ربي عجل بالفرج
حتى ميگولون عايف ثارك
گوم ياابن العسكري ابتارك
ــــــــــــــــــــــــــــــــــــــــ
گــوم لا مــا يستقر نفســه الوضع
وما يـرد للزهـرة يالمهـدي الظــلـع
ادري مــايخــفى عليك وتستمـــع
الـهـاي ماتحـمـل بعد انصارك
ـــــــــــــــــــــــــــــــــــــــــــ
وينه مهديكم يسألونه عليك
ننتــظر امــر الله گلنـه ونرتجـيك
متى سيف الحق نشوفه بين اديك
احلوگ تسكت لو لمع فقارك
ــــــــــــــــــــــــــــــــــــــــــ
الگال مايظـهـر نـسـى ثار الذبيح
وچذب بحچي النبي وقوله الصريح
خلـفـك يصلـي يمهـدينه المـسيـح
وبالظهـور تبان كل اسرارك
ــــــــــــــــــــــــــــــــــــــــ
احنه مايهمنه الحچي كائن يكون
وخلي بأقـوال النـبي يستهـزئون
ظهر الحق وين مأوى الظالمون
ينادي جبريل ويطفي النارك
ــــــــــــــــــــــــــــــــــــــــــ
گالوا اعليك الخرافة ابلا خجل
لو صدگ موجود لحظة ماحمل
ماتهـمه اچـفـوف عباس البطـل
وهيا تهتــف ياهــلا بثوارك
ــــــــــــــــــــــــــــــــــــــــ
حللوا منكرهم وكلشي حرام
واستباحوا دينك بدين الظلام
جاروا اعلينه يمهدينه اللئام
مثل جدك گوم حامي الجارك
ــــــــــــــــــــــــــــــــــــــــــــ
والله ماننطيها گاعك للكفر
بهاي ادينه نشيل رايات النصر
شيعتك تنتظرك وتنهي الامر
مثل مشايه وتهب زوارك
الشاعر فاروق الغنامي
August 22, 2026 451 3
