واحد كان بيشتكي لي إن ليه حق عند شخص تاني، والطرف التاني عارف كويس إن الحق عليه… لكن المشكلة إن الراجل معندوش دليل كفاية يثبت حقه،
فالتاني استغل النقطة دي وقال له: عندك دليل؟ روح اشتكيني!
وأنا بسمعه افتكرت حديثًا لو الناس استوعبته، أعتقد جزء كبير جدًا من أكل حقوق الناس هيختفي.
النبي ﷺ قال: «إنما أنا بشر، وإنكم تختصمون إليَّ، ولعل بعضكم أن يكون ألحن بحجته من بعض، فأقضي على نحو ما أسمع، فمن قضيت له من حق أخيه شيئًا فلا يأخذه؛ فإنما أقطع له قطعة من النار».
يعني إيه؟
يعني ممكن اتنين يختلفوا، وواحد فيهم يكون أشطر في الكلام، أو أدلته أقوى، أو خصمه أصلًا ما عرفش يثبت حقه… فيحكم القاضي له بناءً على الظاهر والأدلة اللي قدامه.
لكن هل الحكم ده يجعل المال حلال !؟
الإجابة : لا.
وده المعنى الخطير في الحديث: حكم القضاء لا يحول الحرام حلال
"يعني ممكن تكسب القضية في المحكمة… وتكون خسرانها عند ربنا"
وممكن تقول لخصمك: «معاك ورق؟ عندك شهود؟ اثبت إن ليك عندي حاجة!» وأنت عارف بينك وبين نفسك إن الراجل فعلًا له حق عندك.
هنا بقى يظهر أثر الإيمان بيوم الحساب في الاقتصاد والمعاملات.
القانون وجلسات التحكيم الشريعة والعرفية يقدروا يحكموا بالورق والشهود والأدلة… لكنه ما يقدروش يدخلوا في نيتك و قلبك ويعرفوا الحقيقة اللي أنت مخبيها.
لكن ربنا يعلمها.
وعشان كده الشريعة من ناحية قالت لك: وثّق حقك، حتى إن أطول آية في القرآن جاءت في توثيق الديون: ﴿فَاكْتُبُوهُ﴾.
لكن زي ما انتم عارفين الكتابة اصحبت تحتمل وكل واحد ممكن يفسر الكلمة بأكثر من معنى ويتلاعب بالقوانين الوضعية
فمن ناحية تانية الشريعة قالت للي استغل ضعف الإثبات: و عدم قدرة صاحب الحق على إثبات حقه لا تقلق حقك لن يضيع وان ضاع في الدنيا لن يضيع في الآخرة
وده الاعتقاد اللي بيربط على قلب اللي ضاع حقه ومقدرش يثبته…
أنت خدت بالأسباب على قد ما تقدر، لكن لو عجزت عن إثبات حقك في الدنيا، فالقضية لم تنتهِ.
فيه يوم حساب لا محتاج فيه عقد ضاع… ولا شاهد نسي… ولا محامي أشطر من محامي.
📌وعشان كده جملة «روح اشتكيني لو تعرف تثبت» ممكن تنجي صاحبها من حكم في الدنيا…لكنها لن تنجيه من «قطعة من النار» يوم القيامة.
#باسم_عليوة
#شريعة_أوديت
19
4
2
1August 22, 2026 2.2K 2
