⭕️ مجیدین ناغێللاری «کتاب وورغونو»
✍️ یازان: هوشنگ مرادی کرمانی
🔷 تۆرکجهیه چئویرن: #سحر_خیاوی
بیرینجی بؤلۆم
مَشه اسداله بیر واراق کتابدان جێردی. واراقلا بیر پاکات جورلادێ. ایچینه تنبَکی تؤکدۆ. تَرزیده چکدی. آغزێـنی باغلایێب، الیمه وئردی. قند، چای، سارێکؤک ده آلمێشدیم. مشهدی چُرتکه سالێب پولونو آلدێ.
ائوه چاتجاغێن بیبی کۆچه باشێنداکی باققالدان آلدێغیم شئیلری مندن آلدێ. پاکاتلارێ بوْشالتدێ. کتابدان جێریلمیش واراقلارێ زیبیل دوْلونا آتماق اۆچون منه وئردی. یای تعطیلیایدی. دۆز باشلێ بیر ایشیم یوْخودو! باش قال ائلهمک اۆچون بیر گۆشهده اوْتوروب، تنبکی، قند، چای و سارێکؤک بۆکولن واراقلارێ اوْخوماغا باشلادێـم.
سکگیز آردێجیل صفحهیدی. اوْنبئشدن ایڲیرمی ایکینجی صفحهیهجن. اؤنجه سارێکؤکۆن سارێلارینی و قندین آغلارێـنی حوصلهیله صفحهلرین اۆستوندن پیلهدیم. سوْنرا اوْخوماغا باشلادێم. نه قدر ساده، گؤزل و چکیجی یازمێشدی. هر سکگیز صفحهنی اوْخودوم. دوْغروسو بو واختاجان درس کتابلارێندان باشقا کتاب اوْخومامێشدیم.
او سکگیز صفحه، کتابێـن تامێـنی منه دادێزدیردی. امّا شانسێمدان ناغێل دۆز شیرین و هیجانلی یئرینده قێریلدی!
ناغێلدا بیر یئنییئتمه اوْغلان آتاسێندان کؤتک یئمیشدی. ائولریندن کۆسوب قاچمێشدی. امّا بیلمیردی هایانا گئتسین! هیجانلی سوژهیدی. او اوْغلان هارا گئتدی و باشێنا نه گلدیڲینی بیلمک ایستیردیم. لاپدان مشه اسدالهێن یانێـنا گئتمک فیکریمدن کئچدی. هر جۆر اوْلسا گرک کتابێـن آردێـنی آلام، او اوْغلانێن باشێنا نه گلدیڲینی بیلم. اودور کی، گۆلله کیمی کۆچهمیزین باشێنداکی باققال توکانێنا قاچدێم. تؤوشهیه – تؤوشهیه دئدیم:
- سلام. او کتابێـن آردێ هایاندادێر؟ اوْنو منه وئرین. اوْخویوب قایتارارام. سوْنرا هر نمنه ایستیرسینیز واراقلارێـنا بۆکون.
سؤزۆم اثرلی اوْلسون دییه، چوْخ ادبلی دانێشیردیم. مشه اسداله قاشلارێـنی قالدێـریب، تعجۆبلو سوْروشدو:
- هانسێ کتاب جانێـم؟! من کتاب ساتمێـرام.
بوْینومو اڲیب، مظلوم آداملارێن قیافهسینی توتدوم:
- «سنی عزیز بالالارێنین جانێ، او نئچه واراغێنی جێریب، ایچینه تنبکی، قند و چای تؤکدۆڲون کتابێـن قالانێـنی نئیلهییبسن؟
کیشی دیلینی دوْداقلارێ اۆسته چکیب، دئدی:
- کتابێـن قالانێـنی نئینیرسن؟
نظرین اؤزۆمه چکمک اۆچون تَرزیسینین بیر گؤزۆنو گؤتۆروب، قند توْزلارێـنی چؤله تؤکدۆم و ایچینی کؤینَـڲیمین قوْلو ایله تمیز سیلیب، یئرینه قوْیدوم. دئدیم:
- خیدمتینه عرض ائلهدیم دای. او کتابێـن آردێـنی اوْخوماق ایستیرم. گؤرۆم او ائودن قاچان اوْغلانێـن باشێنا نه گلیب؟
مشه اسداله ساققالێـنی قاشێییب، پێـققاپیق گۆلمـڲه باشلادێ. دیشی اوْلمادێغینا دوزلو گۆلوردو. گۆله – گۆله دئدی:
- گئت جانێـم! قوْی ایشیمه یئتیشیم. او کتاب دردینه دَڲمـز.
دئدیم:
- باخ، او کتابێ سندن آلارام. قورتاران مشق دفترلریمی ده مۆفتهسینه سنه وئرهرم. یاخشێ اوْلدو؟
دئدی:
- من کتاب ساتان دڲیلم. بو کتابلارا تنبکی، نوْخود، لوبیا، پئندیر، سارێکؤک تؤکۆب، مۆشترییه وئریرم. دۆشوندون؟ گئت جانێـم. گئت!
ایشی چتین توتوردو. امّا ال چکمییهجڲم. یئنه اوْنو یومشالدام دئیه، تَرزینین او بیری گؤزۆنو گؤتۆردوم. ایچینده آق توْز واریدی. شیرینکارلێـق ائلهییب، ائله کیشینین اؤنۆنده تَرزینی پیلهدیم. توْزلار دۆز گئدیب کیشینین گؤزلرینه دوْلدو. دئدی:
- پاه آتوْونان اوشاق!
گؤزلرینی اوْووردێ. اوقاتێ زهریمار اوْلموشدو. زَهریم یارێـلدی. کیشی مێریلدانیردی:
- مگر عاغلێن یوْخدومو اوشاق؟! ترزینین گؤزۆنده دۇز واریدی. گؤزلریم چێخدی. نااینصاف مثلاً منه خدمت ائلهدین؟!
شیرینکارلێـق ائلهییردیم کتابێ آلام. اما وضع داها خارابلاشدێ. عۆذور دیلهمک ایستهدیم. اما قورو عۆذورون فایداسێ یوْخودو. کیشینین گؤزلری چێخیردی. اؤز – اؤزۆمه دئدیم: «قاچێم سو گتیریم گؤزلرین یوسون. بلکه گۆناهێمدان کئچدی».
یاخشێ فیکر ایدی. قاچدێم ائویمیزدن بیر بؤیۆک میس کاسادا سو گتیردیم. دئدیم:
- مش اسداله منی باغێشلا.
گۆلدورم دئیه دئدیم:
- عوضینده گؤزلرین دوزلو اوْلوب.
فیکریمجه ایستیاوْت دا دوزا قارێشمیشدی...
هله مزهلی دانێشیردیم! کیشی آجێقلی، سویولا دوْلو کاسایا بیر دۆرتمه ووردو. کاسا الیمدن هاوایا گئدیب، سویو بۆتون قند تلیسی اۆستونه تؤکۆلدو. کیشی گؤزۆنون گؤینهمهسین ده اونوتدو.
#آردێ_گلن_سایێـدا...
@MuncuqAz
https://t.me/Sancaq_media/8411
