ሁሉን በጊዜው የምታደርግ ጌታ ሆይ! ከመቸኮሌ እረፍት ስጠኝ» «ጌታዬና አምላኬ ኢየሱስ ሆይ! ዛሬ ምንም…

ሁሉን በጊዜው የምታደርግ ጌታ ሆይ! ከመቸኮሌ እረፍት ስጠኝ»

«ጌታዬና አምላኬ ኢየሱስ ሆይ! ዛሬ ምንም የምናገረው ቃል ሳይኖረኝ፣ በነፍሴ ውስጥ ካለው ትልቅ የባዶነትና ዝብርቅርቅ ባለ ስሜት ከፊትህ ቆሜአለሁ ። የወጣትነት ዘመኔ በብሩህ ተስፋና በብዙ ሕልሞች ሊሞላ ሲገባው፣ እኔ ግን ዛሬ የወደፊቱ መንገድ በምን እንደሚታየኝ አንተ  ታውቃለህ። የሄድኩባቸው በሮች ሁሉ ተዘግተዋል፣ የደከምኩባቸው ጥረቶች ሁሉ ከሽፈዋል። እኔ እጅግ እቸኩላለሁ፤ ነገሮች ዛሬውኑ እንዲቀየሩ፣ የጸሎቴ መልስ አሁንኑ እንዲመጣ እፈልጋለሁ። ያ የእኔ መቸኮልና ጭንቀት ደግሞ ይበልጥ ተስፋ አስቆርጦኝ በከባድ የብቸኝነት ማዕበል ውስጥ እየጣለኝ ነው።
ጌታ ሆይ! አንዳንድ ጊዜ ያንተ ዝምታ የረሳኸኝ አስመስሎኝ “የት ነህ? ለምን አትሰማኝም? ለምን ትዘገያለህ?” እያልኩ በውስጤ እጮኻለሁ። ዓለም በዙሪያዬ ስትፎክር፣ እኩዮቼ በሕይወት ሲቀድሙ፣ እኔ ግን በቆምኩበት የቀረሁ እየመሰለኝ ነፍሴ ትታወካለች። ነገር ግን አምላኬ ሆይ፣ አንተ ሁሉን በጊዜው ውብ አድርገህ የምትሠራ የዘመን ጌታ ነህ። እኔ የምቸኩለው የነገው ስለማይታየኝ ነው፤ አንተ ግን መጨረሻዬን ከጥንቱ አውቀህ ለእኔ የሚበጀውን በራሱ ሰዓት የምታዘጋጅ አባት ነህ። ያንተ ዝምታ መተው ሳይሆን፣ እኔን ለትልቅ ክብር የምታበስልበት መለኮታዊ ጥበብህ ነው።
አማኑኤል ሆይ! እኔ ተስፋ ብቆርጥም አንተ በእኔ ላይ ተስፋ አትቆርጥም። እኔ መንገድ ጠፍቶኝ ብደናገጥም፣ አንተ ግን ሁሉን የምትችል፣ የማይዘነጋ ፈጣሪዬ ነህ። የሰው ልጅ ፍቅርና አጋዥነት እንደ ነፋስ ጠፊ መሆኑን አይቻለሁ፤ ማንም ለነፍሴ እውነተኛ መረጋጋትን ሊሰጣት አልቻለም። ያንተ ሁሉን ቻይነት ግን እኔ ካለሁበት የችግር ጥልቀት እጅግ ይበልጣል። ዓለም “አከተመልህ” ስትለኝ፣ አንተ ግን ዛሬም “ልጄ ሆይ፣ ጊዜው ሲደርስ እኔ ፈጥኜ አደርገዋለሁ” ትለኛለህ።
የነፍሴ የቅርብ ሐኪም ሆይ! የወጣትነት ሕይወቴን፣ የተሰበሩ ሕልሞቼንና የዛለውን ማንነቴን በፊትህ አስቀምጣለሁ። ከዚህ ከተስፋ መቁረጥና ከእኔ መቸኮል ጨለማ ውስጥ በኃይልህ አውጣኝ። ልቤ ያንተን ጊዜ መታገስ እንድትችል፣ በአንተ ቀጠሮ ላይ ፍጹም እምነት እንዲኖራት ረድኤትህን ስጠኝ። የምሄድበትን መንገድ አሳየኝ፤ እጄን ይዘህ ከውድቀቴ አስነሳኝ። ካንተ በቀር ሌላ ተስፋ የለኝም፤ መሸሸጊያዬ አንተ ብቻ ነህና ያንተን መለኮታዊ ዕረፍትና ሰላም በውስጤ አፍስስ። አሜን።»

♡ ㅤ  ❍ㅤ     ⎙ㅤ  ⌲
ˡᶦᵏᵉ   ᶜᵒᵐᵐᵉⁿᵗ   ˢᵃᵛᵉ   ˢʰᵃʳᵉ
❤1🥰1
October 8, 2026 161 1