كل ما تاكل أكتر.. تاخد فرص أكتر للفوز!
جائزة تسويقية عادية؟ ولا دخلنا في القمار من غير ما ناخد بالنا؟
انتشرت مؤخرًا في بعض الكافيهات لعبة فكرتها بسيطة: تشتري وجبة أو منتج، الكافيه يديك «عملة» ترميها في لعبة زي الكازينو كده ، ولو وقعت في خانة معينة تكسب جائزة.
المشكلة مش في شكل اللعبة، ولا حتى إنها شبه ألعاب الكازينو. العبرة بحقيقة المعاملة نفسها.
يعني لو النظام بيقول: كل ما تشتري أكتر = تاخد عملات أكتر = تلعب أكتر = فرصتك في الجائزة تزيد، هنا بدأ الإشكال الشرعي.
ليه؟
لأن العميل ممكن ما يبقاش بيدفع الفلوس عشان الأكل بس، إنما يدفع زيادة عشان ياخد فرصة إضافية في مكسب احتمالي: يا يكسب يا ما يكسبش.
وده تحديدًا اللي بيفرق بين الجائزة الترويجية وبين الصورة اللي تدخل في الميسر.
معيار أيوفي في المسابقات والجوائز فرّق في المسابقات بعوض بين إن الجائزة تكون من طرف خارجي، وبين إن المتسابقين نفسهم يكونوا مصدر العوض، ونص على أنه إذا كان العوض من اثنين من المتسابقين فأكثر فلا يجوز.
ومجمع الفقه الإسلامي الدولي كذلك قرر في ضوابط المسابقات بعوض: «ألا يكون العوض (الجائزة) فيها من جميع المتسابقين».
طيب لو الكافيه قال لك: أنا أصلًا مزودتش سعر الأكل، والجائزة من عندي؟
دي نقطة مهمة، لكنها لوحدها مش كفاية في كل صورة.
لأن لازم نبص كمان على تصميم العرض وسلوك العميل: هل كان بيشتري الوجبة أصلًا بالسعر الطبيعي، والفرصة جات له مجانًا وتبعًا للشراء؟ ولا اشترى وجبة تانية وتالتة وهو مش محتاجها عشان ياخد عملات أكتر وتزود فرصته في الفوز؟
لأن هنا الفلوس الإضافية لم تعد موجهه فقط للحصول على الطعام، وإنما أصبح من مقاصد دفعها زيادة فرص الغُنم الاحتمالي.
وعشان كده فيه فرق كبير بين:
«اشتريت أكلي الطبيعي وخدت هدية أو فرصة مجانية»
وبين:
«اشتري أكتر.. عشان تلعب أكتر.. وتكسب أكتر».
والبديل الصحيح بسيط : الكافيه يقدر يفصل عدد فرص اللعب عن حجم المشتريات، أو يجعل المشاركة متاحة مجانًا دون اشتراط الشراء، بحيث مايبقاش دفع مال أكثر = فرص فوز أكثر.
فالخلاصة: مش كل جائزة مع شراء تبقى قمار، ومش كل حاجة مكتوب عليها «هدية مجانية» تبقى جائزة شرعًا.
العبرة بالسؤال الأهم: هل أنا بدفع المال مقابل السلعة فعلًا؟ ولا جزء من دافعي للشراء إني أشتري فرصة لمكسب محتمل؟
ودي من الصور الحديثة اللي بتبين لك ليه في فقه المعاملات العبرة بحقيقة العقد والمعاملة.. مش بالاسم المكتوب على الإعلان.
والله أعلم.
لو شوفت اللعبة دي قبل كده، ابعت البوست لحد جربها، واكتب لي: انت في الوضع ده بتشتري عشان الأكل.. ولا كنت بتزود الطلب عشان تاخد محاولة تانية؟
#باسم_عليوة
#شريعة_أوديت
#فقه_المعاملات
#القمار
#الميسر
6
4September 1, 2026 834 1
