كنت قاعدة أنا ومخي لوحدنا وسألته
— هو الإنسان ممكن يغلط يا سيدي المخ؟ 🤔
قالي بكل ثقة
— آه طبعا عادي جدا
إحنا اتخلقنا نغلط ونصلح غلطنا ونتعلم منه
وكل ابن آدم خطّاء
والمهم نفهم إحنا غلطنا في إيه ونحاول نصلحه ونقوم نكمل.
قلتله
— طيب ولو لقيت حد غلط وعمال يلوم في نفسه ويجلد ذاته بتعمل إيه؟
قال
— بكلمه عن الرحمة بالنفس وإن الغلط مش نهاية العالم وإن الإنسان مش لازم يفضل يعاقب نفسه طول عمره على غلطة
وبفهمه إننا بنتعلم من أخطائنا مش بنعلقها لنفسنا كربا.ج
قلتله
— كده تمام أوي ❤️
وبعدين سألته بمنتهى البراءة
— طيب يعني… مسموح لي أنا كمان أغلط؟
هنا بقى معرفتش أسيطر على سيدي المخ 🥹
الراجل قلب فجأة من معالج نفسي لكبير العيلة 😂
نزل فيا ضرب وشتيمة وكلام ماينفعش يتقال على الملأ وقالي
— تغلطي مين يا اللي عاوزة تتهزئي؟! 😡
— إنت مش كنت فاهمة؟
— إنت مش كنت عارفة؟
— ثم إنت إزاي أصلا تغلطي الغلطة دي؟
— وبعدين إنت كنت فين لما الغلطة حصلت؟
— قلة تقدير… قلة احترام… إهمال… استهتار… 😤
وأنا واقفة مذهولة
— طب يا سيدي… ما إنت من شوية كنت بتقول إن الإنسان من حقه يغلط؟
منا إنسان زيهم😭
قالي
— الإنسان آه… بس إنت لأ. 🫠
ليه هو انا من الرخويات مثلا😏
أنا قولت إيه زعله كدااااااا؟!
👈 الحقيقة إن أحيانا الإنسان بيربط قيمته باللي بيقدمه
يعني مخه يبدأ يقول له
لو أنا بقدم حاجة كويسة → إذن أنا كويس
لو بقدم حاجة نص نص → إذن أنا نص نص
لو غلطت → إذن أنا هاط.لع عيني لاني شخص سيئ
طب ولو غلطت غلطة كبيرة؟
يبقى أنا أصلا ماستاهلش حاجة 😏
👈والمشكلة الأكبر إن معيار الحاجة الكويسة نفسه ممكن يكون معيار تعجيزي
يعني حاطط لنفسه شروط محدش تقريبا يقدر يحققها
فطبيعي يفضل شايف اللي بيقدمه قليل
وطبيعي تقديره لنفسه يفضل مربوط بإنجازاته
وطبيعي جدا لما يغلط
تبقى الغلطة مش مجرد غلطة
تبقى بالنسبة له تهديد لقيمته كلها
وهنا يبدأ جلد الذات ومرمطة النفس الداخلية
👈 فمابالك بقى لو عنده ADHD زي حالاتي
وحساسية الرفض (RSD) في السما
إضرب اللي فوق دا في اتنين😁
لكن خليني أقول حاجة مهمة جدا
⭕إحنا فعلا محتاجين يكون عندنا نفس لوّامة
النفس اللي تقول لنا
لأ… إنت محتاج تشد حيلك
راجع نفسك
صلح غلطك
ماتستهونش بالذنب
ماتطمنش لنفسك زيادة لدرجة إن الغرور يدخل قلبك.
👈لكن النفس اللوامة مش دورها تكسر مقاديفك
مش دورها تقولك
إنت مالكش لازمة
إنت فاشل
إنت ما تستاهلش
إنت عمرك ما هتتغير
إنت أسوأ واحد في الدنيا🙆
👈دي مش نفس لوامة…دي بقت نفس جلادة 😅
النفس اللوامة تلفت نظرك للغلط عشان تصلحه
لكن جلد الذات بيحول الغلط إلى هوية
✓الأولى تقولك إنت غلطت… شد حيلك وصلّح
✓والتانية تقولك إنت غلطت… يبقى إنت وحش
دا انتا متستاهلش اللقمة يا جدع
الأولى بتقوّمك....التانية بتكسرك
فخلي عندك ضمير يراجعك بس ماتخليش جواك جلاد يهينك
✓النفس اللوامة تقولك شد حيلك مش إنت مالكش قيمة✓
مين فيكم هنا بقى زي سيدي المخ🙈
اكتبلي ايه هي اكتر جملة مخك جلدك بيها
#علياء_عون
#صنايعية_ADHD
#ADHD_mentor
16August 20, 2026 2K 6
