صاح ابو فاضل هله وشد النطاق
وطلعت المشايه من كل العراق
طلعت ورفت الرايات الخضر
وأبو فاضل شال جفينه السمر
للحسين المنذبح دگو صدر
واسم زينب بالكلب كِتبوه وثاق
.
.
.
.
طفل' شايب' شاب كلها محزمه
هاي وادم عالحسين معلمه
والنسِه طلعت تعزي فاطمه
تحشمت بالغيره وانذل النفاق
.
.
.
.
ذوله ناس اترابهم يسوه الذهب
حرگه بيهم عالخيم حرگت وهب
اذا صاحو يا علي يموت التعب
والگلوب الكربله سوت سباق
.
.
.
.
.
وين امثال الكرم خل تنضرب
موكب بصف موكب انحَط بالدرب
بيت واحد ناسها لا مو غرب
خدمة أهل البيت ما بيها شقاق
.
.
.
.
طفح نهر الكرم وابدًا ما يجف
اذا ينسد موكب يفتح الالف
عد الحسين الخدم كلهم عرف
تمنو الخدمه عمُر مابي فراق
.
.
.
.
هبت البصره وگصِدها كربله
وصاحت الزهره هله وميت هله
وطلعت اعمارتنا طلعه معدله
وهاي ذي قار الفخر كلها اشتياق
.
.
.
.
والعوابس من سماوتنا الفخر
صار ممشاهم مثل ممشه النهر
اتحدوا اويه أهل النجف صارو بحر
ورفعو الرايات من بعد العناق
.
.
.
.
الدوانيه على الحله انطوت
وگامت اديالى شرارة وما طفت
ويه أهل بغداد للعز اگصدت
والشمال الكربله أعلن انطلاق
الشاعر عبدالله الشويلي
August 1, 2026 988 7
