يانوگ اليسر يانوگ .. اريد احچي عله احزاني اجيت بهيبة الخوّان .. رحت… — قصايد مكتوبه كتابه

قصايد مكتوبه كتابه@aappqws · 4.8K subscribers Open in TelegramOpen

يانوگ اليسر يانوگ .. اريد احچي عله احزاني
اجيت بهيبة الخوّان .. رحت ابلايه خواني
ــــــــــــــــــــــــــــــــــــــ
يانوگ الطريج اطويل .. وآنه وياچن ارد احچي
واسولف عالمشو عنّي .. وچلمه اشهگ وچلمه ابچي
بلچي ولني گبل الشام .. يلفيني الأجل بلچي
ولا هاي الشماته اتشوف .. جيتي بدون ولياني
ــــــــــــــــــــــــــــــــــــــ
يانوگ السوالف هاي .. نار وتاكل بچبدي
آنه بت علي الوالي .. وهيبة فاطمه عندي
اجيت من الوطن عبّاس .. چان بناگتي يحدي
وهسه بلا چفيل امشيت .. واليحدوني عدواني
ــــــــــــــــــــــــــــــــــــــ
يانوگ اليسر عباس .. رحت وبعد ماشوفه
حنينه وچلمة الخوه .. افگدتها بطيحة اچفوفه
شلون امشي بيسر وادخل .. اسيره بديرة الكوفه
وعيون الشماته احجار .. كلمن بيها راماني
ــــــــــــــــــــــــــــــــــــــ
يانوگ اليسر راحو .. اهلي ومابعد رجعه
كلهم عالترب نومه .. ذبايح والجثث صرعه
عفت حسين جوه الخيل .. تدوس وتطحن بضلعه
الم اضلوعه منعوني .. وشمر بسياطه اذّاني
ــــــــــــــــــــــــــــــــــــــ
يانوگ اليسر بالله .. صبري هم حصل مثله
وياي اثنين وثمانين .. بين الطفل والطفله
رقيّه وعاتكه وسكنه .. وحميده الغاليه وخوله
اسكّت هاي تنحب هاي .. هيچ الدهر خلاني
ــــــــــــــــــــــــــــــــــــــ
يانوگ اليسر والروس .. فوگ ارماح رفعوها
ولمن يجري راس حسين .. يعني طفله روعوها
والتبچي المصايبها .. يضربوها ويمنعوها
خلصت من الخيم والنار .. جمر اليسر چواني
ــــــــــــــــــــــــــــــــــــــ
يانوگ اليسر بهداي وادري الدرب هوّه بعيد
خل ايطول درب الشام .. ولا طب عله الطاغي ايزيد
تراها طبة الديوان .. صعبه والشماته اتچيد
بيت المرتضى حيدر .. هوه الچان ديواني

فراس المحمداوي

t.me/aappqws/843 Translate