الحمد لله إن التوبة من الذنوب بين يدي الله سبحانه وتعالى.. وليست بين أيدي البشر.
لأن الإنسان لو أخطأت في حقه مرة ممكن يسامحك، ومرتين ممكن يعدّيها، لكن تكرار الخطأ مع البشر مُهلك للعلاقات؛ لأنه مع كل مرة بيكسر جزء من الثقة، وفي لحظة ممكن الإنسان يمل من اعتذارك، وميبقاش قادر يصدق أعذارك، حتى لو كنت المرة دي نادم فعلًا.
وإحنا كلنا خطّائين.. بنخطئ في حق ربنا، وبنخطئ في حقوق بعض بل وحق انفسنا .
لكن من أعظم الفروق اللي بتطمن الانسان إن الله سبحانه وتعالى لا يمل من قبول توبتك كلما صدقت في الرجوع إليه.
مهما تكرر منك الذنب، ثم تبت توبة صادقة، ثم غلبتك نفسك فوقعت، ثم رجعت إليه من جديد.. باب التوبة لا يُغلق في وجهك لمجرد إنك أخطأت قبل كده.
وفي الحديث القدسي أذنب عبدٌ ذنبًا فقال: «اللهم اغفر لي ذنبي»، فقال الله سبحانه وتعالى: «أذنب عبدي ذنبًا، فعلم أن له ربًّا يغفر الذنب ويأخذ بالذنب».. ثم تكرر منه الذنب والاستغفار، وفي كل مرة يرجع إلى الله.
مش معنى كده طبعًا إننا نستهين بالذنب أو نتعمد تكراره، لكن المعنى الجميل هنا إن تكرار سقوطك لا يمنعك من تكرار الرجوع.
بل النبي ﷺ قال: «لو لم تُذنبوا لذهب الله بكم، ولجاء بقوم يُذنبون، فيستغفرون الله، فيغفر لهم».
ربنا يعلم ضعفنا، ويعلم إننا بنغلط، وعشان كده قال: ﴿قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ﴾.
شوف التعبير.. ﴿أَسْرَفُوا﴾، يعني مش مجرد واحد غلط غلطة صغيرة، ومع ذلك لسه ربنا بيناديهم: ﴿يَا عِبَادِيَ﴾، ثم يقول لهم: ﴿لَا تَقْنَطُوا مِنْ رَحْمَةِ اللَّهِ﴾.
لو غلطت في حق انسان بتقعد تحايله بكل الطرق عشان تصالحه وتسترضيه وهو يمانع ويقاوم
اما الله عز وجل كل ما تقرب منه تجد رحمته وإقباله عليك أعظم من خطوتك فقال في الحديث القدسي: «وإن تقرَّب إليَّ شبرًا تقرَّبت إليه ذراعًا، وإن تقرَّب إليَّ ذراعًا تقرَّبت إليه باعًا».
والأجمل إن ربنا سبحانه وتعالى قال: ﴿وَهُوَ الَّذِي يَقْبَلُ التَّوْبَةَ عَنْ عِبَادِهِ وَيَعْفُو عَنِ السَّيِّئَاتِ﴾، وقال: ﴿إِنَّ اللَّهَ يُحِبُّ التَّوَّابِينَ﴾. مش بس يقبل التائب.. ده يحبه.
انتم مستوعبين واخد مذنب واسرف على نفسه في الذنب وكرر الذنب ومع ذلك يحبه اذا تاب
وده فرق عظيم بين علاقتنا بربنا وعلاقتنا بالبشر.
البشر لهم حقوق، ومش مطلوب من المظلوم إنه يتنازل عن حقه كل مرة، وإن كان ربنا رغّبه في العفو فقال: ﴿فَمَنْ عَفَا وَأَصْلَحَ فَأَجْرُهُ عَلَى اللَّهِ﴾.
أما أنت مع ربنا، فمهما بعدت.. ارجع.
ومهما تكرر منك الذنب.. ارجع.
ومهما قال لك الشيطان: هترجع تستغفر تاني بعد كل اللي عملته؟ ارجع برضه.
مش لأن الذنب بسيط.. لكن لأن رحمة ربنا أعظم.
الحمد لله الذي جعل باب التوبة بيننا وبينه، والحمد لله أن لنا ربًّا لا يرد عبدًا صدق في الرجوع إليه.
فاللهم جدّد التوبة في قلوبنا وارزقنا قبل الموت توبة نصوحًا لا نعود بعدها أبدًا
#باسم_عليوة
#شريعة_أوديت
28
3
1August 30, 2026 1.5K 3
