شو رح يتغيّر تقنيًا للسوريين بعد إزالة سوريا من قائمة الدول الراعية للإرهاب؟
مو معناته إنو كل المواقع والتطبيقات رح تشتغل بسوريا من بكرا، بس القرار ممكن يكون بداية لمرحلة تقنية مختلفة تمامًا، خصوصًا بعد ما تخف مخاطر التعامل مع السوق السوري بالنسبة للشركات العالمية.
من أكتر الأشياء اللي ممكن نشوفها بالفترة الجاية هو رجوع جوجل بشكل أكبر للسوريين، وخاصة موضوع استخدام الأرقام السورية في إنشاء الحسابات وتفعيلها واستعادة الحسابات والخدمات المرتبطة فيها.
وممكن كمان نشوف توسع تدريجي بخدمات جوجل اللي كانت محدودة أو غير متاحة للسوريين، سواء بخدمات المطورين، الإعلانات، الدفع، مساحة الأعمال وغيرها، حسب كل خدمة وسياسة الشركة.
وبالنسبة لـ تيك توك، ففتح التطبيق بشكل رسمي أمام المستخدمين داخل سوريا صار احتمال أكبر من السابق، خصوصًا إذا أعادت الشركة تقييم وضع سوريا ضمن أنظمة الامتثال والسياسات الجغرافية عندها. لكن حاليًا ما لازم نعتبر رجوعه قرار مؤكد قبل ما تعلنه تيك توك رسميًا.
وكمان ممكن نشوف تغييرات كبيرة بخدمات Cloud والذكاء الاصطناعي بدون VPN والاستضافة والبرمجيات والأمن السيبراني، لأن جزء من المشكلة سابقًا ما كان تقني بحد ذاته، وإنما مرتبط بالعقوبات والامتثال ومخاطر التعامل مع سوريا.
حتى الدفع الإلكتروني ممكن يدخل مرحلة جديدة.
إذا بدأت البنوك وشركات الدفع العالمية تتعامل مع السوق السوري بشكل أوسع، ممكن يصير أسهل شراء الاشتراكات الرقمية، الدفع للخدمات العالمية، استخدام أدوات الذكاء الاصطناعي، خدمات Cloud، الإعلانات والمنصات الرقمية.
وبالنسبة للمطورين وأصحاب المشاريع، الموضوع ممكن يكون أكبر من مجرد فتح تطبيق أو موقع.
شخص موجود بسوريا ممكن مستقبلًا يقدر يستخدم خدمات عالمية، يشتري أدوات احترافية، يستأجر سيرفرات، يستخدم APIs للذكاء الاصطناعي، ويبيع خدماته لعملاء خارج سوريا بشكل أسهل.
ولكن إزالة سوريا من قائمة الدول الراعية للإرهاب ما بتعني تلقائيًا رفع كل العقوبات والقيود، ما بتجبر اي شركة على فتح خدماتها فورًا.
كل شركة بدها تحدث أنظمة الامتثال والسياسات الخاصة فيها، ولهيك ممكن نشوف بعض الخدمات تفتح بسرعة، وخدمات ثانية تحتاج أسابيع أو أشهر. وهاد الشي مرتبط بسرعه فرق وزارة الاتصالات بالتواصل مع الشركات وردها وتنظيمها للأولويات وتنظيم البنية التحتية بينها وبين البنوك السورية والعالمية
القصة مو بس إنو السوري يصير قادر يستخدم التكنولوجيا العالمية.
القصة إنو السوري يصير قادر يبني مشروع تقني من داخل سوريا، ويبيع للعالم، ويستقبل أمواله، ويشتغل بأدوات عالمية بدون ما تكون سوريا عائق تقني بحد ذاته.
#جعفر_بدران
49
3
2
1
1August 25, 2026 7.1K 5
