▫️اویونجاق
آی باجی، منه بیر اویونجاق وئرین،
گؤزو اوندا قالسین بوتون شهرین!
من آلیم آپاریم اونو اوغلوما،
الیمده گؤرنتک جومسون اوستومه!
یوخ، باجیم، گؤسترمه نه دوه، نه فیل!
اونلار دردیمیزین علاجی دئییل.
ائله بیر اویونجاق وئرین کی منه،
دانیشسین اؤزوندن، گولسون اؤزوندن!
ائله بیر اویونجاق وئرین، اوغلومون-
بوتون اویونجاقلار دوشسون گؤزوندن!
ائله بیر اویونجاق وئرین، اونوتسون-
بو اویون-اویونجاق طالع ایشینی!
تانیش بارماقلارین نوازیشینی،
یادینا سالماسین، گؤزو دولماسین!
گؤزو دولاندا دا قورودا بیلیم.
ائله بیر اویونجاق وئرین کی، باجیم،
اوغلوم لاپ منی ده اونودا بیلسین!
غم منی یوللارا سۆروکلهینده،
همین اویونجاغا قاریشسین باشی!
بلکه اؤتَنهدک اویونجاق یاشی،
آجماسین گئجهلر لایلا سسینه،
کیمینسه گوناورتا زومزومهسینه،
مطبخین قاب-قاجاق هنیرتیسینه!
یوخ، گرهییم دئییل نه دوه، نه فیل،
اونلار یۆکوموزو داشییان دئییل.
ائله بیر اویونجاق وئرین کی منه،
ائویمین بوزونو اریده بیلسین!
تاولاسین اوغلومون هیککهلرینه،
قویوب دیزی اوسته کیریده بیلسین!
دانیشسین اوغلوما شیرین ناغیللار،
هر ناغیل سونوندا توی وار، دویون وار!
لاپ ناغیلداکیتک هاچانسا، بیر گون
آچیم گؤزلریمی کؤرپهم بؤیوسون،
بؤیوسون منیم تک سئوسین بیر کسی!
#ذوالفقار_رفعتاوغلو
#شعر_اوجاغی
@SheirOcagi
2September 6, 2026 216 1
