نوگ هزله وبالمشي تدبي دبي
وعمري بالخمسين مو مالت سبي
اتعثر بخطواتي. والتمن ابنياتي.
خويه مو مالت سبي
//////////////////////////////////1
من كسر حافرهم ضلع. ياخويه كلت انه انفجع.
وبقه غريبه
يحسين مو مالت سبي. واليمشي وياي اجنبي.
انه الحبيبه
دورت كل السوالف ما لگيت
سالفه اتردك اليه يالمشيت
مو دمع دم عله طاريك بجيت
يالعفتني بهيمه للهيمه انحنيت
وحدي والصحراء ما بيها خيام
وگمت اگولن اه لو حل الضلام
اتوجع ابحسراتي . والتمن ابنياتي.
خويه مو مالت سبي
///////////////////////////////////2
خويه اصبحت مثل الجمر. بساع يشتعل لمن تمر.
نسمه عله روحه
وبجي كمت مثل الطفل. من يبچي دوم ماينسأل.
ويلم جروحه
بيا كتر جرحك تگلي حته اجيك
بلكت اطيب وترد مو روحي بيك
شلون ترهم شامت ايساوم عليك
وانه زينبكم ترى بروح اشتريك
چم جرح عليه چلچل من طحت
ومثل تيهت ماي وبرمله تهت
وسݘبت دمعاتي. والتمن ابنياتي.
خويه مو مالت سبي
/////////////////////////////////3
دهري ذر بيه الحزن. وعليك كمت أنه اون.
ياخويه اريدك
عله النهر عفته الاخو. وتوزعت اعله العدو.
ياهو اليعيدك
يهنياله السهم ضل گاعد بعينك
وانه بالساني بقت جلمة الوينك
كمت اون عليك من اسمع ونينك
وعالجروح البيك گلت الله يعينك
هيچ ياخويه السهم نساك اخيتك
انه من گالو طحت زحف اعتنيتك
يمخضر بجلماتي. والتمن ابنياتي.
خويه مو مالت سبي
////////////////////////////////4
ردلي يا چلمة هله. وياك اضل امدلله.
ومايصدلي سوطه
ردلي يا وجه النده. اختك ترى يم العده.
واعلن شروطه
شرط من تمشي ما تذكر الكافل
بس تذكره السوط يحچي ابلا تسائل
انه حرمه وسوگ وبچفي سناسل
وناگه هزله وفوكها تميل المحامل
حرت والحيره الشفتها اشكثر صلفه
يا حسافه العدو خله اشروط كلفه
انتخي بلوعاتي. والتمن ابنياتي.
خويه مو مالت سبي
////////////////////////////////5
انه الاميره بت علي. ياخويه رجعني الهلي.
شفت الخرابه
داري صار ابلا سگف. والحالة صعبه تنوصف.
عشت ابغرابه
حالتي حال اليتيم امضيع الدروب
يبچي والدنيه ازرعت شمس الغروب
جان مشيي اوياك مهيوب عالمهيوب
ومن بعد ضلك يخويه الخدر مسلوب
بروحتك يحسين زينبكم يتيمه
وانه والميمون نصرخ هالظليمه
اقره كمت اياتي. والتمن ابنياتي.
خويه مو مالت سبي
////////////////////////////////////6
عكب وجهك ماكو راي. يمغطي كل وجهي وكفاي.
ماطبگ چفني
عين ضلت عالعيال. وعين منها الدمع سال.
ونطفح وني
بالخرابه وگمت ارسم خويه خيمه
لچن صار الهوه ضدي ورسم هيمه
خويه من اعطش جنت تصير غيمه
هسه عطشانه وگلت والله هضيمه
شما اغمض العين تندهني الجروح
حرت بعيالي بعدكم وين اروح
انطفن شمعاتي. والتمن ابنياتي.
خويه مو مالت سبي
///////////////////////////////////7
مو زاعلت حته الهوه . ودلالي بچفاكم حوه.
بس الالام
من الصبه انه ادركت . تروح ياخويه ورحت.
وترافگ اسهام
گلي شنطاك السهم اوغبت عني
يالزرعت الشوگ بيه شو عفتني
كلي عطاب وعلي لو دورتني
ولو سألت عليه اگلك هذه متني
تعبانه حيل واعثر ابطرف العبايه
من عفتني الشمر ضل يمشي ورايه
كلفة اصبحت حياتي. والتمن ابنياتي.
خويه مو مالت سبي
///////////////////////////////////
سعد الزيدي
July 24, 2026 1.6K 7
