▫️آرتسا دا ائولریمیزدهکی درمان قوتولارینین سایی،
یئنه اوچ دوست، آداما بیر سیقارئت یاندیریب اونوتماغا چالیشیریق،
«آیسل»ی، «گونل»ی، «گونای»ی.
«به-به»له، یاشانانلاردان دانیشیریق،
سانکی فخر ائدیریک خاطیرهلریمیزین چوخلوغو ایله.
آما اوچوموز ده یاخشی بیلیریک کی،
ان خوشبختیمیز خاطیرهسی ان آز اولاندیر،
ان کؤکوموز ان چوخ غم یئیندیر-
بو، سؤز اویونو دئییل.
دئپرئسیا کؤکَلدیر،
رئپرئسیا آریقلادیر.
ان یاخشی شاعیریمیز یازا بیلمهیندیر.
ان چوخ یاشایانیمیز اؤلمک ایستهییب اؤله بیلمهیندیر.
توز باسسا دا ائویمیزدهکی شکیل قوتولارینی،
قوناقلیق وئرسه ده سون زنگین اویونجاق آییسی بیت-بیرهلره،
ایندی بویوموز راحاتجا چاتسا دا شکافین اوستونه،
سنگردن بویلانان یارالی عسگر کیمی باخیریق خاطیرهلره.
سونرا یئرینه دوشور گؤیون گورولداماغی،
یاغیشین یاغماغی.
بولودلاری آنا دیلینده ائشیدیریک
و بیز یئنه ده سؤز وئریریک بیر-بیریمیزه:
صاباحدان سیقارئتی،
بیریگوندن داریخماغی ترگیدیریک.
یئنه اوچ دوست، آداما بیرینی یاندیردیق-
«آیسل»ی، «گونل»ی، «گونای»ی.
#رشاد_ناغی_مصطفی
#شعر_اوجاغی
@SheirOcagi
3September 8, 2026 154 4
