هاي المقولة سبق وان سمعتها بمسلسل وثائقي برازيلي اسمه Quem Somos Nós قبل تقريبا 3سنوات هوَ مسلسل يعالج أسئلة كبيرة عن الوعي والحرية والقيود اللي ما نلاحظها احنه هل المقوله جداً اثرت بيه لان بيه نوع من الغموض مجنت افهم القصد الحرفي لهل مقوله جنت اتسائل شنو ممكن اكو استعباد اكثر من السلاسل والسجن والحرمان المصحوب بالتقيدد بعدين بقييت ابحث عن صاحب هل نص فترة طويلة فجأة لكيته صدفة بكتاب يجمع نصوص لاغلب الادباء والفلاسفه ف عرفت تنسب لاحد اعظم الفلاسفه الالمان قريتها وفهمت شنو جان يقصد غوته بهل مقوله طبعاً غوته جان خبير في فهم النفس البشرية الي فهمته غوته ما يقصد القيد الملموس مثل السلاسل والخ.. لايقصد العبودية النفسية والفكريه اللي تعيشها وإنت مو منتبه إلها إحنا عبيد لأشياء ما نكدر نشوفها بس نحس بيها تحاصرنا دائماً إحنا صح نتصرف وكأنُ إحنا أحرار ونتفاخر
بـ قراراتنا بس بالحقيقة هواي من هاي القرارات مو إحنا المسؤولين عنها ولا اختارناها إحنا بس مشينا ويا السرب
الأغلب اليوم يعيش مو مثل ما يريد بس مثل ما المجتمع يفرض عليه يخاف يلبس شي يعبّر عنه يشتغل شي يحبه أو حتى يبين حزنه لأن كل خطوة محسوبة وكل نظرة إلها حكم ولهذا هواي ناس عايشة حياة مو إلهم بس حياة تناسب المقاييس اللي محددها غيرهم للاسف
أكو شي احنه نظنه طبيعي بحياتنا بس هو بالحقيقة أكبر سبب يخنكَنا بدون مانحس وهالشي هو الاستسلام للعرف والعادة راح تعيش حياتك حسب مااانت تربيت ومن اول ما اجيت لكيت غيرك متعود عليه مو حسب شنو إنت تحس وتؤمن بيه
يعني تسوي الشي لأن الناس هيچ تسوي مو لأن هو الصح إلَك والاخطر بمرور الوقت تنسئ شنو انتَ وشنو تريد وتتحول لأنسان يكرر نمط جاهز واذا طبقت غير هل نمط يُسمئ تمرد وعيب فكل هالقيود اللي نعتبرها طبيعية وهي مو طبيعيه تُسمئ عبودية وهاي بالضبط العبودية الي غوته جان يريد يوصل النا فكرتها عبودية من نوع ثاني لكن اقسى
النقطة المهمة اللي لازم كلنا نفهمها إنه العبودية مو دائمًا تكون بالسلاسل والسجن ابدا ، احياناً تكون بعادات نختارها لانفسنا وبالتالي حتمسخ هويتنا
الهدف من كل اللي قلته هو إنُ نوقف نستسلم لأي قيود تخنكَ روحنا سواء كانت خوف او ضغط اجتماعي أو عادات متجذرة ونفهم إنُ الحرية الحقيقية تبدأ لما نختار نكون صادقين ويا أنفسنا نعيش حياتنا بحرية وإرادة وما نخلي أي شي يقيدنا أو يمنعنا نكون أفضل نسخة من نفسنا .
تُـقىٰ خضير .
َ
July 27, 2025 2.2K 13
