အညာဒူဘိုင်းမှ ရေနံတွင်း ၄တွင်း စစ်တပ်ဖျက်ဆီး
ဧရာဝတီ၊ စက်တင်ဘာ ၈၊ ၂၀၂၆
မကွေးတိုင်း မြိုင်မြို့နယ်အနောက်ပိုင်း တဲကြီးရွာ၌ ရောက်နေသည့် စစ်တပ်စစ်ကြောင်းသည် ယမန်နေ့နံနက်က အညာဒူဘိုင်းဟု တင်စားခေါ်ကြသည့် ကျောက်ခွက်ရေနံမှော်တွင်းမှ တွင်း ၁နှင့် တွင်း ၂ ကြား ဒေသခံများ တူးဖော်နေသည့် လက်ယက်ရေနံတွင်း ၄တွင်းကို ဖျက်ဆီးခဲ့ကြောင်း စစ်ရေးသတင်းရင်းမြစ်များနှင့် ဒေသခံများထံက သိရသည်။
အိမ်ခြေ ၈၀၀ကျော်ရှိ တဲကြီးရွာ မြောက်ဘက် မြက်စပ်တောင်မှ ကျောက်ခွက်ရေနံမြေ တွင်း ၁နှင့် တွင်း ၂ အနီးမှ ရေနံတွင်းများအား မီးရှို့ဖျက်ဆီးခဲ့ခြင်း ဖြစ်သည်။
“တဲကြီးရွာကို ခြေကုပ်ယူထားပြီးတော့ စစ်ကြောင်းထွက်ထိုးလိုက် ပြန်ဝင်လိုက် လုပ်နေကြတာ၊ မနေ့မနက်စောပိုင်းက တဲကြီးရွာကနေ မြောက်ဘက်ကို ရှေ့ကင်းတချို့ လှုပ်ရှားမှုရှိခဲ့ပြီးတော့ ပြည်သူပိုင် ရေနံကျင်းတချို့ကို ဖျက်ဆီးခဲ့တယ်၊ ပြီးတော့ တဲကြီးရွာထဲကို ပြန်ဝင်သွားတယ်”ဟု မြေပြင်စစ်ရေးသတင်းရင်းမြစ်တဦးက ပြောသည်။
ကျောက်ခွက် ရေနံမှော်ဒေသဘက်သို့ ပခုက္ကူအခြေစိုက် အမှတ် ၁၀၁ ခြေမြန်တပ်မဌာနချုပ်(တမခ ၁၀၁)နှင့် လက်အောက် ခံ တပ်များဖြစ်သည့် ခလရ ၂၅၁၊ ခလရ ၂၅၂၊ ခလရ ၂၅၉၊ ခလရ ၂၃၅ တို့မှ အင်အား ၈၀၀ ခန့်နှင့်အတူ ကန်တော်ရွာ စစ်တပ်စခန်း၊ ညောင်ဂျစ်ပင်ပျူရွာ၊ တွင်းမပျူရွာတို့မှ ပျူစောထီးအင်အားများဖြင့် ဖြန့်ခွဲ၍ လေကြောင်းပစ်ကူများဖြင့် စစ်ကြောင်းထိုးနေခြင်းဖြစ်သည်။
ပေါက်နှင့် မြိုင်မြို့နယ်များမှာ စစ်ကိုင်းတိုင်း၊ ချင်းပြည်နယ်တို့နှင့် နယ်မြေ ထိစပ်နေပြီး စစ်ရေး၊ စီးပွားရေးအရ အရေးပါသည့်လမ်းကြောင်းပေါ်တွင် ရှိနေသလို သပြေညို၊ လက်ပံတို၊ ကျောက်ခွက်၊ ဖလံ ကိုင်း၊ ထောက်ရှာပင်စသည့် ရေနံမှော်များသည် တော်လှန်ရေးတပ်များအတွက် အခွန်ဘဏ္ဍာရရှိရာနေရာလည်း ဖြစ်သည်။
စစ်ကြောင်းထိုးနေစဉ် ရေနံမြေအတွင်းရှိ ကျေးရွာ ၂၀ ကျော်မှ အရပ်သားနေအိမ် ၃၃၀ ကျော်မီးရှို့ဖျက်ဆီးခဲ့သလို ဒေသခံ ၂၉ ဦး သတ်ဖြတ်ခံခဲ့ရကြောင်း အညာမြေတပ်ပေါင်းစုက သတင်းထုတ်ပြန်ထားသည်။
ပုံစာ- မကွေးတိုင်း ပေါက်မြို့နယ်အတွင်းက တွင်းတိမ်လက်ယက် ရေနံတွင်း လုပ်ငန်းခွင် (ပုံဟောင်း)/ဧရာဝတီ
#WhatsHappeningInMyanmar
#RejectMilitaryCoup
43
5
3
3
2September 8, 2026 3.4K 5
