5
እንኳን አምላክን በድንግልና ለወለደች ለእናታችን ለእመቤታችን ለድንግል ማርያም የዕርገት በዓል በሰላም አደረሳችሁ አደረሰን።
#ድንግል_ማርያም_በሰማይ_የታየች_ታላቅ_ምልክት!
=>በሰማይ ያለችውን ድንግል ማርያምን ቅዱስ ዮሐንስ ታላቅ ምልክት በሰማይ ዐየሁ በማለት ይገልጻታል።
"ታላቅ ምልክትም በሰማይ ታየ፤ ፀሐይን ተጐናጽፋ ጨረቃ ከእግሮችዋ በታች ያላት በራሷም ላይ የዐሥራ ኹለት ከዋክብት አክሊል የተቀዳጀች አንዲት ሴት ነበረች።" ራዕይ ፲፪: ፩።
ነቢየ ልዑል ኢሳይያስ በትንቢት "ጌታ ራሱ ምልክት ይሰጣችኋል፤ እነሆ፥ ድንግል ትፀንሳለች፤ ወንድ ልጅንም ትወልዳለች፤ ስሙንም አማኑኤል ብላ ትጠራዋለች" ብሎ የተናገረላት ድንግል ማርያም ናት። ኢሳ ፯:፲፬።
የነቢዩን ቃል የተረጎመው ቅዱስ ዮሐንስ ደግሞ ያየውን ጽፏል። ምልክት ብቻ ሳይኾን ታላቅ ይላታል። የማይታይ ምልክት የለምና የታየችውን ታላቅ ምልክት በመጽሐፍ ቅዱስ ዐይንነት ለእኛም አሳይቶናል። በሰማይ የታየችው ከሞት ስለተነሣች ነው። ትንሣኤዋ በመጽሐፍ አልተጻፈም ለሚሉ ይድረስ።
ያውም ፀሐይን የምታክል ኃያል ፍጥረት እንደ ተራ ሸማ ተጎናጽፋ። ይኽም ክብሯና ንጽሕናዋ ነው። አባቷ ቅዱስ ዳዊት የወርቅ በመጎናጸፊያ ተሸፋፍና በቀኙ ቆማ ያያት ንግሥት እርሷ ናት። ወርቅ የተባለ ንጽሕና ቅድስናዋ ነው።
በሰማይ ያልታየቻችሁ ቅዱስ ዮሐንስን ጠይቁት። ዛሬም በሕያው ቃሉ ጣት እየጠቆመ ወደ ሰማይ ያሳያችኋል። ድንግል ማርያምን በሰማይ አለማየት ፀሐይን አትታየኝም ከማለት በላይ ነው። ካልታየቻችሁ ድክመቱ የእናንተ ነውና ፀሐይዋ የለችም አትበሉ። ወይ በሙቀቷ ብሰሉ ወይም ዐይናችሁን ተኳሉ።
Telegram:
☞ https://t.me/+S3QVyScP7Saom-Lv
