Xaaskaygi mustaqbalka!
Ma garanayo qofka aad noqon doonto. Ma ogi meesha aad ku nooshahay. Se waxaan garanayaa sidii aan kuula dhaqmi lahaa marka aan ku helo.
Waxa aan rabaa inaad u noolaato sida aad rabto, ee aanad u noolaan sida aan anigu doonayo. Waxa aan rabaa in dookhaaga aad u madaxbannaanaato, shakhsiyaddaadi hore aad xejisato, waxa aan rabaa inaad ahaato gabadh gabadhii aad ahayd ka hor intii aanad xaas noqon.
Waxa aan rabaa inaan ahaado saaxiibkaa, waxa aan rabaa inaad ila kaftanto, agtayda aad nefis ku dareento, sida aad jeceshahay aad agtayda ugu dhaqanto, markasta oo aad damacdana aad agtayda maalayacnigaaga oo dhan kula soo baxdo.
Waxa aan rabaa marka aad i weyddiiso noocee dhar ah ayaa habboon inaan xidho, inaan kuugu jawaabo "noocii adiga kula qurux badan, ayaa anigana ila habboon". Sida aad jeceshahay ayaad u lebbisan doontaa, lebbis kasta oo shakhsiyaddaada ka turjumayana waad gashan doontaa.
Waxaan rabaa inaan toddobaad kasta hal date u baxno. Inaan ina geeyo hotel deggan oo aan ka soo cashaynno. Dhar aad xulatay adoo xidhan, anna aan si qurux badan u lebbistay, gaadhiga kuu furo, ina kaxeeyo, markaan meeshii gaadhnana kursiga kuu sallaxo, biyaha kuu shubo, amaanana sida aad dharkan ugu soo baxday iyo sida daqiiqadaha agtaadu ay u yihiin kuwo u qalma in waxkasta loo soo dayaco.
Waxaan rabaa inaad wax akhrido, markasta oo aad adduunka ku daashana aad akhriska ku dhuumato. Waxa aan bil kasta hadyad kuugu keeni doonaa buugaag badan, qaab qurux badan aan u soo xidhay, chocolates na aan ka soo buuxiyay. Waxaan rabaa marba marka ka danbaysa inaad noqoto naag xor ah, naag xayndaabyada jebisa, naag aan cidna marti uga ahayn hayaankeeda nololeed, naag akhrisku uu yahay shidaalkeeda jidkeeda iyo dunideeda.
Maalmaha qaar, hal maalin oo wiigga ka mid ah adiga ayaa lahaan doona, naftaada ayaad la qaadan doontaa, daryeeli doontaa, wax akhriso haddaad rabto, meherad aad jeceshahay waqti ku soo qaado ama qol gaar ah keligaa joog, maalin aad adigu leedahay ayay noqon doontaa. Si la mid ah sida aan anna maalin gaar ah u yeelan doono, si aynaan u lumin xidhiidhka aynu nafaheenna la leennahay.
Waxa aan doonayaa inaad markasta mudnaanta naftaada siiso. Ka hor intaanad waajibkaaga xaasnimo iyo waajibaadka hooyannimo ka fekerin, waa inaad naftaada ka fekertaa. Waa inaad maankaga daryeeshaa, jidhkaaga daryeeshaa, waxkastoo macno kuu samaynayana aad samaysaa. Gabadh nafteeda daryeeshay ayaa dadka nolosheeda ku jirana daryeeli karta. Aniguna markasta caqabad kugu noqon maayo, ee waxaan ku siinayaa xorriyad aad naftaada mudnaanta ku siiso.
Waxaan doonayaa in maalmaha aad xanuunsanayso, aan si gaar ah kuu daryeelo. Shaqo kasta aan joojiyo. Inaan agtaada fadhiyo. Inaan kuu taatabto meelaha ku xanuunaya, si naxariis leh. Waxaan rabaa inaan madaxa kuu salaaxo, timaha faraha kuu dhexgeliyo. Ka dibna aan dhegta kuugu sheego: haddii aad xanuunsanayso iyo haddii aad caafimaad qabtaba, si isku mid ah ayaan kuu jeclahay.
Waxaan rabaa inaad guul kasta ama waxqabad kasta oo aan xaqiijiyo aad garabkayga ahaato, inaan wada gaadhno, inaan dhinacayga kaa eego, inaan dadka hortooda kuugu mahadceliyo. Waxaan rabaa inaan meelkasta kaga faano, oo kor u sheego, sida ay noloshaydu u fududaatay iyo xasilloonida aan hantay markii aad adigu ku soo biirtay.
Sidaa si la mid ah, hadafyadaada nololeed ayaan garab kuu ahaanayaa si aad u gaadhid, waan kula talinayaa, waan ku dhiirrigelinayaa, waan ku dejinayaa, waan kula dabbaaldegayaa, marka aad hadaf xaqiijiso ee dhinacaaga soo eegtana, waxaad arkaysaa inuu taagan yahay nin kugu kalsoon oo safar dheer kula soo galay, xaalad kastana aan kaa tegin.
Igama baryi doontid danayn, daryeel ama ixtiraam. Si fudud oo dabiici ah ayay u burqan doonaan marka aan kula joogo. Waxaan rabaa in jacaylkeennu uu noqdo mid ay ka buuxaan naxariis, garabsiin, innagana caawiyo koritaan oo aan noqonno dad sidii hore ka fiican maalinba maalinta ka danbaysa.
Waan ku sugayaa, halkanaan joogaa, waanan hubaa inaan kula kulmi doono❤️
