Ўзбекистон Республикаси Президентининг Сербия Республикасига ташрифи арафасида Ўзбекистон Савдо-саноат палатаси раис маслаҳатчиси Жамил Максуди Сербиянинг етакчи бизнес тузилмалари ва компаниялари вакиллари билан қатор учрашувлар ўтказди.
Жумладан, Сербия Савдо-саноат палатаси вице-президенти Михаил Весович ҳамда Палатанинг халқаро ҳамкорлик департаменти раҳбари билан мулоқотда икки мамлакат тадбиркорлари ўртасидаги алоқаларни кенгайтириш масалалари муҳокама қилинди.Учрашувда Ўзбекистон–Сербия ишбилармонлар кенгашининг фаолиятини кенгайтириш, компаниялар ўртасида тўғридан-тўғри бизнес алоқаларини фаоллаштириш, қишлоқ хўжалиги соҳасида, хусусан, гўшт етиштириш йўналишида қўшма инвестиция лойиҳаларини амалга ошириш имкониятлари кўриб чиқилди.
Шунингдек, савдо ва тариф режими, GSP+ имтиёзларидан самарали фойдаланиш, ахборот-коммуникация технологиялари ҳамда енгил саноат соҳаларида инвестициявий ҳамкорликни ривожлантириш масалаларига алоҳида эътибор қаратилди.
Ташриф доирасида Сербиянинг агросаноат ва бошқа соҳаларда фаолият юритувчи компаниялари вакиллари билан ҳам учрашувлар ташкил этилди. Уларда ўзаро савдо-инвестиция ҳамкорлигини кенгайтириш, илмий-техник алмашинувни йўлга қўйиш ҳамда Ўзбекистон қишлоқ хўжалиги кластерлари учун истиқболли қўшма лойиҳаларни шакллантириш масалалари муҳокама қилинди.Учрашувлар Ўзбекистон Савдо-саноат палатасининг Сербиядаги вакили Виктор Рибич иштирокида ташкил этилди.
Мазкур мулоқотлар икки мамлакат ишбилармон доиралари ўртасидаги ҳамкорликни янги босқичга олиб чиқиш, инвестициявий лойиҳаларни кўпайтириш ва ўзаро савдо ҳажмини ошириш учун янги имкониятларни шакллантиришга хизмат қилади.
Telegram 
Instagram 
Facebook 
Youtube
