🇰🇵⚓️ Şimali Koreya Vonsan şəhərində 5 min tonluq ikinci esminesi - “Kanq Kon”u istismara verib, Kim Çen In isə gəmini ölkənin nüvə cavab sisteminin tərkib hissəsi adlandırıb.
Mərasim sentyabrın 6-da ölkənin şərqində yerləşən Vonsan liman şəhərində keçirilib. Tədbirdə Kim Çen In həyat yoldaşı Ri Sol Çju və qızı Kim Çju E ilə birlikdə iştirak edib.
Kim çıxışında “Kanq Kon”u “hücum təyinatlı esmines” adlandıraraq onun dövlətin nüvə əks-zərbə sisteminin bir hissəsi olduğunu bildirib.
Onun sözlərinə görə, gəmi müvafiq əmr veriləcəyi halda düşmənə “ölümcül cavab zərbəsi” və ya “məhvedici cavab hücumları” endirməyə qadir olmalıdır.
Şimali Koreyanın dövlət mediası gəmini ölkənin “nüvə müharibəsinin qarşısınıalma potensialını” gücləndirən vasitələrdən biri kimi təqdim edib.
“Kanq Kon” eyni sinfə aid ikinci esminesdir. Bu seriyanın ilk gəmisi - “Çve Hyon” 2026-cı ilin iyununda istismara verilib və Şimali Koreyanın qərb sahillərində xidmətə göndərilib.
Yeni “Kanq Kon” isə Şərq Dəniz Donanmasının tərkibinə verilib və Yapon dənizi istiqamətində xidmət göstərəcək.
Gəminin istismara verilməsinə qədər olan proses problemsiz keçməyib.
“Kanq Kon” 2025-ci ilin mayında ilk suya buraxılma zamanı çevrilmişdi. Daha sonra gəmi təmir olunaraq yenidən suya buraxılıb.
2026-cı ilin iyulunda isə Kim Çen Inın müşahidəsi altında esminesin silah sistemləri sınaqdan keçirilib. Sınaqlar zamanı strateji qanadlı raketlərdən də istifadə olunduğu bildirilirdi.
“Kanq Kon”un istismara verilməsi Şimali Koreyanın hərbi-dəniz qüvvələrini genişləndirmək və onları nüvə silahı daşıya bilən qüvvəyə çevirmək planının bir hissəsi kimi təqdim olunur.
Kim Çen In mərasimdə bir daha böyük suüstü döyüş gəmilərinin sayının artırılmasının vacibliyini vurğulayıb.
Şimali Koreya mediası “Kanq Kon”un hazırda faktiki olaraq nüvə döyüş başlıqları daşıdığını açıq şəkildə təsdiqləməyib.
Bununla belə, Kim gəmini ölkənin nüvə cavab sisteminə birbaşa daxil edilən hərbi platforma kimi təqdim edib.
Bu isə Pxenyanın dəniz qüvvələrini təkcə klassik hərbi imkanlarla deyil, nüvə çəkindirmə konsepsiyası çərçivəsində də inkişaf etdirmək niyyətini göstərir.
#ŞimaliKoreya #KimÇenIn #KanqKon #NüvəSilahı #HərbiDənizQüvvələri
