⭕️ قێـزیل اینک
✍️ یازان: #غلامرضا_گلنظری
بیرینجی بؤلۆم
اوشاقلێـقدا هر دفعه چؤله گئدهنده، آنام سئوگی و محبتله منه تاپشێراردی:
- آی بالا! قێـزیل اینـڲه گؤز – قولاق اوْل. آج قالماسێن. هم بوْل سۆت وئریر، هم ده بالاسێـنی دوْیوزدورمالێدیر. بو عادّی بیر اینک دڲیل؛ بیر انسان کیمی عقلی، شعورو وار، هر شئیی باشا دۆشور.
او واختلار من اوشاقلێـق عالمینده آنامێن سؤزلرینین معناسێن چوْخ دا باشا دۆشموردوم. امّا بیر گۆن، حقیقتی گؤزلریمله گؤردۆم.
چوْخ اۆرکدن سئودیڲیم آغ ائششڲیمیز قوْنشوموزون بوْز ائششڲی ایله توتوشدولار. بوْز ائششک، یازێـق حیوانێن بوْغازێـنی ائله سێخمیشدی کی، نفَس آلا بیلمهییب، ال – آیاق چالێـردی. هله هئچ کس ده داده چاتماغا فرصتی یوْخ ایدی کی، قێـزیل اینک، اێلدیریم کیمی یئتیشدی، بوْز ائششڲین بؤیرۆنه ائله بیر بوینوز ووردو کی، اڲر پالانێ اوْلماسایدێ، قارنێـنی جێریب، سؤکردی.
او گۆن یاواش – یاواش آنامێن سؤزلرینه ایناندێم. «قێـزیل اینک» تکجه بیر اینک دڲیلدی؛ عائلهمیزین و سۆرونون ده، بیر قراوول ایدی.
همیشه سۆرونون قاباغێـندا گئدردی، بیر دفعه ده اوْلسون، اؤزگهنین أکینینه گیرمزدی. بۆتون یوْللارێ، تارلالارێن* سرحدینی بیر چوْخ انسانلاردان یاخشێ تانێـیاردی.
ایکی هفته ایدی کی، سۆرو «اوژباغ»دا اوْتلايێـردی. بیر سحر آتام سؤیلهدیڲینه گؤره، اینکلری «زێـغ بؤوۆر» تارلاسێنا آپاردێم. هله اوْن دقیقه کئچمهمیشدی کی، اوزاقدان اوزون بیر «ماما» سسی ائشیتدیم. باشێمی قالدێریب باخدێم؛ قێـزیل اینک، بۆتون وارگۆجو ایله بیزه طرف قاچێردی.
یئتیشهندن سوْنرا، بیربیر بۆتون اینکلری ایڲلهییب، یالادێ! سانکی اوْنلاردان آیرێ قالدێغینا گؤره دارێخمیشدی. سوْنرا منه یاناشدێ، باشێنی آشاغێ سالێب، یاواشجا «ماما» دئدی! ائله بیل دئییردی: - «گئج گلدیڲیم اۆچون منی باغێشلا.»
سوْنرالار رحمتلیک «رحیم امکانی» دئدی:
- او سحر « قێـزیل اینک»، هر گۆن اوْلدوغو کیمی رایراست «اوژباغ»آ گئدیب، بیر نئچه دقیقه سۆرونو گؤزلهییب، امّا سۆرونون گلمهمهسین بیلینجه، درحال قایێـدیب گلدیڲی یوْلدان «زێـغ بؤوۆر»ه سارێ وارگۆجوله قاچێب، اؤزۆنو اوْرایا چاتدێریب.
گۆناوْرتا ائوه قایێـداندا، آنام باشێنی تومارلامایێنجا و بیر – ایکی بایاتێ اوْخومايێنجا، طؤیلهیه آیاق قوْیمادێ:
جانێـم آی قێـزیل اینک
بسدی آز ازیل اینک
ول اوْلسون سۆت، قاتێـغین
عؤمر ائیله یۆز ایل اینک
گلدی قێـزیل اینـڲیم
آز دای ازیل اینـڲیم
سنه وئریم گؤل خشه
یئمه خزل اینـڲیم
امّا بو خوْش گۆنلر چوْخ اوزون سۆرمهدی. قێـزیل اینک بیردن - بیره خستهلندی. آرتێـق یئردن دورا بیلمهییردی. آنام غم ایچینده بیر آن دا یانێـندان آیرێلماییردی. بیلدیڲی هرداوا – درمانی یوْخلادی.* «تۆرکه داوا» و درمان بیتگیلرینده ماهر اوْلان قوْنشوموز، «شوکت خالا»دان دا یاردێم ایستهدی.
شوکت خانێـم دئدی:
- اۆچ گۆن آردێـجیل «گؤی چوْغان»* قاینادێب، سویون ایچسه، یاخشێ اوْلار.
امّا خستهلیک گۆندن – گۆنه آغێرلاشیردی.
🔶 آچێـقلامالار؛
تارلا: زمی، مزرعه
یوْخلاماق: سێناماق، امتحان کردن
گؤی چوْغان: گیاهی است دارویی که در "تۆرکه داوا" برای مداوای عفونتهای داخلی و خارجی مورد استفاده قرار میگیرد. اَشنا، اَشنه
#آردێ_گلن_سایێـدا...
@MuncuaAZ
https://t.me/Sancaq_media/8409
Telegram
Sancaq Media
@MuncuqAz
3
1September 5, 2026 182 4
