من الحاجات الجميلة اللي الدكتور نبه عليها هو تصحيح مفهوم الإنجاز وإن الإنجاز مش شرط حاجات ضخمة..
حقيقي بجد كتير من الناس بقت تحصر مفاهيم الإنجاز في الأشياء الكبيرة الظاهرة وبس، والسوشيال ميديا بتغذي دا بردو بشكل كبير،
ف بقى مفهوم الإنجاز محصور في حاجات كبيرة، زي قراءة الكتب زي إنك تشتري حاجة كبيرة وغيره من الإنجازات الكبيرة الملحوظة..
وإحنا مش بنقول أن دي مش انجازات، بالعكس هي انجازات جميلة بردو،
بس حصر إن دا هو الإنجاز فقط، ف دا غلط.
الانجاز ممكن أن حد يشيل طوبة في الطريق عشان متأذيش حد،
الانجاز ممكن يكون زي السيدة اللي كانت في وقت النبي عليه افضل الصلاة والسلام وكانت بتزيل الحصى الصغير من المسجد (ممكن تبحثوا عن قصتها وتعرفوها) ف دا إنجاز وثغر
الإنجاز ممكن يكون في انك صليت ال ٥ صلوات بتوعك وحافظت على اذكارك .
ممكن يكون في انك تقومي تعملي لجوزك كباية شاي.
ممكن يكون في طاعتك لجوزك.
ممكن يكون في اهتمامك بنفسك.
ممكن يكون في اهتمامك بشرب المية.
ممكن يكون في مجاهدة على مدار اليوم انك متسمعش أغاني أو متشتمش.
لسى كنت بقول لصحابي امبارح غسيلكم للمواعين دا انجاز والله.
وهكذا
لو بصينا في أمور حياتنا هنلاقي أنها مليانه انجازات كتير جدا..
ف مهم جدا تصحح مفهوم الإنجاز عندك وبلاش تضيق الدنيا على نفسك وتحصر الإنجاز في انك تنزل بوست مع نهاية السنة وتقول دا انا قرأت ٥٠ كتاب..
إحنا كبشر بنحب شعور الانجاز جدا جدا،
ف لما إنت توسع مفهوم الإنجاز هتقدر تشوف في كل فعل صغير إنجاز عادي،
ف مش هتبقى بتثقل على نفسك وبتحصرها انها عشان تحس بالانجاز لازم تصلي طول الليل، لازم تقرأ خمس اجزاء في اليوم، لازم تقرأ عشرين صفحة، ولازم تنضفي البيت كله انهاردة،
ف لما بتحرر نفسك من المفاهيم دي بتقدر تشوف إن ابسط الاشياء هي إنجاز،
ركعة الوتر بالنسبالك إنجاز،
صلاتك على النبي عليه افضل الصلاة والسلام عشر مرات ف دا إنجاز،
قرأتك صفحة واحدة من كتاب معين ف دا انجاز.
وهيبقى حتى اليوم اللي صحتك مش اد كدا بردو قادر تشوف انك أنجزت فيه بداية من حفاظك على صلواتك ل ابتسامتك في وجه أهلك ل اي مساعدة بسيطة منك لأهلك أو لأي حد غريب وهكذا..
ومهم بردو عشان متحصرش اللي قدامك كمان، يعني احنا مش بس بنتكلم عليك ولكن بردو بنتكلم عن اللي حوليك.
ونقدر نضرب مثل في الجزئية دي،
الحركة الشهيرة بتاعت الأمهات لما يشوفوك قاعد كدا مش بتعمل حاجة ف يقولوا لك، انت قاعد كدا ليه ما تقوم تشوفلك حاجة تعملها بدل ما انت قاعد فاضي كدا،
مع انك ممكن تكون لسى مخلص حاجات عادي حتى لو بسيطة، بس للاسف لان نظرة المجتمع بتحصر الانجاز في الحاجات الكبيرة جدا ف مش بتقدر تشوف إن الحاجات البسيطة اللي في تفاصيل يومنا دي انجاز.
فمهم جدا نصلح نظرتنا عشان يبقى عندنا وعي ومحدش يأثر علينا.
وعشان كمان نظرتك لشريك حياتك وتعليمك دا لاولادك،
بعض البنات بالنسبالها جوزها اللي بيشتغل وبس كدا دا مش إنجاز،
ازاي يعني يبقى بيشتغل ومش بيعمل حاجة غير شغله يعني، ازاي مش بيقرأ كتب ولا بيسمع محاضرات ولا مكسر الدنيا وبيعمل انجازات جامدة كدا زي اللي اسمع عنها.
مع انها لو ركزت في التفاصيل هتلاقي جوزها بيعمل انجازات عادي،
واهم إنجاز أنه مكفي حاجتها، دي مش حاجة سهلة اصلا وانه بيخرج يوميا يشتغل ويهتم بشغله وسط المنافسات اللي بيشوفها حوليه من بقيت الرجال في مجاله والضغط بتاع الشغل،
الانجاز في أنه محافظ على صلواته،
الانجاز أنه ابتسم في وجهك قبل ما يخرج على شغله، إلخ...
ف حقيقي مهم جدا جدا تصلحوا مفاهيم الانجاز عندكم وتحرر عقلكم من مفاهيم الانجاز الضيقة وحصرها في حاجات معينه،
لان زي ما قولت إحنا كبشر بنحب شعور الانجاز جدا لانه بيضرب في هرمون الدوبامين.
ف لما توسع نظرتك وتشوف كل فعل بتعمله صغير هو إنجاز وتقدر تاخد عليه نيه ف يبقى في عداد حسنات شغال، دا بيفرق في نفسيتك جدا وبيهدي دماغك من الدوشة..
