Selvarin Delacourienne  •| International Volunteer

“YOSHLAR TINCHLIK UCHUN” BMT MODELI 2026: YOSHLAR, DIPLOMATIYA VA XALQARO MULOQOT MAYDONIDA.

2026-yil 17–18-avgust kunlari Toshkent shahrida yoshlarning xalqaro munosabatlar, diplomatiya va tinchlik masalalaridagi faol ishtirokini kengaytirishga qaratilgan “Yoshlar tinchlik uchun” BMT Modelining konferensiyasi o‘tkazilmoqda.

Mazkur xalqaro tashabbus yoshlarni global kun tartibidagi dolzarb masalalar yuzasidan fikr yuritish, diplomatik muzokaralarda ishtirok etish, turli pozitsiyalarni tahlil qilish va amaliy yechimlar ishlab chiqishga yo‘naltirilgan muhim ta’limiy va muloqot platformalaridan biridir.

Konferensiya ingliz tilida tashkil etilib, unda talabalar, yuqori sinf o‘quvchilari, xalqaro munosabatlar, diplomatiya va global jarayonlarga qiziqadigan faol yoshlar, shuningdek, O‘zbekiston va xorijdan tashrif buyurgan yosh liderlar hamda xalqaro mehmonlar ishtirok etmoqda. Jami 200 nafar ishtirokchini qamrab olgan tadbir yoshlar o‘rtasida xalqaro tajriba almashinuvi va professional muloqot uchun keng imkoniyat yaratmoqda.

Tadbirning ochilish marosimi doirasida BMTning O‘zbekistondagi vakolatxonalari rahbarlari va vakillari, yosh liderlar, xorijiy yoshlar hamda xalqaro maydonda faoliyat yuritayotgan mehmonlar ishtirok etdi. Uchrashuv davomida yoshlarning tinchlikni mustahkamlash, xalqaro hamkorlikni rivojlantirish va global muammolarni hal etishdagi o‘rni xususida fikr almashildi.

Konferensiyaning muhim yo‘nalishlaridan biri — “Jahon yoshlarining tinchlik sari harakati” tashabbusining taqdimotidir. Ishtirokchilarga harakatning maqsad va vazifalari, asosiy faoliyat yo‘nalishlari, tashkiliy tuzilmasi, a’zolik tartibi hamda veb-platformasi haqida batafsil ma’lumot berildi.

“Jahon yoshlarining tinchlik sari harakati” tashabbusi O‘zbekiston Respublikasi Prezidenti Shavkat Mirziyoyev tomonidan BMT Bosh Assambleyasining 80-sessiyasida ilgari surilgan bo‘lib, yoshlarni tinchlik va xalqaro hamkorlik g‘oyalari atrofida birlashtirishga qaratilgan. 2026-yilda ushbu harakatning bosh qarorgohini Toshkent shahrida tashkil etish rejalashtirilgani ham mamlakatimizning yoshlar diplomatiyasi va xalqaro tinchlik tashabbuslaridagi faolligi ortib borayotganini ko‘rsatadi.

KONFERENSIYADA NAFAQAT DELEGATLAR, BALKI VOLONTYORLAR HAM MUHIM O‘RIN TUTMOQDA.

Tadbirning tashkiliy jarayonlarida faol volontyorlar jamoasi ham ishtirok etib, konferensiyaning yuqori saviyada o‘tkazilishiga o‘z hissasini qo‘shmoqda. Volontyorlar ishtirokchilarni kutib olish va yo‘naltirish, tadbir jarayonlarini muvofiqlashtirish, tashkiliy masalalarni qo‘llab-quvvatlash hamda mehmonlar bilan ishlash kabi yo‘nalishlarda faoliyat olib bormoqda.

Ayniqsa, O‘zbekistonning turli hududlaridan kelgan volontyorlar bilan bir qatorda xalqaro mehmonlar va xorijiy yoshlar ishtirokining mavjudligi tadbirning xalqaro muhitini yanada boyitmoqda. Bu esa yoshlar uchun turli madaniyat va tajriba vakillari bilan bevosita muloqot qilish, yangi professional aloqalar o‘rnatish va xalqaro tajribani o‘rganish imkoniyatini yaratadi.

BMT MODELI — NAZARIYADAN AMALIYOTGA.

“Yoshlar tinchlik uchun” BMT Modelining asosiy afzalliklaridan biri shundaki, ishtirokchilar diplomatiyani faqat nazariy tushuncha sifatida emas, balki muzokara va muloqot jarayonida amalda sinab ko‘rish imkoniyatiga ega.

Konferensiya davomida yoshlar:

xalqaro masalalar bo‘yicha o‘z pozitsiyasini shakllantirish;
fikr va takliflarini dalillar asosida asoslash;
diplomatik muzokaralar olib borish;
qarama-qarshi nuqtayi nazarlarni tahlil qilish;
konstruktiv munozara va murosaga kelish ko‘nikmalarini rivojlantirish;
xalqaro munosabatlar va tinchlik masalalariga yangicha yondashuvlarni o‘rganish;
BMT tizimi vakillari, xalqaro ekspertlar, yosh liderlar va xorijiy ishtirokchilar bilan muloqot qilish imkoniyatiga ega bo‘lmoqda.

Bunday format yoshlarning nafaqat notiqlik va muzokara ko‘nikmalarini, balki tanqidiy fikrlash, jamoaviy ishlash, tezkor qaror qabul qilish va turli manfaatlar o‘rtasida muvozanat topish qobiliyatini ham rivojlantiradi.

Selvarin  • road to Damascus. |