قصيدة : #باب_الواقع
الرادود : #جهاد_الحداد
الشاعر : #حسن_طاهر_المعيبد
الزيارة#1447
•••••••••••••••••••••••••••••
أفتح باب الواقع كافي وآنا باب الطيف
يـ(احسين) ومو إنته الطبعك ما تفتح للضيف
يا صحوة روحي ويا يوم
أدخل صحنك مو بالنوم!
****
(١)
لعيون المحرومه .. معذوره اعله النومه
ليليّه بحرب الشوگ .. بس ترجع مهزومه
الما زارك حتى بطيف .. إلمَن يشكي اهمومه؟
بس گبتك، هذا الليل .. ما تفهمني انجومه
أغفى وخايف ما زورك .. تعرف نوم الخايف
أغفى اعلى الشوگ اتمنّى.. أصحى بگبتك واگف
ما طفتك لاچن طيفك .. ساعي بروحي وطايف
يا ماخذ كل اطمئناني ويا غوث الملهوف
أغفى وأتمنّى اتصحيني وتاخذني امن الخوف
المحروم يصير المرحوم
أدخل صحنك مو بالنوم!
****
(٢)
يمتى وتغمض عيني .. والگبّه اتصحّيني
لو بس شمّيت الباب .. يرجع لون اسنيني
يگولوا لي اعله الشبّاچ .. واتحسّس چفّيني
ظلّت يمّك يـ(حْسين) .. تطردني، تآويني
آنا اعرف ما تطردني .. طيفك يطرد نومي
كل شي بعمري يومي لك .. يا شاغل كل يومي
بس فرّج هم اشواگي .. تفرج باقي اهمومي
كل الناس اتزورك صارت كل الناس تنام
روحي امن ابنيّاتك لاچن (غربه وسوط وشام)
يا كاشف كرب المهموم
أدخل صحنك مو بالنوم!
****
(٣)
يالگبرك واوصافه .. واصحونه المضيافه
صار يبيّن يـ(احسين) .. من روحي الشفافه
يروح الزاير ويعود .. ويسولف عالشافه
وانظر حتى الأملاك .. فرحانه اعله اچتافه
اتوادع ويّه الزاير .. واستقبل بالثاني
واشتمّ الباقي بثوبه .. امن الشبّاچ الحاني
أتأمل يوصف صحنك .. يمكن خالي امچاني؟
صرت اعرف من وجه الزاير من يوصل ويعود
مفقود اليطلع من صحنك والداخل موجود
چا يمتى تحن عالمعدوم
أدخل صحنك مو بالنوم!
****
(٤)
أگضي الليل امناطر .. نص غافي ونص ساهر
تداهمني خيول الشوگ .. والحافر عالحافر
جفني اشگد طاف اعليك .. صار الجفن الزاير
حاير گاعد بالبيت .. و اشتم عطر (الحاير)
ليش تغطّيني الحيره .. وتصحّيني الحيره
يـ(حْسين) وتعرف دارك .. عندي بميّة ديره
عبدك مشتاگ وخوفه .. تعوفه وتاخذ غيره
أغفر لي ذنوبي اللي تمنع أوصل للشبّاك
وتاخذني امن الشوق القاسي بحنّية يمناك
تمسح عالگلب المالوم
أدخل صحنك مو بالنوم!
****
(٥)
كل بيبان (الحضره) .. امن (القبله) و لـ(السدره)
مفتوحه وباقي اليوم .. تفتح باب النظره
يالروحي اترف اعليك .. مثل (الرايه الحمره)
چا يمتى اغصون الروح .. ترجع يمّك خضره!
آنا العطشان الدونك .. ما يتهنّى بمايه
أدعي اتبدّل أحوالي .. بكل تبديل الرايه
يسرك يـ(حْسين) الگاعد؟ .. والوادم مشّايه
كلما نام اتأمل أصبح يـ(حْسين) اعله الخير
أصحى وألگاني بـ فَي صحنك حتى بهيئة طير!
واعليك بجنحانه يحوم!
أدخل صحنك مو بالنوم!
****
رابط القصيدة
https://youtu.be/-dkWrP60qxQ?si=vN8beSDZT9zdcYxV
قصائد الملا محمد بوجبارة
https://instagram.com/hmsh.223?igshid= YmMyMTA2M2Y=
https://youtube.com/@H.K.J
https://t.me/hmsh223