#እኔ_ማን_ነኝ ?
" በህይወቴ መናገር ያቃተኝ አንድ ጊዜ ብቻ ነው ። ይኸውም አንድ ሰው " አንተ ማነህ "? ብሎ የጠየቀኝ ጊዜ ነው " ይላል
ካህሊል ጂብራን
እኔ ማን ነኝ ? የሆነ ነገር ትርጉም ነኝ ? ወይስ በልባዊነትና በህላዌ የምገለጥ ማንነት ያለኝ ሰው ? ሰው ምንድነው ? ብንባል እንመልስ ይሆናል ። ሐይማኖታዊ ትንታኔውን ዶግማ አጣቅሰን ፣ ስነፍጥረት አዋዝተን እንተነትን ይሆናል ። ከሳይንሱም እየቀዳን ፣ ከፍልስፍናውም እያዳቀልን ሰው ይሔ ነው እንል ይሆናል ። ግን ጥያቄው ሌላ ነው ። ሰው የተባልከው አንተ ማነህ ? ማነኝ ብለህስ መልሰህ እየኖርክ ነው ? ማንነታቸውን ማነን ብለው ለማይጠይቁ ሰዎች ማንነትህን ማነኝ ብለህ አስረዳሀቸው ? እኔ ይሄንን ነኝ ያን አይደለሁም ያልካቸው ያን ስለምትወድ ፣ ይሔንን ስለምትጠላ ነው ወይስ አንተ ነኝ ያልከውን እውነት ያን ሆነህ ነው ? እኔ ይሄን ነኝ ብለህ ባስቀመጥከው ልክ ውስጥ እኔም ይሄን ነኝ ብሎ አንተን የመሰለ ስታገኝ ደስ እያለህ ትዘልቃለህ ወይስ እሱን ላለመምሰል ሌላ " ያን ነኝ " ትፈጥራለህ ?
ድክመትህን ከጥንካሬህ ፣ እውቀትህን ከስነ-ምግባርህ ፣ ኑሮህን ከማህበረሰብህ ፣ ሰላምህን ከሰው ሁሉ ጋር ፣ ደስታህን ከወዳጆችህ ፣ ሀዘንህን ከሰብአዊነትህ ጋር እኔ ብለህ በሳልከው ቋትህ ውስጥ ሆነህ እያት ። በምትጋራበት አውድ ሰው የምትለው በሩቅ ያስቀመጥከው ማህበራዊ ህይወት አስተሳስሮ ፣ የኑሮ እሴት ያዋቀረው የሩቅ ቅርብህ አንተን ምን ብሎ ያውቅሀል ? በጣም ቅርቤ ናቸው ስለኔ እነሱ ከተናገሩ ይበቃል የምትላቸው ሰዎች የትኛውን አንተን ነው የሚያውቁህ ? እነዛ ብለህ የምታርቃቸው በሩቅ የሚያውቁህ የኔ ካልካቸው አንተ በሰጠሀቸውና ባሳየሀቸው ማንነትህ የሚያውቁህ እኔ ማነኝ ብለህ ስትጠይቅና አንተ ለራስህ የምታውቀው ማንነትህ ስንት ናችሁ ?
ማነህ ሲሉህ ነኝ ያልካቸውን መሆን የምትፈልገውን ነው ? ፣ እየሆንክ ያለኸውን ነው ? ወይስ እንዲሆኑልህ የምትፈልገውን ነው ? ለዚህ ጥያቄ መልስ እኔ ይሄን ነኝ ብትል እንኳን መልስህን ተከትሎ እውን አንተ እሱን ነህን ? አሁን ያልከውን ? ይልሀል ። ስለዚህ ማንነት ሰፊ ነው አንድ መልስ የለውም ። እንደ ፍላጎታችን እና እንደሚያውቁን ሰዎች ብዛት ፣ የሚያውቁን እኛን እንደሚረዱበት ልክ ፣ ሌሎችም እኛን እንደሚያዩበት እይታ ብዛት ማንነታችንም ብዙ ነው ። እናም ሁሉንም ተወውና አንተ ማነህ ? ሲሉህ አትኩራ ፣ ደንገጥ በል ፣ እኔ ማነኝ ? በል ። ቢያንስ ጣት መጠቆምንና እሱኮ .. ማለትህን ይገታልሀል ።
መልካም_ህይወት🌿
