🇩🇪⚖️ Beynəlxalq Ədalət Məhkəməsi Almaniyanın İsrailə verdiyi dəstəyin Qəzzada iddia olunan soyqırımın qarşısının alınması ilə bağlı öhdəliklərə zidd olub-olmadığını araşdıran iş üzrə dinləmələrə başlayıb.
Sentyabrın 7-də Haaqada yerləşən Sülh Sarayında Nikaraquanın Almaniyaya qarşı qaldırdığı iş çərçivəsində dörd günlük dinləmələr başlayıb. Nikaraqua Almaniyanı İsrailə hərbi, maliyyə və siyasi dəstək göstərməklə 1948-ci il Soyqırım Cinayətinin Qarşısının Alınması və Cəzalandırılması haqqında Konvensiyanı, eləcə də beynəlxalq humanitar hüququ pozmaqda ittiham edir.
Nikaraqua iddia edir ki, Berlinin İsrailə dəstəyi Qəzzada baş verdiyini bildirdiyi soyqırımın “həyata keçirilməsinə şərait yaradıb”.
İş 2024-cü ilin martında qaldırılıb. Almaniya isə məhkəmədən işin mahiyyət üzrə araşdırılmasına keçilmədən rədd edilməsini istəyir.
Almaniya tərəfinin əsas hüquqi arqumentini ölkənin aparıcı vəkili Yuliya Monar təqdim edib. Berlin bildirir ki, Almaniyanın məsuliyyətini müəyyən etmək üçün məhkəmə əvvəlcə İsrailin hərəkətlərinə hüquqi qiymət verməlidir. Lakin İsrail bu işdə tərəf deyil və Beynəlxalq Ədalət Məhkəməsinin həmin məsələ üzrə yurisdiksiyasına razılıq verməyib.
Almaniya bunun üçün beynəlxalq hüquqda “Monetary Gold doktrinası” kimi tanınan “əvəzolunmaz üçüncü tərəf” prinsipinə istinad edir. Berlinin mövqeyinə görə, İsrailin iştirakı olmadan bu işə baxılması hüquqi baxımdan mümkün deyil.
Almaniya həmçinin Nikaraquanın məhkəməyə müraciətdən əvvəl tələb olunan prosedurları lazımi qaydada yerinə yetirmədiyini və bəzi iddiaların Soyqırım Konvensiyası çərçivəsində məhkəmənin yurisdiksiyasına daxil olmadığını bildirir.
Berlin eyni zamanda 2024-cü ildən etibarən Qəzzada istifadə olunması üçün İsrailə müharibə silahlarının ixracına icazə vermədiyini vurğulayıb.
Nikaraqua sentyabrın 8-də ilk mərhələdə öz arqumentlərini təqdim edəcək. Managua bildirir ki, Almaniyanın soyqırımın qarşısını almaq və ona şərik olmamaq öhdəlikləri İsrail dövlətinin ayrıca məsuliyyətinin müəyyən edilməsinə ehtiyac olmadan qiymətləndirilə bilər.
Tərəflərin ikinci raund çıxışları çərşənbə və cümə axşamı keçiriləcək.
Almaniyanın ilkin etirazları ilə bağlı qərarın təxminən altı ay ərzində açıqlanacağı gözlənilir. Məhkəmə Berlinin etirazlarını qəbul etsə, iş bağlanacaq. Etirazlar rədd edilərsə, proses mahiyyət üzrə araşdırma mərhələsinə keçəcək və bu mərhələ illərlə davam edə bilər.
Dinləmələr ictimaiyyət üçün açıq keçirilir.
#Almaniya #Qəzza #İsrail #Nikaraqua #BeynəlxalqƏdalətMəhkəməsi
September 8, 2026 259
