أنا شغال مهندس تشطيبات في شركة بمرتب ثابت، وفي بعض الأعمال بشتغل مع نفس الشركة كمقاول باطن، وبعمل لها مقايسة لتنفيذ الشغل.
يعني مثلًا لو متوقع إن تكلفة الشغل تكون 96 ألف جنيه، بعمل المقايسة بـ100 ألف؛ لأن بحط حوالي 4% أو 5% احتياطي للهالك والمصاريف النثرية، والشغل في الإجازات، وأي مصاريف طارئة أثناء التنفيذ.
الشركة عارفة طريقة التسعير دي، وصاحب الشركة والمكتب والمحاسب عارفين وموافقين، وبعد كده الشركة بتحط هامش ربحها وتقدم السعر النهائي للعميل بتاعها .
المشكلة إن ساعات بعد ما الشغل يخلص بيتبقى من المبلغ ده مثلًا ألف جنيه، فبحتفظ بيه عشان يغطي أي خسائر أو عجز حصل معايا في شغل تاني.
هل المبلغ اللي بيتبقى ده يجوز لي أخده؟
الإجابة: ركزوا كده في تفاصيل الاتفاق عشان دي مهمه
لان المسألة كلها تتوقف على سؤال واحد:
إنت في الشغل ده موظف عند الشركة، ولا مقاول باطن مستقل عنها؟
لأن الفرق بينهم كبير جدًا.
لو الشركة بتقولك مثلًا: نفّذ لنا الشغل ده كامل بـ100 ألف جنيه، وإنت كمقاول باطن مسؤول عن التنفيذ والتكلفة والهالك وأي زيادة تحصل؛ فالـ100 ألف هنا سعر مقاولة متفق عليه.
يعني لو صرفت 97 ألف، الباقي ربحك، ولو التكلفة طلعت 103 آلاف، فالخسارة عليك بحسب الاتفاق.
وفي الحالة دي مش لازم تثبت إنك صرفت الـ100 ألف كلها؛ لأن الشركة لم تسلمك عهدة علشان تصرفها، وإنما اتفقت معاك على تنفيذ عمل بسعر محدد.
📌فالخراج بالضمان والغنم مقابل الغرم
وده متوافق مع قرار مجمع الفقه الإسلامي الدولي في عقد المقاولة، اللي أجاز تحديد ثمن المقاولة بمبلغ إجمالي معلوم.
لكن لو إنت بتتصرف هنا بصفتك موظف في الشركة، والـ100 ألف مجرد ميزانية أو عهدة الشركة مديهالك علشان تنفق منها على الشغل، فالوضع مختلف تمامًا.
إنت هنا أمين على فلوس الشركة، وبالتالي لو صرفت 99 ألف وفضل ألف، فالألف ده ملك الشركة مش ملكك، حتى لو إنت اللي وفرته.
إلا لو صاحب الصلاحية في الشركة قالك بوضوح إن المتبقي ده من حقك أو مأذون لك تستخدمه بالطريقة دي.
وخلي بالك من فرق مهم:
إن الشركة تكون عارفة إنك بتحط 5% احتياطي للهالك والطوارئ، مش معناه تلقائيًا إنها موافقة إن أي مبلغ يتبقى من الـ5% يبقى ملكك.
ونفس الكلام لو الاتفاق بينكم أصلًا قائم على التكلفة الفعلية + هامش ربح ( +cost) ؛ ساعتها لازم تظهر التكلفة الحقيقية، والربح يكون هو الربح المتفق عليه، مش مبلغ تقديري للمصاريف يتبقى منه جزء يتحول لربح من غير اتفاق.
لانها هتدخل في بيوع الأمانات ( المرابحة )
📌فالخلاصة:
لو إنت مقاول باطن بسعر مقطوع = المتبقي لك، لأنك بتكسب لو وفّرت وبتتحمل لو التكلفة زادت.
لو إنت موظف والفلوس عهدة لتنفيذ الشغل = المتبقي للشركة، إلا لو أذنت لك صراحةً بأخذه.
فالمشكلة مش في الـ4% أو الـ5% نفسها، المشكلة في صفة الفلوس دي عند استلامها: ثمن مقاولة؟ ولا عهدة ومصاريف فعلية؟
وده لازم يكون واضح بينك وبين الشركة، خصوصًا إنك بتجمع في الحالة دي بين صفة الموظف وصفة مقاول الباطن.
والله أعلى وأعلم
ما تنساش تاخد (٤) كورسات مجانية وتشوف المقاطع الخاصة بالمقاولات على قناة اليوتيوب 👇🏻
#باسم_عليوة
#شريعة_أوديت
10
2August 23, 2026 1.8K 1
