Casteddu, 1 de maju 2026
Sos ùrtimos annos de luta ant mustradu un'isvilupu de importu mannu de sa cumponente comunista indipendentista a intro de sa comunidade polìtica sarda, a livellu de calidade e de cantidade, in sa teoria e in sa pràtica.
S'impeoramentu lestru meda de sas contradditziones chi sufrit su pòpulu traballadore sardu at dadu vida a un'organizatzione de giòvanos comente a s'UNIGCOM, chi at suladu unu bentu netzessàriu e rennoadore subra sa militàntzia sarda de totu sas generatziones.
A pustis de custa mirada, s'est fatu craru semper de prus su bisòngiu de unu partidu chi potzat cuntènnere, fintzas in un'àmbitu de non giòvanos isceti, custu fermentu de energias semper prus tragiadoras, presente in meda tretos acapiados a sa liberatzione natzionale de sa Sardigna.
Pro nde numenare unos cantos: sa disocupatzione, su precariadu e s'isfrutamentu de su traballu, s'opositzione a s'ispeculatzione energètica e a s'isfrutamentu de su territòriu, sa luta contra sas tzerachias militares, sa solidariedade cun sa Palestina, s'antimperialismu, sa liberatzione de sas fèminas e àteros gèneres marginalizados, sa luta pro una sanidade atzessìbile a totus, s'opositzione a sos CPR e àteras istitutziones suprematistas, s'antifascismu, s'impreu de sas limbas de Sardigna.
Dae inoghe naschet sa detzisione nostra de traballare cun grandu aficu pro donare sa possibilidade a 'Entula de acumprire su còmpitu chi s'est seberada finas dae sa fundatzione sua: pro custu semus barighende una fase de reflessione.
Tzerriamus a tesserados e simpatizantes: una borta chi amus a adelantare custa fase de meledu e de dibata, nos amus a addobiare totu paris e amus a presentare a cale si siat persone chi bògiat pigare parte a su caminu polìticu nostru.
A in antis, semper in paris finas a s'indipendèntzia e su sotzialismu!
