ከሕገ-ወጥ ስደት ወደ ሕጋዊ የስራ ስምሪት በመስጠት ዜጎች የተሳካ የስራ እድል ተጠቃሚ እንዲሆኑ በየደረጃው የሚገኙ ተቋማት በትኩረት መስራት ይገባቸዋል፦አቶ ሁሴን ሱነሞ
16/2018 ስልጤ ዞን ኮሙኒኬሽን
በማዕከላዊ ኢትዮጵያ ክልል መንግስት በስልጤ ዞን የውጭ ሀገር ስራ ስምርት የ2019 ዕቅድ ማስፈፀሚያ አቅጣጫና የንቅናቄ መድረክ አካሄዷል።
የስልጤ ዞን ብልፅግና ፓርቲ የፖለቲካና ሪዕዮተ አለም ዘርፍ ኃላፊ አቶ ሁሴን ሱነሞ የሰው ህይወት ላይ የሚደረገው ህገ-ወጥ የሰዎች ዝውውር ከምንም በላይ ትኩረት የሚሻ ጉዳይ መሆኑ ገሌፀው ይህ ስራ በትርፍ ጊዜ የሚሰራ ሳይሆን የሰውን ህይወት የሚታደግ ትኩረት ይፈልጋል ብለዋል።
በቀጣይ ትኩረት ከተሰጠባቸው ጉዳዮች መካከል የአመለካከት ለውጥ ቀዳሚው ሲሆን ወጣቶችና ሴቶች በአገር ውስጥ ሰርቶ የመለወጥ ባህል እንዲያዳብሩ በሰፊው ይሰራል ሲሉም አቶ ሁሴን ገልፀዋል።
ተጠያቂነትን ከማስፈን አኳያ በህገ-ወጥ ደላሎች ላይ የተጀመረው እርምጃ ተጠናክሮ እንደሚቀጥል ያነሱት ኃላፊው በማንኛውም ደረጃ የሚገኝ የመንግስት ስራ አስፈጻሚም ይሁን ደላላ ለህዝብ ጥቅም እንቅፋት ሆኖ ከተገኘ ተጠያቂ እንደሚሆን አስገንዝበዋል።
የስራ እድል ፈጠራን ለማሳደግ የዲጂታል አሰራሮችን መጠቀም፣ የባዮሜትሪክስ ምዝገባን ማጠናከርና ውጤታማ የሆኑ ኢንተርፕራይዞችን በማስተዋወቅ የወጣቶችን የስራ ተነሳሽነት ማሳደግ እንደሚገባ አቅጣጫ ተቀምጧል።
የስልጤ ዞን ኢንተርፒራይዝና ስራ እድል ፈጠራ መምሪያ ኃላፊ አቶ አብዱረህማን ወርቅቾ በዞኑ የሚስተዋለውን ከፍተኛ የሕገ-ወጥ ስደት ችግር ለመቅረፍና ዜጎችን በሕጋዊ መንገድ ወደ ውጭ ሀገር ለስራ ለማሰማራት የሚያስችል ሰፊ ንቅናቄ መጀመሩን ተናግረዋል።
ዜጎች በሕጋዊ መንገድ ተወዳዳሪ ሆነው እንዲሰማሩ ለማድረግ የባዮሜትሪክ መረጃ እና የሌበር አይዲ ምዝገባ ወሳኝ ነው ሲሉም አቶ አብዱረህማን አስገንዝበዋል።
ይህ መረጃ በሀገር አቀፍ ደረጃ ያለውን የስራ አጥነት መጠን ለመለካት እና ዲጂታላይዜሽንን ለማፋጠን እንደ ማክሮ-ኢኮኖሚክስ አመላካችነት ያገለግላል ብለዋል።
ወደ ውጭ ሀገር ለስራ ለሚሄዱ ዜጎች ኮሌጆች የሥልጠና ጥራትን እንዲጠብቁና ደረጃውን የጠበቀ የምስክር ወረቀት ብቻ እንዲሰጡ አሳስበዋል።
የስልጤ ዞን ቴክኒክና ሙያ ትምህርት ስልጠና መምሪያ ኃላፊ አቶ ፈድሉ ከድር እድሜያቸው ያልደረሱ ህፃናት በውጭ ሀገር የስራ ስምሪት ስልጠና እንዲሳተፋ መፍቀድ ተገቢ ባለመሆኑ በየደረጃው መረጃ የሚሰጡ ተቋማትም ይሁኑ ሙያተኞች ከድርጊታቸው ሊታቀቡ ይገባል ብለዋል።
ለዜጎች መታወቂየ ከመስጠት ጀምሮ እስከ ታች ባለው መዋቅር ጠንካራ ክትትል የሚደረግበት አሰራር በመኖሩ ይህንን አጠናክሮ ማስቀጠል ይገባል ብለዋል።
ህገ ወጥ ደላሎች ዘርፉን እየተፈታተኑት መሆኑን የጠቀሱት አቶ ፈድሉ ግንዛቤ ከመፍጠር ጀምሮ ሁሉም ባለድርሻ አካላት በቅንጅት መስራት እንደሚጠበቅባቸው ተናግረዋል።
ትክክለኛና ህጋዊ ኤጀንሲዎች በቅርብ መኖር ይገባቸዋል ያሉት አቶ ፈድሉ በየደረጃው በዚህ ልክ መሰራት እንዳለባቸው አብራርተዋል።
የዜጎችን የመረጃ አያየዝ ከምዝገባ ጀምሮ ትክክለኛ ህደት እንዲኖረው ኮሌጆችም በትኩረት መስራት ይገባቸዋል ብለዋል።
የመድረኩ ተሳታፊዎች በሰጡት አስተያየት የውጭ ሀገር የስራ ስምሪት ልዩ ትኩረት የሚሻ ጉዳይ በመሆኑ ተቋማት በቅንጅት መስራት ይገባቸዋል ብለዋል።