မြစ်ခြေမြို့၊ ကြောင်ပန်းခုံကျေးရွာကို စစ်တပ်က ဝင်ရောက်စီးနင်း မီးရှို့နေ၊ မီးဝင်ငြိမ်းသည့် ပြည်သူများကိုလည်း သေနတ်ဖြင့် လိုက်လံပစ်ခတ်
စက်တင်ဘာလ ၇ ရက်
မကွေးတိုင်း၊ ပခုက္ကူမြို့နယ်၊ မြစ်ခြေမြို့ရှိ ကြောင်ပန်းခုံကျေးရွာကို အကြမ်းဖက်စစ်တပ်က ဝင်ရောက်စီးနင်းကာ နေအိမ်များကို မီးရှို့ဖျက်ဆီးနေပြီး မီးငြှိမ်းသတ်ရန် ကြိုးပမ်းသည့် ဒေသခံပြည်သူများကိုလည်း သေနတ်ဖြင့် လိုက်လံပစ်ခတ်နေကြောင်း ဒေသခံပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ စက်တင်ဘာလ ၇ ရက်နေ့ မွန်းလွဲ ၂ နာရီခန့်မှစတင်၍ မြစ်ခြေမြို့ရှိ ရှစ်မျက်နှာဘုရားတွင် အထိုင်ချတပ်စွဲထားသော အကြမ်းဖက်စစ်တပ်က ကြောင်ပန်းခုံကျေးရွာအတွင်းသို့ ဝင်ရောက်စီးနင်းကာ နေအိမ်များကို မီးရှို့ဖျက်ဆီးနေခြင်းဖြစ်ကြောင်း သိရသည်။
စစ်တပ်၏ မီးရှို့ဖျက်ဆီးမှုကြောင့် လက်ရှိအချိန်အထိ ကျေးရွာအတွင်းရှိ ပြည်သူပိုင်နေအိမ် ၅ လုံးခန့် မီးလောင်ပြာကျသွားပြီဖြစ်ပြီး မီးလောင်နေသည့် နေအိမ်များကို ဝင်ရောက်ငြှိမ်းသတ်ရန် ကြိုးပမ်းသည့် ဒေသခံပြည်သူများကိုလည်း စစ်သားများက လက်နက်ငယ်များဖြင့် လိုက်လံပစ်ခတ်နေကြောင်း သိရှိရသည်။
“မြစ်ခြေမြို့ ရှစ်မျက်နှာဘုရားမှာ အထိုင်ချထားတဲ့ စစ်ခွေးတွေ ဆင်းလာပြီး မီးရှို့နေတာပါ။ အခုလောလောဆယ် ကြားသိရတာတော့ နေအိမ် ၅ လုံးလောက် ပြာကျသွားပြီ။ မီးကလည်း အခုထိ ဝင်ငြှိမ်းလို့ မရသေးဘူး။ စစ်ခွေးတွေက မီးဝင်ငြှိမ်းဖို့ ကြိုးစားတဲ့သူတွေကိုပါ သေနတ်နဲ့ လိုက်ပစ်နေတယ်” ဟု ဒေသပြည်သူတစ်ဦးက ပြောဆိုသည်။
စစ်တပ်က ကျေးရွာအတွင်း ဝင်ရောက်မီးရှို့ကာ ပစ်ခတ်မှုများ ပြုလုပ်နေခြင်းကြောင့် ကြောင်ပန်းခုံကျေးရွာမှ ဒေသခံပြည်သူများအပြင် အနီးဝန်းကျင်ရှိ ဖိုကုန်းကျေးရွာ၊ ဆဲကြီးကျေးရွာနှင့် မြို့သစ်ဘက်ခြမ်းရှိ ကျေးရွာများမှ ပြည်သူများလည်း ဘေးလွတ်ရာသို့ ရွာလုံးကျွတ် ထွက်ပြေးတိမ်းရှောင်နေကြရကြောင်း သိရသည်။
ကြောင်ပန်းခုံကျေးရွာသည် စစ်တပ်၏ မီးရှို့ဖျက်ဆီးမှုကို မကြာခဏခံနေရသည့် ကျေးရွာတစ်ခုဖြစ်ပြီး ပြီးခဲ့သည့် တစ်ပတ်ခန့်ကလည်း အကြမ်းဖက်စစ်တပ်က ကျေးရွာအတွင်းရှိ ဒေါ်ခိုင်မာစန်း၏ နေအိမ်အပါအဝင် ပြည်သူပိုင်နေအိမ် ၃ လုံးကို မီးရှို့ဖျက်ဆီးခဲ့ကြောင်း ဒေသခံများထံမှ သိရသည်။
ထို့ပြင် မြစ်ခြေဒေသအတွင်း စစ်တပ်၏ လေကြောင်းတိုက်ခိုက်မှုများလည်း ဆက်လက်ဖြစ်ပွားနေပြီး စက်တင်ဘာလ ၄ ရက်နေ့ စစ်တပ်က Gyrocopter ဖြင့် ဗုံးကျဲတိုက်ခိုက်ခဲ့မှုကြောင့် အိုင်ကြီးကျေးရွာနှင့် ပေါက်တောကျေးရွာမှ အရပ်သားပြည်သူ ၅ ဦး ပွဲချင်းပြီး သေဆုံးခဲ့သည်။
သေဆုံးသူများမှာ အိုင်ကြီးကျေးရွာမှ ဒေါ်ဝင်းနု (အသက် ၆၅ နှစ်)၊ ၎င်း၏သားဖြစ်သူ ကိုခိုင်စိုးဦး (အသက် ၃၉ နှစ်) နှင့် ကိုခိုင်စိုးဦး၏ ဇနီး မနှင်းနုတို့ မိသားစု ၃ ဦးဖြစ်ပြီး၊ အခြားသေဆုံးသူ ၂ ဦးမှာ ကိုတင့်ဝေ (အသက် ၅၇ နှစ်) နှင့် ၎င်း၏ဇနီး ဒေါ်မြင့်မော် (အသက် ၅၄ နှစ်) တို့ဖြစ်သည်။
လက်ရှိတွင် ကြောင်ပန်းခုံကျေးရွာအတွင်း မီးရှို့ဖျက်ဆီးမှုများ ဆက်လက်ဖြစ်ပွားနေသဖြင့် နေအိမ်ပျက်စီးဆုံးရှုံးမှုနှင့် အရပ်သားပြည်သူများ၏ ထိခိုက်သေဆုံးမှု အခြေအနေကို အတည်ပြုနိုင်ခြင်းမရှိသေးဘဲ ဒေသခံများမှာ ဘေးလွတ်ရာသို့ ဆက်လက်ထွက်ပြေးတိမ်းရှောင်နေရကြောင်း သိရှိရသည်။
ဓာတ်ပုံ- ပုံအဟောင်းဖြစ်ပါသည်။
#KTM
#HlaingInfo
65
3
2
1September 7, 2026 2.6K 6
