⭕️ آنا منی اوشاق یاشات
✍️ شاعر: #لیلا_قلیزاده
آنا، منیم توت الیـمدن
دانێش منله اؤز دیلیمدن
اوْخشاسانا هئی تئلیمدن
آنا، منی اوشاق یاشات
گئجه گۆندوز یانێمدا قال
یاتێـر منی، قێچینا سال
شیرین شیرین لایلامێ چال
آنا، منی اوشاق یاشات
منی آلسانا باغرێـنا
آپار عئینالی داغێـنا
گئچیم سوْلونا، ساغێنا
آنا، منی اوشاق یاشات
محبّتین ایستی یووام
باخێشلارین ائدر دوعام
هم سویومسان، هم ده هاوام
آنا، منی اوشاق یاشات
پول وئرمه هئی اوْیونجاغا
پارکا آپـار اوْیـناماغا
مینیم اوْردا سالێنجاغا
آنا، منی اوشاق یاشات
سنله آنا چایا گئدک
بیرده گئدَک آغاج اَکک
قوملاردان بیر قالا تیکک
آنا، منی اوشاق یاشات
موْبایلێنی بیر یانا آت
دستمال گؤتۆر دالێنا چات
باشێنی قوْی یانێمدا یات
آنا، منی اوشاق یاشات
منـی آپار آنا داغا
گئدک چیچکلی یایلاغا
میوه درمک اۆچون باغا
آنا منی اوشاق یاشات
آنا منه ناغێـل اوْخو
گلهجـڲیم گؤزل توْخو
توتسون منی شیرین یوخو
منی آنا اوشاق یاشات
۱۴۰۵/۵/۲۵
@MuncuqAz
https://t.me/Sancaq_media/8395
Telegram
Sancaq Media
@MuncuqAz
5September 1, 2026 237 6
