مو كل طفل ساكت يعني ما صار معه شي… ومو كل مراهق صار فجأة يحب يخبي تلفونه عن أهله بدون سبب.
أحياناً ورا هالسكوت في قصة ما عم يقدر يحكيها.
قصة ممكن تبدأ من لعبة إلكترونية، حساب مجهول، دردشة عابرة، أو شخص غريب عرف كيف يدخل لعالم طفل أو مراهق ويكسب ثقته.
بيبدأ الحديث بشكل طبيعي، وبعدها شوي شوي بتتغير الأمور… طلب صورة، طلب فيديو، سؤال عن الأهل، محاولة معرفة المكان، وبعدها بيجي التهديد.
«إذا ما عملت اللي بدي ياه، رح انشر كل شي.»
هون المراهق ممكن ينهار، والأخطر إنه ممكن ما يحكي.
مو لأنه ما بده مساعدة، بالعكس… لأنه ممكن يكون خايف من ردة فعل أهله أكتر من خوفه من المبتز.
وهون لازم كل أب وأم ينتبهوا.
لما نعطي طفل موبايل عليه ألعاب وتطبيقات تواصل، نحنا مو بس عم نعطيه وسيلة ترفيه. نحنا عم نعطيه بوابة لعالم فيه ناس ما منعرفهم، وبعضهم بيعرف تماماً كيف يستغل الأطفال والمراهقين.
لهيك، أي لعبة أو تطبيق فيه محادثات خاصة وتواصل مع الغرباء لازم يكون تحت رقابة الأهل، وإذا كان غير مناسب لعمر الطفل أو ما في قدرة حقيقية على مراقبته، منعه أفضل من الندم بعدين.
لكن الرقابة لحالها ما بتكفي.
أهم حماية ممكن تعطيها لابنك أو بنتك هي إنك تخليهم يعرفوا إنهم إذا غلطوا، أو انخدعوا، أو تعرضوا لـ ابتزاز إلكتروني، رح يلاقوك واقف جنبهم… مو أول شخص رح يعاقبهم.
لأن الطفل إذا عرف إن أول شي رح يسمعه هو «ليش عملت هيك؟»، ممكن يسكت.
وإذا سكت الطفل، المبتز بيكسب وقت.
وكل ما طال السكوت، ممكن تكبر المشكلة.
لهيك احكوا مع أولادكم قبل ما تصير المشكلة، مو بعدها.
قولولهم بوضوح:
إذا حدا هددك، إذا طلب منك صورة، إذا حاول يخوفك، إذا قال لك لا تخبر أهلك… تعال لعندي فوراً. ما رح عاقبك، وما رح أتركك لحالك.
وإذا صار ابتزاز فعلاً، لا تدفعوا للمبتز ولا تدخلوا معه بمفاوضات، ولا تمسحوا المحادثات أو الأدلة. احتفظوا بكل شيء واطلبوا المساعدة من جهة موثوقة والجهات المختصة.
الطفل ما لازم يكون خبير بالأمن الرقمي حتى يكون بأمان… لازم يكون عنده أهل يعرفوا كيف يحموا ويحتووا ويساعدوا.
راقبوا الألعاب، راقبوا وسائل التواصل، انتبهوا للتغير المفاجئ بسلوك أولادكم، والأهم من كل هاد… خلو باب الحكي مفتوح.
لأن أحياناً كلمة من الأب أو الأم بوقتها، ممكن تمنع كارثة كاملة.
وإذا حدا بحاجة لمساعدة بموضوع إساءة، ابتزاز إلكتروني، انتحال شخصية، أو مشكلة على وسائل التواصل الاجتماعي، يتواصل معي، وإن شاء الله بقدر ساعده باللي بقدر عليه.
#جعفر_بدران
31
1August 30, 2026 5.8K 6 3
