АНА
Руўхый гөззаллығың әлемге үлги,
Жипек минезиңе мегзетер гүлди,
Қәдемиң басылған гүллән мәнзилди,
Мийрим нурларына толтырдың, ана!
Дүнья муңаяды аўырса жаның,
Дәртиме даўадур пәк алақаның,
Жүрекке қондырмай нәкаслық шаңын,
Ҳадаллық шәменин жараттың, ана.
Қуўат болады деп қосып набатты,
Сүтке туўрап берген нанларың татлы,
Жүрек меҳриң бар байлықтан қымбатлы,
Билсем, ең дәўлетли инсансыз, ана!
Атақ-мәртебени күтпедиң ҳасла,
Баўырманлық тажын кийдиңиз басқа,
Көзиңизден тамған бир тамшы жасқа,
Айыплымыз бизлер, кешириң, ана!
Жүрдиң балаң ушын жуўырып-желип,
Етсе де орынсыз қанша еркелик,
Әзиз байрамыңда жаныңа келип,
Унатқан гүлиңди сыйлайын, Ана!
🪄Бахытлы Сарыбаев
https://t.me/ibratli_sozler
28
16
2
1
1August 29, 2026 3.5K 7 29
