እርሱ የወንጌልን ዘር በምድር ላይ በትኖ መቶ ፍሬ ያፈራ፣ እልፍ አእላፍ መነኮሳትን ወልዶ ለሰማይ መንግሥት ያጫ፣ የጽድቅን መንገድ ያስ አስተማረ የማይደፈርስ የሕይወት ምንጭ ነው። ጻድቁ አባታችን ተክለ ሃይማኖት እስከ ዘላለም የሚያበራ የሃይማኖት ዐምድ፣ ለሀገራችን የተሰጠ የታመነ መከታ፣ ከአምላክ ፊት ሁልጊዜ የሚቆም የፍጹም ምልጃ መዓዛ ነው። እንደ አብርሃም በሃይማኖት፣ እንደ ብርሃነ ዓለም ጳውሎስ በወንጌል ወልዶ ያሳደጋቸው አእላፋት ልጆች በምድር ላይ የክርስቶስን መዓዛ ይበትናሉ፤ በሰማይም ከአባታቸው ጋር በብርሃን ዙፋን ፊት ይቆማሉ። ተክለ ሃይማኖት አልወለደም የሚል ቢኖር፣ በደብረ ሊባኖስና በዓለም ዙሪያ የሚነደውን የመንፈሳውያን ልጆቹን እሳትና ቅድስና ይመልከት። ይህ አባትነት የድካም ሳይሆን የክብር፣ የጊዜያዊ ሳይሆን የዘላለም፣ የሕያዋን ደስታና የቅዱሳን ማኅበር የምስክርነት ዘውድ ነው።
ለተክለ ሃይማኖት ምስክሮች መሆናችን፣ እርሱ የተከላትን እውነተኛ ሃይማኖት በልባችን ይዘን በመገኘታችን ነው። እርሱ የተጋደለለትን የወንጌል እውነት በመጠበቅ፣ የመላእክቱን አኗኗር በምድር ያሳየበትን ፍጹም ቅድስና በማደነቅና እርሱን አባት አድርጎ በመከተል እኛ የሥራው ውጤቶች፣ የጸሎቱ ፍሬዎች፣ የቅድስናውም ሕያው አብነቶች ነን። ተክለ ሃይማኖት በምድር የኖረ ሰማያዊ መልአክ፣ ለዓለም የተሰጠ የማይጠፋ መብራት መሆኑን እኛ በእምነት፣ በምግባርና በነፍሳችን መታደስ እንመሰክራለን፤ ምስክርነታችንም በምድር ብቻ ሳይሆን በሰማያዊው ዙፋን ፊት የጸና ነው።
የአባታችን የጸሎት ድልድይ አይሰበርም፤ ምልጃው ከአምላክ ዙፋን ፊት ባዶውን አይመለስም። በንስሐ ወደ እርሱ የተጠጉትን እጁን ዘርግቶ የሚቀበል፣ ከአደጋና ከጥፋት የሚሰውር፣ ለኢትዮጵያም የታመነ የጸሎት ግንብ የሆነ ጻድቅ መሆኑን እንመሰክራለን። እኛ የምስክርነቱን ማኅተም በልባችን የያዝን፣ በበረከቱ የምንኖር፣ በእምነቱም የጸናን የመንፈስ ቅዱስ ምስክሮች ነን። ይህ አባትነት በምድር ያበበ፣ በሰማይም ያፈራ፣ ለዘላለም የማይጠፋ የክብርና የቅድስና ዘውድ ነው።
ጻድቁ አባታችን በምድር ላይ በመላእክት ኑሮ የኖረ፣ በሰማይም ከሱራፌልና ከኪሩቤል ጋር አምላኩን የሚያመሰግን ሰማያዊ መልአክ ነው። በሥጋ ምድር ላይ እያለ የመላእክትን ክንፍ የተጎናጸፈ፣ በእግዚአብሔር ዙፋን ፊት ማዕጠንቱን ይዞ የሚቆም ካህን መሆኑን እንመሰክራለን። የእርሱ አባትነት የዘላለም፣ የጽድቅ መንገዱ የማይጠፋ፣ የጸጋውም ፍሬ የማይደርቅ ሕያው መንፈሳዊ ስጦታ ነው።
የእኛ ምስክርነት በቃል የሚነገረ ተራ ወሬ ሳይሆን፣ በሕይወትና በመንፈስ የሚኖር ሕያው እውነት ነው። ተክለ ሃይማኖት በቆመበት የሰባት ዓመታት የጸሎት ዐምድ ላይ ያፈሰሰው የደሙ ዘር፣ ዛሬ በዓለም ዙሪያ በሺዎች በሚቆጠሩ ገዳማትና ምዕመናን ልብ ውስጥ በቅድስና እሳትነት ይነዳል። እርሱ በእንባና በስግደት የወለዳቸው የመንፈስ ልጆች በሃይማኖት ጽናት፣ በምግባር አበቦችና በጸሎት መዓዛ የታወቁ መሆናቸው የአባትነቱን ታላቅነትና የማይደፈርስ የጸጋ ሥሩን ያረጋግጣሉ።
በካህኑ አባታችን ጸሎትና በትምህርቱ ብርሃንነት፣ በድቅድቅ ጨለማ ውስጥ ተውጦ የነበረው የሞተሎሚ የጣዖት አምልኮ ተደመሰሰ፤ የአጋንንትም ምሽግ ሙሉ በሙሉ ተናደ። እርሱ የእግዚአብሔርን ቃል እንደ ተመዘዘ ሰይፍ በመታጠቅ፣ ጨለማውን በወንጌል ብርሃን ያሸነፈ፣ አሕዛብን ወደ አምላክ መንግሥት የመለሰ፣ የኢትዮጵያ መዓዛና የቅድስናው መሠረት መሆኑን በሙሉ ልብ እንመሰክራለን።
