🇮🇱🇵🇸 İsrailli məskunlaşanlar İordan çayının qərb sahilində NBC News-un çəkiliş qrupunu döyüblər.
▪️ Maskalı və silahlı israilli məskunlaşanlardan ibarət qrup Nablusun cənubunda, Cəlud yaxınlığında NBC News-un çəkiliş qrupuna hücum edib. Jurnalistlər 51 yaşlı fələstinli Aida Əhməd Abdullahla söhbət edirdilər. O, məskunlaşanların hücumlarından və ailəsinin evindən sıxışdırılıb çıxarılmasından danışırdı.
▪️ Jurnalistlərin yanına İsrail nömrəli avtomobil yaxınlaşıb. Maskalı bir neçə kişi insanları döyməyə və onlara daş atmağa başlayıb. NBC müxbiri Mett Bredli əlindən xəsarət alıb, operator və çəkiliş qrupunun digər üzvləri də zərər çəkib, avadanlıq sıradan çıxarılıb. Fələstinli qadın da döyülüb və müalicə üçün xəstəxanaya aparılıb. NBC prodüseri hücum edənlərin odlu silaha malik olduqlarını, lakin ondan istifadə etmədiklərini bildirib.
▪️ Hücum Qusra və Cəlud bölgəsində məskunlaşanların zorakılığının davam etdiyi bir vaxtda baş verib. Həmin gün Qusrada onlar içərisində yeddi nəfərin olduğu fələstinli ailənin evini mühasirəyə alıblar. Ev sahibi iddia edir ki, hadisə yerinə gələn İsrail hərbçiləri fələstinliləri bağlayaraq döyüblər. Məlumat yayılan vaxt hücum iştirakçılarının saxlanılması barədə xəbər yox idi.
▪️ Beynəlxalq rezonansdan sonra Netanyahu hücum edənləri “bir ovuc asayiş pozucusu” adlandırıb və onların hərəkətlərinin “İsrailin dünyadakı mövqeyinə zərər vurduğunu” deyib. Prezident İsxak Hersoq isə baş verənləri “İsrailin üzündə ləkə” adlandırıb. Lakin “bir ovuc” ifadəsi getdikcə daha az inandırıcı səslənir - BMT İordan çayının qərb sahilində məskunlaşanların sistemli zorakılığını və fələstinlilərin sıxışdırılıb çıxarılmasını qeydə alır.
▪️ Diqqətçəkən məqam budur ki, beynəlxalq rezonans məhz amerikalı jurnalistlərə hücumdan sonra kəskin artıb. Fələstinlilər illərdir döyülmələr, torpaqların ələ keçirilməsi və evlərə hücumlar barədə danışırlar. İndi isə silahlı məskunlaşanlar ABŞ-ın ən iri telekanallarından birinin müxbirini döyüb və kameralarını sındırıblar - illərlə davam edən zorakılıq bu dəfə birbaşa Amerika obyektivinin qarşısına çıxıb.
▪️ Bütün bunlar Böyük Britaniya, Fransa, Almaniya, İtaliya, Niderland və digər Qərb ölkələrinin qarşı çıxdığı E1 layihəsinin irəli sürüldüyü fonda baş verir. Bu ölkələr xəbərdarlıq edirlər ki, yaşayış məntəqələrinin genişləndirilməsi İordan çayının qərb sahilini parçalayacaq və Fələstin ərazilərinin coğrafi bütövlüyünü tamamilə məhv edəcək.
#İsrail #Fələstin #NBCNews #QərbSahili #Məskunlaşanlar
September 1, 2026 154
