ماخَلَّت حيل...عندي الآلآم
زين وردِّيت...عَدله امن الشام
حُسيناً...واحُسيناه
آنه ام الصبر زينب..أميره وآنه علويَّه
وسف فگد اخوتي والطف...حِنَنِّي وأثّرن بِيَّه
إجيت الكربله ابهيبه...ومنهه اطلعت مَسبِيَّه
عگب الشفته زين آنه...وعشت للاربعينيَّه
ناري البالروح...چن نار اخيام
زين وردِّيت...عدله امن الشام
حُسيناً...واحُسيناه
.......................................
يهل تنشد على احوالي..اشعجب عدله بگيت آني
مَشيئة ربنا خَلَّتني...أرد لگبور ولياني
لوما حكمة الباري...بالطف مَيته تلگاني
امبارَك بس نَفَس ضلّيت...عگب افراگ خُوَّاني
كَبَّرني النّوح...مدري اشچم عام
زين وردّيت...عدله امن الشام
حُسيناً....واحُسيناه
.....................................
تِهِد الرَّاسِيَه احزاني...وتِشَيب الطفل سالفتي
واعله اجروحي الاحچيله..يگول اشعجب عدله انتي
گد ما بالسَّبي اتأذّيت...وراواني العَجَب وكتي
أون امن الهظم والنُّوگ..تون وتنحب الوَنْتِي
وجفن المهظوم...مجروح اينام
زين وردّيت...عدله امن الشام
حُسيناً...واحُسيناه
........................................
من اليسر للوادي...رجعنه ابروس اهالينه
وصلنه وذكريات الضيم...كلهه انعادت اعلينه
اهنا صحنه وبچينه اهنا...واهنا طاح ابو اسكينه
واهنا مات ابو فاضل...وكلهه اتشمتت بينه
ومِنَّا يحدون...بينه الضِّلاَّم
زين وردّيت...عدله امن الشام
حُسيناً....واحُسيناه
.....................................
ملهوفه اعله اخوي حسين..واحسب يمته نتلاگه
امن الناگه هويت آنه...گبل ما توصل الناگه
وقبل ماأحچي عن جرحي..وعن حزني وعن افراگه
ناديته ابجرح گلبي...وحگ الزهره مشتاگه
ورحت العباس...والطم عالهام
زين وردّيت...عدله امن الشام
حُسيناً....واحُسيناه
......................................
من البَچي محرومين...وبينه الحسره مختنگه
ترسنه المگبره بالنوح...بلكي انعوّض الحِرگه
كل حُرمه اعله غاليهه...تحن وتشتكي الفرگه
الهظيمه للمدينه اشلون...نرد وكلشي مانلگه
انعيش الآهات...ابموت الأحلام
زين وردّيت....عدله امن الشام
حُسيناّ....واحُسيناه
سيد علي الموسوي
2
2August 4, 2026 1.1K 4