ጻድቁ አባታችን አቡነ ተክለ ሃይማኖት ከምድር እስከ ሰማይ የተዘረጋ የብርሃን ዐምድ ነው፤ የእርሱ ምልጃና ጸሎት ከአምላክ ዙፋን ፊት ባዶውን የሚመለስ አይደለም። በኃጢአትና በሕማም ለተሰበሩት ፈውስ፣ ለደከሙት ጽናት፣ ለታሰሩት መፈታት የሚሆን የጸጋ ድልድይ ሆኖ ለዘላለም ይኖራል። እኛ በእርሱ ጸሎት ከጥፋት የዳንን፣ በምልጃው ጥላነት ያረፍን፣ በበረከቱም የምንኖር የፍጹም አባትነቱ ሕያው ምስክሮች ነን።
እርሱ በምድር ሳለ እንደ ሱራፌልና ኪሩቤል ማዕጠንቱን ይዞ በእግዚአብሔር ዙፋን ፊት የቆመ፣ በጸሎቱ ትጋት የስድስት ክንፍ ባለቤት ሆኖ የተሾመ ሰማያዊ መልአክ ነው። በአንድ እግሩ ቆሞ ያቀረበው ምስጋና የምድርን እርኩሰት ያጠራ፣ የሰማያትን ምሕረት ያወረደ፣ የዘላለምን የድል ዘውድ ያጎናጸፈ መንፈሳዊ ተአምር ነው። እኛም ይህን ገደብ የለሽ የጽድቅ ከፍታና መለኮታዊ ክብር በሃይማኖት ዓይን እያየን እስከ ዘላለም ድረስ ምስክሮቹ ሆነን እንኖራለን።
እኛ ለተክለ ሃይማኖት ምስክሮቹ ነን፤ በጊዜና በቦታ የማይወሰን፣ በትውልድ ማለፍ የማይደብዝዝ የዘላለም ቅድስናውን መዓዛ በነፍሳችን ስላሸተትነው ነው። እርሱ በምድር ላይ ሳለ የዘራው የሃይማኖት ዘር፣ በደም የተካው የጸሎት መሠረት፣ በስግደት ያቆመው የመንፈስ ቅዱስ ዐምድ ዛሬም ድረስ በመላው ዓለም በሚገኙ ቤተ ክርስቲያናትና ገዳማት ውስጥ ሕያው ሆኖ ያበራል። እርሱ በምድር የቀረ አፈር ሳይሆን፣ ሰማያዊውን የክብር ዘውድ የተቀዳጀ፣ የእግዚአብሔር ታላቅ የጽድቅ ምስክር ነው።
ጻድቁ አባታችን በምድር ላይ የኖረው በሥጋ ቢሆንም፣ አኗኗሩ ግን የሰማያውያን መላእክትን መስሎ ነው። ለሰባት ዓመታት በአንድ እግሩ ቆሞ፣ አጥንቱ እስኪሰበርና ደሙ እስኪፈስ ድረስ ያደረገው ተጋድሎ የምድርን ስበት የሻረ፣ የሰማያትን ደጅ የከፈተ ድንቅ ተአምር ነበር። በጸሎቱ ትጋት የስድስት ክንፍ ባለቤት ሆኖ ከተሾመ በኋላ፣ በእግዚአብሔር ዙፋን ፊት የቅዱሳንን ጸሎት በማዕጠንት የሚያሳርግ ታላቅ የጸጋ ካህን መሆኑን እንመሰክራለን።
ተክለ ሃይማኖት ማለት ሀገራችንን ከጨለማው የጣዖት አምልኮና ከአጋንንት አርነት ያወጣ፣ በምትኩም የወንጌልን ብርሃን፣ የእውነተኛይቱን ሃይማኖት መሠረትና የቅድስናን ማኅደር የተከለ አባት ነው። የሞተሎሚን ኃይል በጽኑ ጸሎቱ ያደቀቀ፣ የጨለማውን ሥርዓት በሃይማኖት ሰይፍ ያጠፋ፣ ኢትዮጵያን የመንፈስ ቅዱስ መኖሪያ ያደረገ የጽድቅ ሐዋርያ መሆኑን እኛ በእውነትና በመንፈስ እንመሰክራለን።
የጻድቁ አባታችን ምልጃ ከምድር እስከ ሰማይ የተዘረጋ፣ ከአምላክ ዙፋን ፊት ባዶውን የማይመለስ የጸጋ ድልድይ ነው። በኃጢአት የወደቁትን የሚያነሣ፣ በሕማም የተያዙትን የሚፈውስ፣ በተስፋ መቁረጥ ውስጥ ያሉትን የሚያጸና መጠጊያችን ነው። እኛ በእርሱ ጸሎት ከጥፋት አምልጠን የወጣን፣ በምልጃው ጥላነት ያረፍን፣ በበረከቱም የምንኖር ምስክሮቹ ነን፤ የምስክርነታችንም ማኅተም በልባችን ጽላት ላይ የታተመ፣ በሰማይም በምድርም የጸና ዘላለማዊ እውነት ነው።
✍️ ዲያቆን ጐሥዓ ቶላ!!!
ነሐሴ 23, 2018 ዓ.ም
ናዝሬት (አዳማ)፡ ኢትዮጵያ
1August 30, 2026 331 1
