🇷🇸🕯 Serbiyada Haaqa Tribunalı tərəfindən hərbi cinayətlərə görə məhkum edilmiş Ratko Mladiçin dəfn mərasiminə çoxsaylı insan toplaşıb, tərəfdarları onun irsini açıq şəkildə tərifləyir, bir çoxları isə tabutunu öpür.
Bosniya serblərinin keçmiş komandanı, general Ratko Mladiçlə vida mərasimi Belqraddakı pravoslav məbədində başlayıb.
Bazar ertəsinə keçən gecə general Mladiçin cənazəsi Koşutnyak rayonundakı Müqəddəs Həvari və İncilçi Luka kilsəsinə gətirilib. Məbəd səhər saat 07:00-da açılanda kilsənin qarşısındakı küçələrdə artıq mindən çox insan toplaşmışdı. Ərazi metal baryerlərlə əhatəyə alınıb.
General Ratko Mladiç avqustun 27-də Haaqada Beynəlxalq Cinayət Tribunalları üzrə Qalıq Mexanizminin həbsxana xəstəxanasında vəfat edib.
Tribunal ölümündən əvvəl Mladiçin humanitar əsaslarla azadlığa buraxılması müraciətini rədd edib.
Serbiyalı həkim Oqnyen Qudel bildirib ki, Mladiç həbsxana həkimlərinin hərəkətsizliyi nəticəsində həyatını itirib.
Generalla ilk vidalaşanlar arasında Serb Respublikası Ordusunun müxtəlif bölmələrinin veteranları olub. Onlar bölmələrinin simvolları olan köynəklərlə metal detektordan keçərək növbəyə dayanıblar. İştirak edənlərin bir çoxunun geyimində general Mladiçin portreti də olub.
Serbiyanın keçmiş baş nazir müavini və “Sosialistlər Hərəkatı” partiyasının rəhbəri Aleksandar Vulin də səhər tezdən generalla vidalaşmağa gəlib.
Mladiçin ailəsi daha əvvəl vətəndaşları gül və əklil almaq əvəzinə həmin vəsaiti xeyriyyə məqsədlərinə - xəstə uşaqların müalicəsinə yönəltməyə çağırıb.
Saat 07:00-da başlayan səhər ibadəti Müqəddəs Luka kilsəsinin qarşısındakı meydanda quraşdırılmış ekranda yayımlanıb. Polis ətraf küçələri nəqliyyatın hərəkəti üçün bağlayıb. Yayımı həyata keçirən telekanal istisna olmaqla, digər media nümayəndələri məbədin daxilinə buraxılmayıb.
Serb Pravoslav Kilsəsinin məlumatına görə, dini vida mərasimi təxminən saat 12:00-da keçiriləcək. Bundan sonra cənazənin generalın qızının məzarı yaxınlığında dəfn olunması üçün Topçider qəbiristanlığına aparılması gözlənilir.
#Serbiya #RatkoMladiç #Belqrad #Haaqa #Dəfn
September 8, 2026 192
