ကြံ့ဖွတ်ညီလာခံတွင် ဗဟိုအလုပ်အမှုဆောင်အဖွဲ့သစ်နှင့် ပါတီဥက္ကဌနေရာကို ပြန်လည် ရွေးချယ်အတည်ပြုမည်ဖြစ်ပြီး မင်းအောင်လှိုင်၏ လူယုံ အောင်လင်းဒွေးနှင့်အဖွဲ့က အဓိကနေရာများရယူနိုင်ဟုဆို
စက်တင်ဘာလ ၄ ရက်
အာဏာသိမ်းစစ်တပ်လက်ဝေခံ ကြံ့ဖွတ်ပါတီက ကျင်းပမည့် ညီလာခံတွင် လက်ရှိဗဟိုအလုပ် အမှု ဆောင်အဖွဲ့ (CEC) ကို ဖျက်သိမ်းကာ အဖွဲ့အသစ်ကို ပြန်လည်ဖွဲ့စည်းရွေးချယ်မည်ဖြစ်ပြီး ပါတီဥက္ကဋ္ဌနေရာကိုလည်း CEC အဖွဲ့သစ်က ပြန်လည်အတည်ပြုရွေးချယ်မည်ဖြစ်ကြောင်း ကြံ့ခိုင်ရေးပါတီ သတင်းရင်းမြစ်များက ပြောဆိုသည်။
စက်တင်ဘာလ ၁၇ ရက်နေ့မှ စက်တင်ဘာလ ၁၉ ရက်နေ့အထိ ကျင်းပမည့် ကြံ့ဖွတ်ပါတီ၏ ညီလာခံတွင် အာဏာသိမ်းစစ်ခေါင်းဆောင် မင်းအောင်လှိုင်၏ လူယုံလည်းဖြစ်၊ လက်ရှိ အမည်ခံ အမျိုးသားလွှတ်တော်ဥက္ကဋ္ဌလည်းဖြစ်သူ အကြမ်းဖက် အောင်လင်းဒွေး ဦးဆောင်သော အငြိမ်းစားဗိုလ်ချုပ်များအဖွဲ့က ပါတီ၏ဗဟိုအလုပ်အမှုဆောင် အဖွဲ့သစ်တွင် ပါဝင်လာမည်ဖြစ်ပြီး ဗဟိုအလုပ်အမှု ဆောင်အဖွဲ့သစ်က ပါတီဥက္ကဋ္ဌ နေရာကို ပြန်လည် ရွေးချယ်အတည်ပြုမည်ဖြစ်ကြောင်း သိရှိရသည်။
"ပါတီစည်းမျဉ်းအရ ညီလာခံမှာ လက်ရှိ CEC တစ်ဖွဲ့လုံးက နုတ်ထွက်ပြီး CEC အဖွဲ့သစ်ကို ပြန်လည် ရွေးချယ်မယ်။ ဦးအောင်လင်းဒွေးက ပါတီရဲ့ အဓိက နေရာကို ယူမယ်လို့ သိရတယ်။ လက်ရှိ ဥက္ကဋ္ဌကိုတော့ ဦးခင်ရီကိုပဲ ဆက်ထားမယ်လို့လည်း သိရတယ်။ ဒါပေမယ့် CECဗဟိုအလုပ်အမှုဆောင်အဖွဲ့သစ်ကပဲ ပါတီဥက္ကဋ္ဌ ရာထူးကို ဘယ်သူ့ကို ထားမလဲဆိုတာကို ပြန်လည် အတည်ပြုပေးမှာဖြစ်တယ်" ဟု ဗဟိုကော်မတီဝင် ကြံ့ခိုင်ရေးပါတီသတင်းရင်းမြစ်က ပြောဆိုသည်။
ကြံ့ဖွတ်ပါတီ၏ CEC အဖွဲ့သစ်တွင် ပါဝင်ရန် ရေပန်းစားနေသူများတွင် အောင်လင်းဒွေး၊ သက်ပုံ၊ တေဇကျော်၊ စိုးတင့်နိုင်၊ မောင်မောင်အုန်း တို့၏ အမည်များပါဝင်နေပြီး အောင်လင်းဒွေးမှာ ပါတီ၏ အရေးကြီးဆုံးသော ပါတီအဆုံးအဖြတ် နေရာကို ရယူလာနိုင်ကြောင်း ပါတီသတင်းရင်းမြစ်က ဆိုသည်။
"ဦးအောင်လင်းဒွေးက ပါတီရဲ့ ဥက္ကဋ္ဌပြီးရင် အကြီးဆုံးဖြစ်တဲ့ ပူးတွဲ ဥက္ကဋ္ဌ (သို့မဟုတ်) ဒုတိယဥက္ကဋ္ဌ ၁ လိုနေရာမျိုး ယူမယ်လို့ တော်တော်ကျယ်ကျယ်ပြန့်ပြန့် သိထားကြတယ်။ CEC အဖွဲ့ထဲမှာလည်း အနည်းဆုံး လူသစ် ၉ ဦးလောက် ဝင်လာမယ်လို့ သိရတယ်။ လက်ရှိ လူဟောင်းတွေနဲ့ လူသစ်တွေ ရောမွှေပြီး ပြန်လည်ဖွဲ့စည်းမယ့် သဘောလို့ နားလည်ပါတယ်" ဟု အဆိုပါ ပါတီသတင်းရင်းမြစ်က ပြောဆိုသည်။
ယင်းအပြင် ကြံ့ဖွတ်ပါတီအတွင်း လက်ရှိတာ၀န်ထမ်းဆောင်နေသော ဗဟိုအလုပ်အမှုဆောင်အဖွဲ့ဝင်တချို့နှင့် ဒုတိယဥက္ကဋ္ဌ တချို့မှာလည်း ပါတီမှ အနားယူမည်ဟု တရားဝင် အသိပေးထားပြီးဖြစ်ကြောင်း၊ ပါတီ၏ လက်ရှိ အတွင်းရေးမှူး သောင်းအေး၏ နေရာမှာလည်း အပြောင်းအလဲဖြစ်နိုင်ကြောင်း သိရှိရသည်။
ကြံ့ဖွတ်ပါတီ၏ ဗဟိုကော်မတီတွင်လည်း မျက်နှာသစ် ဗဟိုကော်မတီဝင်များဖြင့် ပြောင်းလဲ ဖွဲ့စည်းမည်ဖြစ်ပြီး စစ်တပ်မှ စေလွှတ်ထားသော ဗိုလ်မှူးကြီးဟောင်း၊ ဒုတိယဗိုလ်မှူး ကြီးဟောင်း တချို့မှာလည်း ဗဟိုကော်မတီတွင် ပါဝင်လာမည်ဖြစ်ကြောင်း သိရှိရသည်။
#KTM
#HlaingInfo
46
4
1September 4, 2026 2K 4
