حاجات تخلي الذكر يرد فيك الروح:
١- وقت الذكر استشعر إنك مش لوحدك.. إنت معاك ملايكة.. وربنا نفسه بيذكرك في ملأ أعلى وأحسن..
تخيل إن ربنا ذكرك دلوقتي!
٢- خليك مع "الصلاة على سيدنا النبي" شوية حلوين..
ده المفتاح اللي بيفتح كل الأبواب المقفولة.. وتخيل وإنت بتصلي عليه إن سلامك ده بيتعرض عليه وإنه بيرد عليك السلام.. إحساس يطير العقل!
٣- خصص ذكر معين لكل إحساس حاسس بيه..
لو خايف كتر من "حسبنا الله ونعم الوكيل"،
لو مكسور قول "يا جبار اجبرني"،
لو رزقك ضيق ردد "يا فتاح يا رزاق"..
خلي الذكر هو الدوا المظبوط لـ وجعك.
٤- ابدأ دايماً بـ "الاستغفار"..
اعتبره الدش الروحاني اللي بتغسل بيه قلبك من تراب الذنوب والزعل والغفلة..
القلب النضيف بيستقبل أنوار الذكر أسرع بكتير.
٥ـ جرب تذكر ربنا بصوت الهمس.. لا هو سر في سرك ولا هو صوت عالي يشتتك.. صوت واطي حنين تسمعه ودانك وقلبك بس؛ كأنك بتوشوش ربنا بضعفك ومحبتك.
٦- اربط الذكر بالنَفَس بتاعك.. يعني تاخد نفس عميق براحة وتطلع الزفير وإنت بتقول "الله".. الطريقة دي بتخلي الكلمة تتخلل كل خلية في جسمك وبتنظم ضربات القلب وتهدي القلق.
٧- بلاش تجري ورا العداد.. ربنا مش بيحاسبنا بالكيلو..
إنك تقول "سبحان الله" ١٠٠ مرة وإنت حاسس بكل حرف فيها أحسن مليون مرة من ألف مرة باللسان والقلب سارح في الجمعية وقسط العربية.
٨- لو إنت كائن قلوق زي حالاتي.. والأدرينالين دايما بيغلي في دمك من التفكير.. جرب تاخد نفس وتقول "لا حول ولا قوة إلا بالله" ببطء؛ دي مش مجرد جملة ؛ هي أشبه بحقنة مهدئ بتدخل في الوريد ؛ بتطفي حرايق الكيميا اللي جوه دماغك وتقولك:
"إنت أضعف وأهش من إنك تسيطر على حاجة سيب الدركسيون لصاحبه". شعور يخض في الأول بس مريح بشكل غريب!
٩- نوّع في الذكر عشان قلبك ما يزهقش.. شوية تسبيح، شوية استغفار، شوية حوقلة.. كل كلمة ليها سر ونور مختلف بيعالج حتة معينة في الروح.
١٠- الذكر مش بس سبحة.. هو كمان إنك تشوف عناية ربنا في التفاصيل اليومية.. كوباية القهوة اللي ظبطت مزاجك، التوصيلة اللي خلصت بسرعة، العميل اللي وافق على الشغلانة من غير فصال..
لما تربط كل ده بـ كرم ربنا مش بـ شطارتك بس.. ده في حد ذاته أعلى مقامات الذكر.
وابقى ادعيلي يا صديقي.
- د/محمد عبد الجليل
