مشتاق لأيام قبل، لجو قبل، لناس قبل، لتفاصيل قبل، من چنه أطفال ماعدنا مسؤوليات وإلتزامات، لساعني أتذكر أول يوم داومت بي بالأول ابتدائي، جنت من النوع النحس (أول سبوع) ولازم الوالدة طول الدوام كاعدة بالإدارة تنتظرني، وكلما يدك الجرص بالفرصه اروح اتأكد من وجودها،
بس بعدين لا صرت وكح وترأست عصابة وكل يومية نهجم على شعبة (ب) الي جانت بقيادة الخصم حسوني النايم، وليش لقبه النايم لأن جان ينام بالصف وبس بوقت الفرصه يكعد يتعارك ويرجع ينام، هاي دورة حياته بالمدرسة،
مشتاق من چنت اركض لأبو الحانوت اول ميدگ الجرص وياهو الأسرع يلزم الشباچ، جنت اشتري كل يومية لنبأ چبس وشربت لان جانت حالتهم فقيره، مانعرف بوقتها شنو يعني بنيه وولد وشنو سنه وشيعة وشنو مسلم ومسيحي، چنه گلب على گلب وايد على ايد، اتذكر من فاز العراق بكأس اسيا ب٢٠٠٧ وشلون الناس طلعت بالشوارع تركص، هذا الحضن جيرانه الجان متعارك وياه البارحة وهذا السجد بنص الشارع، وبالصيف لساعني اتذكر جديتي الله يرحمها تصعدني للسطح وتنام يم جدو، جانت تربط رجلي برجلها بشال خاف من انام اتحرَك واروح ليغاد،
والأحلى من تصيحني ام علي "حمودي جيبلي ببسي وكيك من ابو يونس لان اجونا خطار" هنا تحس نفسك سبايدرمان المنقذ واروح ركض للمحل اجيبهن واجي،
وأحلى انتظار جان من انتظر علاوي يجيبلي اقراص مال پلي ١ ومال حاسبة من السوگ، ويجي محمد ستار بالليل اسحله بالطوبه،
ومن جانت تمطر وتصير كراگيع ومنكدر نروح نشتري من ابو غزوان لان شويه بعيد، فنضطر .. نضطر نشتري من محل ام علاء رغم بضاعتها الرديئة ههههه
وجان عدنا يوم عيد من يگللنا جدو تحضروا باجر نروح لبغداد، ابقى كاعد للصبح وحاط الحذاء والملابس بصفي ع جرباية، بالضبط نفس ماسوي من يجي العيد، جان بيتنا قِبلة الأقارب، كلهم يجون الصبح، فچنت مليونير مال ارباعه بوقتها،
لو من چنه نلعب دعابل بالفرع واليخسر يبوگهن ويركض، لو برمضان من نلعب ختيلان بالليل ونجمع فلوس ونشتري بقلاوه وبالسحور نلعب محيبس ونزاغل بي، لو من چنه نلعب طوبه ونخلي العوارض مال الگول نعالات، والسمين ابو خدود الورديه يصد گولجي، اني جنت رئيس الفريق كالعادة، ماتذكر بيوم جنت شخص عادي، ألا رئيس فلان شي، كم انتَ عظيم يا ابن وسام.
مشتاق من جانت ست سناء تكتبلي احسنت يا وردة الصف، جان خطي كلش حلو ومره كتبتلي بوركت يا خطاط المدرسة، لو من اخذ ١٠٠ بالعلوم وارجع ركض على امي وبس افتح الباب اصيّح ولچ فاطمة اخذت مييييييييييه بالعلوووووووم
مع انهُ جنت ممتاز وكله درجات كاملة بس العلوم اكرهه فالمية جانت حدث قومي يجب الإحتفال بهِ ...
لو من أشتريت أول بايسكل بحياتي، جنت اخاف عليه لدرجة اول يومين اني اشيله وامشي ما اصعد عليه 😂
لو من تمطر قوي واكعد بسيارتنا، جانت برازيلي أصيلة، ذاك من ذاك العنده برازيلي واجيب المسجل واحط كاسيتات مال كاظم الساهر وبالتحديد انا وليلى
ومن يخلص المطر اطلع استنشق الهوى وناخذ ماسحات ونصعد للسطح نذب المَي من المزريب.
مشتاق من ياخذني جدي للگهوه ويگول لابو الكهوه طك لحمودي بطل ببسي، ويقصد بكلمة طك يعني افتحله ببسي, بس شلون ببسي جان، ذاك ابو الگزاز تحسه ابن اوادم.
مشتاق لحنيّة قبل، لجيران قبل، لمواقف قبل، لأصدقاء قبل الي غيرتهم الحياة والي بعدهم ممتغيرين، مشتاق لكلشي قديم.
شكد اتمنى تنعاد ولو لحظة من اللحظات الذكرتهن .. وشكد اتمنى كل الذكرتهم بخير وصحة وعافية، أحبهم .
أحمد وسام .
3
July 18, 2025 2.3K 19
