هل المحتوى العربي وصل لمرحلة التشبع؟
قبل ما أجاوبك على السؤال ده لازم الأول تعرف:
- إن عدد الناطقين باللغة العربية يتجاوز الـ 500 مليون إنسان
- واللغة العربية وتعتبر من أكثر 5 لغات من حيث عدد المتحدثين بها (في الترتيب 4 أو 5 حسب اختلاف بعض المصادر)
- وفي 2025 وصل عدد مستخدمين الإنترنت في العالم العربي لـ 348 مليون مستخدم
والغريب هنا إن المحتوى العربي بيشكل 3% (مع اختلاف بعض المصادر) من حجم المحتوى العالمي!
وأعتقد أنت فهمت دلوقتي هل المحتوى العربي وصل لمرحلة التشبع ولا لاء.. ولكن دي مش المشكلة..
الرئيس التنفيذي لشركة ثمانية عبدالرحمن أبو مالح في لقاءه في قمة المليار متابع ( 1Billion summit) الأخيرة قال جملة مهمة جدا
"المحتوى هو اللي بيشكل الأفراد في المجتمعات".
فلو جينا نُسقط الجملة دي على المحتوى العربي هنلاقي في فجوة كبيرة جداً ما بين عدد مستهلكين المحتوى وما بين نسبة المحتوى العربي المتوفرة.
يعني عايز أقول إن نسبة إستهلاك المحتوى الغربي (أو أي محتوى غير العربي) كبيرة وده بيأثر على هوية وثقافة الأفراد وبالتالي المحتوى الأكثر استهلاكا هو اللي هيشكل مجتمعاتنا العربية.
ممكن تقولي يا عبدالله هو المحتوى مهم أوي كده إننا نركز عليه ونهتم بيه؟
الحقيقة مهم؛ لأن الإنسان بطبيعته حيوان مستهلك،
واستهلاك المحتوى أصبح شيء طبيعي زي الأكل والشرب في العصر ده.
والحقيقة الموضوع أكبر من كده وليه أسباب كثير ممكن أتكلم عنها بعدين ولكن عايز اوصلك رسالة واحدة
"ما زال المحتوى العربي فقير"
ونسبة المحتوى الـ 3% اللي قولتلك عليها فوق
جزء كبير منها محتوى تافه غير المترجم بدون وعي..
فالعالم العربي لسه محتاج محتوى أكتر لسه الطريق طويل جدا، لسه محتاجين صناع محتوى ومحتاجين بنية تحتية لصناعة المحتوى ومحتاجين حاجات كثيرة.
ولكن في حقيقة مهمة وإيجابية:
إنك سهل جدا تعمل محتوى وبأقل الأدوات وتشتغل بالمتاح.
#باستفاضة
