးရိမ်ပူပန်မှုများ မြင့်တက်နေကြောင်း ရန်ကုန်မြို့မှ လူငယ်များ၏မိဘတချို့က ပြောဆိုကြသည်။
#KTM
#HlaingInfo
25
3
2September 6, 2026 1.3K 5
