Biruk H. 🦋 የከበረ ነፃነት

ይህ የሰጪነት ባህሪ አንዳች ሳይቀነስና ሳይጨመር በአንተ ውስጥ አለ። አሁን በኑሮህ ላይ የምታየው ማንኛውም የመሰሰት ባህሪ የአንተ ሳይሆን የውሸት አባት ነው። በአዕምሮህ ውስጥ ያለ ለእኔ ብቻ የሚል ማነኛውም ሃሳብ የቀደመው እባቡ ነው። ብዙዎች እግዚአብሔርን የማይመስል ሕይወት ነፍሰ ገዳይነትና ዝሙት ብቻ ይመስላቸዋል። ቃሉ መሰሰት ከሌሎቹ ክፉ ባህሪያት እንደ አንዱ ያስቀምጠዋል። (ኤፌ5፡3)

የኢየሱስ ደም እግዚአብሔር እኛን የሚያይበትን መንገድ በመግነጢሳዊ ሀይል ከጥላቻ ወደ ፍቅር አይለውጥም። የደሙ ሀይል የታጨቀው ለእኛ በሚነግረን የእግዚአብሔር የፍቅር ወንጌል እውነት ውስጥ ነው። የፈሰሰው የኢየሱስ ደም የሰውን አዕምሮ እግዚአብሔር ይጠላኛል ከሚል አስተሳሰብ ወደ ይወደኛል ያመጣዋል። ደሙ በእግዚአብሔር ፍቅር ላይ ያለንን ጥርጣሬ ሁሉ ያመክናል። ደሙን በተመለከትን ቁጥር ከኃጢአት የመንፃታችንን ጉዳይ ከማነኛውም ጥያቄ ውጪ ይሆናል።

ይቅርታ ማድረግ ማለት ያጠፋውን ሰው ትክክል እንዳደረገ መቁጠር አይደለም። ማንም በተሳሳተ እኔነት እንዳይቀጥል ሲያጠፋ ሊገሰጽ ይገባዋል። መገሰጽ ማለት በተሳሳተ ማንነት ውስጥ ላለ ሰው ትክክለኛ ማንነቱን እንዲቀበል ተጽዕኖ ማድረግ ነው። መገሰጽ ያጠፋ ሰው ላይ እየጮሁ መሳደብ ወይም በአደባባይ ማሳፈር ማለት አይደለም። (ማቴ18፡15) መጽሐፍ “ወንድምህ ቢበድልህ ገስጸው ቢጸጸት ይቅር በለው” ይላል። (ሉቃ17፡3)

ስጋ በእግዚአብሔር መልክና አምሳል የተፈጠረው የመንፈስ ፍቃድ ተገዥ ሆኖ እንዲኖር የተሰራ ነው። ስጋ የምንኖርለት ሰውነታችን ሳይሆን የምንኖርበት ሰውነታችን ነው። የምንኖረው ሰውነታችን እንደ እግዚአብሔር አርዓያ የተሰራው መንፈሳችን ነው። ስጋ መንፈሳችንን በምድር የምንኖርበት ቤት ነው።  ስጋ መኖሪያችን በመሆኑ እኛን በሚመጥን መልኩ በክብር ሊጠበቅ ይገባዋል።

ነገር ግን ስጋ ከውስጥ ማንነታችን በተቃረነ መልኩ ከውጪ በአዕምሮ የተገነባውን ማንነት እንድንኖርበት ሊፈልግ ይችላል። የሚዳሰሰው ስጋ (Soma) ላይ ተንተርሶ የሚመጣ ከመንፈስ ፍቃድ ተቃራኒ የሆነ የስጋ ፍላጎት (sarx) ሁሉ በመንፈስ ግዛት ውስጥ እንዲወድቅ ያስፈልጋል። ምክንያቱም ሰው ከውስጥ ወደ ውጪ በሚፈስ የሰውነት ምሕንድስና በእግዚአብሔር የተፈጠረ ፍጥረት ነው።

በጠንካራ የዘረኝነት አስተሳሰብ የተገነባችው ሰማርያዊቷ ሴት ውሃ ስጪኝ ያላትን ኢየሱስ “አንተ አይሁዳዊ ሆነህ እኔን ሳምራዊቷን እንዴት ውሃ አጠጪኝ ትላለህ” ስትለው ታያለህ። (ዮሐ4፡9) ይህ ንግግሯ በአይሁድና በሳምራዊያን ዘሮች መካከል የጠለቀ ችግር እንዳለ ዮሐንስ ይነግረናል።

ያኛው ዘር ጠላታችን ነው፣ የኛ ዘር ይህንን አያደርግም፣ የእኛ ዘር ከሌላ አያገባም። የኛ ዘር ተጨቁኗል፣ የእኛ ዘር ታላቅ ነው፣ የእኛ ዘር ደካማ ነውና በመሳሰሉት ትምህርቶች ትውልዱን ይገነባሉ።

የዚህ አይነት ትምህርት ክፍ ፍሬን ያፈራባት ይህቺ ሴት ፊት ለፊቷ ላለው ውሃ የተጠማ ሰው አይደለም ውሃን ለመስጠት ውሃ ስጪኝ ብሎ በመጠየቁ ስትናደድ ትመለከታለህ። ይሁን እንጅ በእዚች ሴት ውስጥ ያለው የቡድነኝነት አስተሳስብ በውሸት በውስጧ የተሰራ ማንነት እንጂ እሷ ከተፈጥሮ ክፉ አይደለችም።"

ጴጥሮስ በጸጋው እውነት ድኖ እንኳን ቡድነኝነት የሚያስቸግረው ሰው ነበር። ይህንን አይነት የሃይማኖተኝነት ባህሪውን እንዲተው ጳውሎስ እንደገሰጸው ነግሮናል። (ገላ2፡11-14) ጴጥሮስ ይህንን አይነት አስተሳሰብ እንዲተው አስቀድሞ በመንፈስ ቅዱስ ተነግሮት ነበር። “እግዚአብሔር ንጹህ ያደረገውን አንተ እንደ እርኩስ አትቁጠረው” (ሐዋ10፡15) የሰውን ቡድን፣ ተግባር፣ ንግግር፣ አለባበስ እና ሁኔታ በማየት ሰውን እንደ ኃጢያተኛ ዝቅ አድርጎ መመልከት የሃይማኖተኞች መታወቂያ ነው። ክርስቶስ በሁሉም ውስጥ ነው። (ገላ3፡28፣ ቆላ3፡11)"

የምናደርጋቸው ነገሮች ከከንቱነት የሚድኑት በፍቅር ብቻ ነው። (1ቆሮ. 13፡1-2) ፍቅር የሰው ልጅ ሕይወት ትክክለኛ ትርጉም ነው። እግዚአብሔር ከክፉ መናፍስቶችና ከዚህ ዓለም ገዢዎች የለየው ሃይለኛ መሆኑ ሳይሆን ፍቅር መሆኑ ነው። የምታደርገው ፍቅር ላይ ያልተመሰረተ ማንኛውም ነገር ብታምንም ባታምንም ከእግዚአብሔር አይደለም።