مرّات يصير تراب علىٰ عدسة النظارة أو جامة السيارة يخلّي الرؤية مو واضحة وتشتّت، وإذا تراب قوي ممكن يعدم الرؤية بالكامل،
ومجرد ما تنظفهم ترجع تشوف بوضوح أكثر وتگدر بعدها تكمل الّي تسويه وتمشي بطريقك وأنت مرتاح.
هالتراب نفسه ممكن يترس عينك وعقلك وگلبك،
تلگه غبار اليأس مالي عينك ومخلّيك ما تشوف رحمة الله وألطافه بيك،
ونفسه متربّع بعقلك ومخلّي كلّ أفكارك سوداوية وما بيها ذرّة حسن ظنّ وتوكّل،
ونفسه معشعش بگلبك ومخلّيك ما عندك يقين بـ الله، ومنسيك إن ربّنا هوَ الّي يحرّك الأمور مو الظروف ولا البشر.
﴿فَإِنَّ مَعَ الْعُسْرِ يُسْرًا إِنَّ مَعَ الْعُسْرِ يُسْرًا﴾،
هالتوكيد وهالربط الإلزامي مو اعتباطًا أجة بهالصيغة الواضحة، يعني بكلّ عُسر أكو "وياه" يُسر، لا قبله ولا بعده وإنما وياه، وهالشي بحد ذاته يخلّينا نعرف إنو بكلّ شرّ أكو خير مُبطّن، وبكلّ عُسر أكو يُسر، وبكلّ تأخيرة أكو خيرة،
ويقينّا بالله كفيل يخلّينا ندرك هالشي ونعيشه حتّىٰ نتصبّر بيه رغم كلّ الظروف الّي تحيط بينا.
