ليهمَك حَبيبي القيل والقال
ودنيا الغثتك گوم أضحكلها
وتباهـا بحُبي إلك يا نور العيون
وخلها تموت غيض الناس خلها
آنه بيمناك سيف بساعة الكون
وأدين اللاوتك صدگ أشلها
وإنه البلسم لجرحَك وآنه اداويك
وأنه لعيناك مرودها وكحلها
ماعوفك واحن من امك عليك
واصير وياك مريم و طفلها
محبتك بالگلب معگوده يهواي
عليها سوار ياهو اليوصل الها؟
لا تبچي أموت بعبرتك هاي
وتذبحني بدمعتك من تهلها
أحبك ما اريد بعينك دموع
رغم ما دمعتك يسحر شكلها
دضم روحي ويا روحك خلها وياك
وعلى كل السوالف سولف الها
واخذ الشفة لو مر وكتك يصير
الك ضميت رشفتها وعسلها
وحق حضرة الكاظم يوم زرناه
وحق زينب وحق ذاك الكفلها
وحق جمرة حسين وعطشة حشاه
وحق حيدر الكل شده يحلها
اذا اهلي وهلك والوكت والناس
والدنيا علينه تدور كلها
ماعوفك واذا رادوا يبعدوك
بحزام المنايا اتحزم إلها
ومن ذي قار امد الجثث لهنا
ولخليها صدگ يشهد زحلها
