#استشارات
سيناريو متكرر
تكلمني البنت بعد ما اتخطبت و تقولي أنا حاسة إني مترددة مش عارفة اكمل و لا لا
طيب ايه مشكلة خطيبك؟
تقولي مفيش فيه أي مشكلة خالص
المشكلة عندي أنا
جميل
ايه مشكلتك؟؟
مترددة في شكله
مفيش قبول يعني ؟
لا فيه قبول
أومال ايه يا غالية 🤔
من هنا ل هنا
نكتشف ايه بقى ؟؟!
إن هي كان في دماغها مواصفات شكلية معينة
دماغها اتبرمج عليها
على سبيل المثال
هي بقى لها ستلاف سنة مواصفات فتى أحلامها إنه يكون طويل
فيتقدم لها واحد فيه كل المميزات و فيه قبول مبدئي شكليا مناسب لكن قصير مع ذلك تتخطب له
و الخطوبة ماشية زي الفل جدًا
و الراجل ما خرجش منه العيب و حرفيا فيه كل ما تتمناه أي بنت من تعامل طيب و أخلاق و سوية نفسية ، حاجة عشرة على عشرة .
لكن هي من جواها مترددة مش مرتاحة 🙂
لا عايزة تسيبه و في نفس الوقت مترددة تكمل
دا سببه ايه عشان نتلاشى الوقوع فيه ؟؟
دا سببه حاجة من اتنين
إما شيطان عايز يخرب عليك و محتاجة ترقي نفسك ، و غالبا الشيطان هيبقى برئ في النقطة دي 😁
أو إن دماغك اتبرمجت على الوصف اللي في دماغك فقلبك مش متقبل شكل غير اللي في دماغك ، و عندك شوية عقل و شيى من الحكمة بيقولوا لك المواصفات الشكلية الوهمية اللي في دماغك مش أساس خالص و اللي هيدوم بعد الزواج التعامل الطيب و التوافق في التفكير
و أهم حاجة إنه فيه قبول دا الأساس
و مادام القبول موجود خلاص يبقى نكمل .
فيه بنات بيكون عندها مرونة إنها تتقبل دا و تتخلى عن المواصفات اللي في دماغها سابقا و تحكم عقلها أكتر و فعلا تكمل و تسعد في زواجها جدًا و تضحك كمان على تفكيرها السابق و إنها لو كانت استجابت لفكرة إنها تفسخ لمجرد عدم ارتياح بسيط فيما يخص الشكل كانت ندمت أشد الندم.
و أنا أثناء الاستشارة لما بأحس من شخصية البنت إنها تقدر تكون مرنة في النقطة دي بأشجعها إنها تطول بالها شوية و تكمل و تركز على النقاط الإيجابية الكتييير الموجودة في الشخص .
و فيه بنات بأقولها لا ما تكمليش عشان لو كملتي هتظلميه و تظلمي نفسك معاه
و هتفضلي شايفة الجزئية دي نقص فيه مش هتعرفي تتقبليها، و دا بيظهر لي من شخصيتها
بتكون شخصية البنت فيها جمود
مفيش مرونة .
و قابلت برده بنوتة كده و صارحتها بالكلام دا و عجبتني جدًا إنها في نهاية الجلسة قالت لي إنها عايزة تكون مرنة أكتر و تنمي المهارة دي و تحاول تتأقلم خصوصا و إن كمان فيه تجارب كتير لبنات كانوا كده عندهم تردد عشان بعض الأمور الشكلية في الخُطاب لكن بعد الزواج فعليا دا مالوش قيمة خالص .
اللي بيفرق حرفيا مع المرأة في الزوج إنه يكون جدع و شهم و أصيل و شخصيته قوية و طيب في نفس الوقت و تعامله معاها جميل
أما بقى أنا عايزاه طويل و مفتول العضلات
ف مع أول بوكس هتيجي تعيطي لي تاني يا فوزية 🙄🙄 و ساعتها هاقول كان فين عقلك
و مهم جدًا ناخد بالنا من مسألة غض البصر و نأكد عليها ، و إياك و المقارنات .
#وعي_نفسي
#سارة_العبسي
✍ أخصائية نفسية بمنهجية شرعية
متاح استشارات أونلاين للتواصل واتس فقط
01039617914